Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 92

Jizɔs Wek Dayman

Jizɔs Wek Dayman

DI TITI we yu de si, ol 12 ia. Na Jizɔs ol in an, ɛn na in mama ɛn papa tinap nia de. Yu no wetin mek dɛn gladi so? Lɛ wi si.

Di titi in papa na wan impɔtant man we nem Jayrɔs. Wan de dis man in pikin sik, ɛn dɛn le am na bed. Bɔt di pikin nɔ bin de bɛtɛ. Di sik bin jɔs de mɔna am. Dis mek Jayrɔs ɛn in wɛf wɔri, bikɔs dɛn fil se dɛn pikin go day. Na dɛn wan gren pikin. So Jayrɔs go luk fɔ Jizɔs. I bin dɔn yɛri se Jizɔs de du bɔku mirekul.

We Jayrɔs si Jizɔs, plɛnti pipul dɛn bin de rawnd Jizɔs. Bɔt Jayrɔs pas midul di pipul dɛn ɛn go nil dɔŋ na Jizɔs in fut. I beg Jizɔs se: ‘Mi pikin sik bad bad wan. Duya, kam go mɛn am fɔ mi.’ So Jizɔs go wit am.

We dɛn bin de go, di pipul dɛn bin de push push dɛnsɛf fɔ go nia Jizɔs. As dɛn de go, na de Jizɔs tinap ɛn aks se: ‘Na udat tɔch mi?’ Jizɔs fil pawa kɔmɔt insay am, so i no se pɔsin dɔn tɔch am. Bɔt na udat tɔch Jizɔs? Na wan uman we bin gɛt wan bad bad sik. I dɔn gɛt dis sik ya fɔ 12 ia. Dis uman kam biɛn Jizɔs ɛn tɔch in klos. As i tɔch Jizɔs in klos so, na de i wɛl.

Dis mek Jayrɔs in at kol smɔl, bikɔs i dɔn si se i nɔ at fɔ mek Jizɔs mɛn pɔsin. I nɔ tu te, dɛn sɛn pɔsin fɔ kam tɛl Jayrɔs se: ‘Nɔ mek Jizɔs kam igen. Yu pikin dɔn day.’ Bɔt Jizɔs yɛri wetin di pɔsin se, so i tɛl Jayrɔs se: ‘Nɔ wɔri, natin nɔ go du yu pikin.’

We dɛn rich na Jayrɔs in os, dɛn mit di pipul dɛn de kray bita bita wan. Bɔt Jizɔs tɛl dɛn se: ‘Una lɛf fɔ kray. Di pikin nɔ day. Na slip i de slip.’ Bɔt dɛn laf Jizɔs, bikɔs dɛn no se di pikin dɔn day.

Jizɔs kɛr di pikin in mama ɛn papa, ɛn tri pan in apɔsul dɛn go na di rum usay dɛn le di pikin. I ol di pikin in an ɛn tɛl am se: ‘Grap!’ Na de di pikin gɛt layf bak, jɔs lɛk aw yu de si na di pikchɔ. Dɔn, i grap ɛn waka waka. Na dat mek in mama ɛn papa gladi so.

Dis nɔto di fɔs pɔsin we dɔn day we Jizɔs gi layf bak. Di fɔs wan we di Baybul tɛl wi bɔt na wan uman in pikin. Dis uman in man bin dɔn day. Di uman bin de na wan tɔŋ we dɛn de kɔl Nen. Leta, Jizɔs gi wan man we dɛn kɔl Lazarɔs, layf bak. Lazarɔs na Meri ɛn Mata dɛn brɔda. We Jizɔs bi kiŋ fɔ Gɔd in kiŋdɔm, i go mek bɔku pipul dɛn we dɔn day gɛt layf bak. Wi gladi fɔ dat, nɔto so?