Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 59

Wetin Mek Devid Rɔnawe

Wetin Mek Devid Rɔnawe

AFTA Devid kil Golaya, di bigman fɔ ɔl di sojaman dɛn na Izrɛl we nem Abna, kɛr Devid go to Sɔl. Sɔl gladi fɔ Devid. I mek Devid bigman fɔ sɔm pan in sojaman dɛn, ɛn Sɔl mek Devid kam de na in os.

Leta we Sɔl ɛn in sojaman dɛn kɔmɔt fɛt di Filistin dɛn, di uman dɛn bigin siŋ se, Sɔl dɔn kil bɔku Filistin dɛn, bɔt Devid dɔn kil bɔku bɔku Filistin dɛn. Dis mek Sɔl jɛlɔs Devid bikɔs di pipul dɛn rɛspɛkt Devid pas am. Bɔt Jonɛtan we na Sɔl in pikin, nɔ bin jɛlɔs Devid. I lɛk Devid bad, ɛn Devid insɛf lɛk Jonɛtan. So dɛn prɔmis dɛnsɛf se, dɛn go bi padi te go.

Devid sabi ple myuzik wit wan tin we dɛn de kɔl ap. Ɛn Sɔl lɛk di myuzik we Devid kin ple. Bɔt wan de, Sɔl jɛlɔs Devid te i want kil am. We Devid bin de ple di ap, Sɔl tek wan shap tin we dɛn de kɔl spia ɛn sɛn am pan Devid, ɛn tɔk se: ‘A go mek Devid fasin na di wɔl wit dis spia!’ Bɔt Devid balans, ɛn di spia mis am. Wan ɔda tɛm, Sɔl mis fɔ kil Devid wit in spia. So Devid no se i fɔ tek tɛm naw.

Yu mɛmba wetin Sɔl bin prɔmis se i go gi di pɔsin we go kil Golaya? I bin se i go mek di pɔsin mared in gyal pikin. Bɔt Sɔl tɛl Devid fɔ kil fɔs 100 Filistin sojaman dɛn bifo i go mek Devid mared in gyal pikin we nem Maykal. Sɔl bin fil se di Filistin dɛn go kil Devid. Bɔt dɛn nɔ ebul kil am, so Sɔl mek Devid mared in gyal pikin.

Wan de, Sɔl tɛl Jonɛtan ɛn ɔl in savant dɛn se i want kil Devid. Bɔt Jonɛtan tɛl in papa se: ‘Nɔ du Devid bad. I nɔ wan de du yu bad. Bɔt ɔl di tin dɛn we i dɔn du, na fɔ ɛp yu. Pan ɔl we Devid no se Golaya bin fɔ kil am, i stil go fɛt am. Ɛn yusɛf bin gladi we i kil Golaya.’

Sɔl lisin to in pikin ɛn prɔmis se i nɔ go du bad tin to Devid. So Devid kam de bak na Sɔl in os ɛn bigin wok fɔ am. Bɔt wan de we Devid bin de ple myuzik, Sɔl sɛn in spia bak pan Devid. Devid balans, ɛn di spia go chuk di wɔl. Na di tɔd tɛm dis we Sɔl de tray fɔ kil Devid! So Devid no naw se i fɔ rɔnawe.

Da nɛt de, Devid go na in yon os. Bɔt Sɔl sɛn sɔm man dɛn fɔ go kil Devid. Maykal no wetin in papa want du, so i tɛl in man se: ‘If yu nɔ kɔmɔt naya dis nɛt, tumara dɛn go kil yu.’ Da sem nɛt de, Maykal ɛp Devid fɔ rɔnawe. I mek Devid pas na winda. Devid bin de ayd na difrɛn difrɛn say dɛn fɔ lɛk sɛvin ia so fɔ mek Sɔl nɔ kech am.