Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 81

Di Izrɛlayt dɛn Abop Pan Jiova

Di Izrɛlayt dɛn Abop Pan Jiova

NA LƐK 50,000 pipul dɛn so bin kɔmɔt na Babilɔn fɔ go bak na Jerusɛlɛm. Bɔt we dɛn rich, dɛn si se Jerusɛlɛm pwɛl bad. Nɔbɔdi nɔ bin de de. Di Izrɛlayt dɛn gɛt fɔ bil ɔltin bak.

Wan pan di fɔs tin dɛn we dɛn bil, na ɔlta. Ɔlta na ples usay dɛn kin mek sakrifays to Jiova. Afta sɔm tɛm, di Izrɛlayt dɛn bigin fɔ bil di tɛmpul. Bɔt bad pipul dɛn bin de nia usay di Izrɛlayt dɛn bin de. Dɛn bad pipul ya nɔ bin want mek di Izrɛlayt dɛn bil di tɛmpul. Dɛn tray fɔ mek di Izrɛlayt dɛn fred, so dat dɛn lɛf fɔ bil di tɛmpul. Afta ɔl dis, dɛn bad pipul ya mek di nyu kiŋ fɔ Pashya mek wan lɔ se, di Izrɛlayt dɛn fɔ lɛf fɔ bil di tɛmpul.

We di Izrɛlayt dɛn dɔn tek 17 ia na Jerusɛlɛm, Jiova sɛn tu prɔfɛt dɛn we na Egay ɛn Zakaraya, fɔ tɛl di pipul dɛn mek dɛn bigin bil di tɛmpul bak. Di pipul dɛn abop pan Gɔd fɔ ɛp dɛn, ɛn dɛn du wetin di prɔfɛt dɛn se. Dɛn bigin bil di tɛmpul bak, pan ɔl we lɔ de we se dɛn nɔ fɔ bil am.

So wan bigman na Pashya we nem Tatinay, kam aks di Izrɛlayt dɛn udat tɛl dɛn fɔ bil di tɛmpul. Di Izrɛlayt dɛn tɛl am se, we dɛn bin de na Babilɔn, Kiŋ Sayrɔs bin tɛl dɛn fɔ kam na Jerusɛlɛm, ɛn bil Jiova in tɛmpul.

Tatinay sɛn lɛta na Babilɔn fɔ aks if na so Sayrɔs bin se. Bɔt Sayrɔs bin dɔn day da tɛm de. I nɔ tu te, di nyu kiŋ fɔ Pashya sɛn lɛta to Tatinay. Pan di lɛta, i tɛl Tatinay se na so Sayrɔs bin se. Ɛn di kiŋ rayt se: ‘Lɛf di Izrɛlayt dɛn saful mek dɛn bil dɛn Gɔd in tɛmpul. Naw a de tɛl yu se, yu fɔ ɛp dɛn.’ Na lɛk 4 ia so di Izrɛlayt dɛn tek fɔ bil di tɛmpul. Ɛn dɛn gladi bad we dɛn dɔn fɔ bil am.

Yu no aw Jerusɛlɛm bin tan lɛk 48 ia afta dɛn dɔn bil di tɛmpul? Di pipul dɛn na Jerusɛlɛm bin po. Di tɔŋ ɛn di tɛmpul nɔ bin fayn igen. Bɔt wetin bin de apin na Babilɔn? Wan Izrɛlayt man we nem Ɛzra bin de na Babilɔn, ɛn i yɛri se di tɛmpul nɔ fayn igen. So yu no wetin i du?

Ɛzra go to di kiŋ fɔ Pashya we nem Atazaksis. Ɛn dis gud kiŋ gi Ɛzra bɔku fayn fayn tin dɛn fɔ kɛr go na Jerusɛlɛm. Ɛzra tɛl di Izrɛlayt dɛn we de na Babilɔn fɔ ɛp am kɛr dɛn tin ya go na Jerusɛlɛm. Na lɛk 6,000 pipul dɛn so go wit am. Dɛn gɛt plɛnti silva ɛn gold, ɛn ɔda tin dɛn we gɛt valyu, fɔ kɛr go na Jerusɛlɛm.

Ɛzra bin de fred bikɔs bad pipul dɛn bin de na di rod. Dɛn bad pipul ya go pul di silva ɛn gold na dɛn an ɛn kil dɛn. So Ɛzra kɔl ɔl di pipul dɛn. Dɔn dɛn pre to Jiova fɔ lɛ i de wit dɛn we dɛn de go na Jerusɛlɛm. Na dat yu de si na di pikchɔ.

Jiova bin de wit dɛn. Ɛn afta 4 mɔnt, dɛn rich na Jerusɛlɛm ɛn natin nɔ du dɛn. Wetin dis de tich wi? I de tich wi se Jiova go ɛp wi if wi abop pan am.