Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 75

Daniɛl ɛn in Tri Padi Dɛn

Daniɛl ɛn in Tri Padi Dɛn

KIŊ Nɛbukanɛza kɛr ɔl di Izrɛlayt dɛn we sabi buk bɛtɛ bɛtɛ wan, na Babilɔn. Dɔn, di kiŋ pik di yɔŋ man dɛn we fayn ɛn we gɛt sɛns pas ɔl di ɔda wan dɛn. Na sɔm pan dɛn dis na di pikchɔ. Di wan nem Daniɛl, ɛn di pipul dɛn na Babilɔn de kɔl di ɔda wan dɛn Shedrak, Mishak ɛn Abɛdnigo.

Nɛbukanɛza want mek dɛn tich di yɔŋ man dɛn fɔ lɛ dɛn ɛp am fɔ rul in Kiŋdɔm. We dɛn go dɔn tich dɛn fɔ tri ia, i go pik di wan dɛn we gɛt sɛns pas ɔl di ɔda wan dɛn. Na dɛn wan ya go de ɛp am fɔ sɔlv prɔblɛm dɛn na in kiŋdɔm. Di kiŋ want mek di bɔbɔ dɛn gɛt trɛnk ɛn wɛlbɔdi we dɛn go de tich dɛn. So i tɛl in savant dɛn fɔ gi dɛn bɔbɔ ya di sem tin dɛn we in ɛn in famili de it ɛn drink.

Luk Daniɛl na di pikchɔ. I de tɔk to di bigman fɔ Nɛbukanɛza in savant dɛn we nem Ashpinaz. Yu no wetin Daniɛl de tɛl am? Daniɛl de tɛl am se: ‘Duya lɛ wi nɔ it di tin dɛn we di kiŋ de it.’ Dis mek Ashpinaz fred. I tɛl Daniɛl se: ‘Na di kiŋ dɔn tɛl mi wetin una fɔ it ɛn wetin una fɔ drink. Ɛn if una bɔdi nɔ fayn lɛk di ɔda yɔŋ man dɛn, sɔntɛm i go kil mi.’

So Daniɛl go to di man we Ashpinaz put oba in ɛn in tri padi dɛn. Daniɛl tɛl am se: ‘Duya tɛst wi fɔ tɛn dez. Mek wi it dɛn tin dɛn we pipul dɛn de plant fɔ it ɛn gi wi wata fɔ drink. Dɔn luk wi bɔdi ɛn di ɔda wan dɛn we de it di kiŋ in it, dɛn bɔdi, ɛn si udat in bɔdi go fayn pas in kɔmpin.’

Di man gri fɔ tɛst dɛn. We di tɛn dez dɔn, Daniɛl ɛn in tri padi dɛn bɔdi fayn pas ɔl di ɔda wan dɛn bɔdi. So di man we de oba dɛn mek dɛn kɔntinyu fɔ it di tin we pipul dɛn de plant fɔ it.

We di tri ia dɔn, dɛn kɛr ɔl di yɔŋ man dɛn go to Nɛbukanɛza. We Nɛbukanɛza tɔk to dɛn dɔn, i si se Daniɛl ɛn in tri padi dɛn gɛt sɛns pas ɔl di ɔda yɔŋ man dɛn. So i mek dɛn de wit am fɔ ɛp am fɔ rul in kiŋdɔm. Ɛnitɛm we i aks dɛn ɛnitin, dɛn kin ansa kɔrɛkt wan. Dɛn ansa dɛn kin kɔrɛkt fafawe pas ɔl di sɛnsman dɛn na Babilɔn.