Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 73

Di Las Gud Kiŋ we Rul na Izrɛl

Di Las Gud Kiŋ we Rul na Izrɛl

JOSAYA bin ol et ia we i bi kiŋ fɔ di kiŋdɔm we gɛt tu trayb. I bin tu smɔl fɔ bi kiŋ. So we i bigin rul fɔs, na sɔm bigman dɛn bin de ɛp am fɔ rul di pipul dɛn.

We Josaya dɔn rul fɔ sɛvin ia, i tray fɔ no mɔ bɔt Jiova. I falamakata sɔm gud kiŋ dɛn lɛk Devid, Jɛoshafat ɛn Ɛzikaya. We Josaya bin stil yɔŋ, i du sɔntin we sho se i gɛt maynd.

I dɔn te we bɔku Izrɛlayt dɛn de du bad bad tin dɛn. Dɛn de wɔship lay lay gɔd dɛn, ɛn dɛn de butu to aydɔl dɛn. So Josaya ɛn in man dɛn go ɛn pwɛl pwɛl ɔl di tin dɛn we di pipul dɛn de yuz fɔ wɔship dɛn lay lay gɔd dɛn. Dis nɔ bin izi bikɔs bɔku pipul dɛn bin de wɔship lay lay gɔd dɛn. Yu de si Josaya ɛn in man dɛn na di pikchɔ we dɛn de brok brok di aydɔl dɛn?

Afta sɔm tɛm, Josaya tɛl tri man dɛn fɔ mek di say dɛn we dɔn pwɛl na di tɛmpul. Di pipul dɛn gi mɔni ɛn dɛn man ya yuz am fɔ pe pipul dɛn fɔ du di wok. We dɛn de du di wok na di tɛmpul, di ay prist we nem Ilkaya, fɛn wan tin we impɔtant. Yu no wetin i fɛn? I fɛn di buk we gɛt di lɔ dɛn we Jiova bin mek Mozis rayt. I bin dɔn te we dis buk lɔs.

We dɛn kɛr di buk go to Josaya, i tɛl dɛn fɔ rid am. As Josaya de lisin we dɛn de rid di buk, i si se di pipul dɛn nɔ de du wetin de na Jiova in lɔ. Dis mek in at pwɛl. So i chɛr in klos lɛk aw yu de si na di pikchɔ. Na de i tɔk se: ‘Jiova dɔn vɛks pan wi bikɔs wi granpa dɛn nɔ bin de du wetin de na dis buk.’

Josaya tɛl Ilkaya fɔ go aks wetin Jiova de kam du to dɛn. So Ilkaya go aks wan uman prɔfɛt we nem Ulda. Di uman tɛl am se: ‘Jiova de kam pɔnish ɔl di pipul dɛn we de na Jerusɛlɛm bikɔs dɛn de wɔship lay lay gɔd dɛn, ɛn dɛn de du bad bad tin dɛn. Bɔt bikɔs Josaya dɔn du wetin gud, na afta i day Jiova go pɔnish di pipul dɛn.’