Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 57

Gɔd Pik Devid fɔ bi Kiŋ

Gɔd Pik Devid fɔ bi Kiŋ

YU DE si wetin dɔn apin naya? Dis yɔŋ man dɔn sev di smɔl ship na dis wayl animal in an. Dɛn kɔl dis animal ya bia. Di bia kam tek di ship ɛn kɛr am go fɔ go it am. Bɔt di yɔŋ man rɔnata di bia ɛn pul di ship na in mɔt. Dɔn, i ol di bia ɛn kil am. Wan ɔda tɛm, di yɔŋ man sev wan ship na wan layɔn in an. Dis yɔŋ man gɛt maynd, nɔto so? Yu no udat na in?

Na Devid. I de na wan tɔŋ we dɛn de kɔl Bɛtliɛm. Devid in granpa na Obɛd. Na Rut ɛn Boaz bɔn Obɛd. Yu mɛmba Rut ɛn Boaz? Devid in papa nem Jɛsi. Devid kin mɛn in papa in ship dɛn. Dɛn bɔn Devid tɛn ia afta Jiova pik Sɔl fɔ bi Kiŋ.

Wan de, Jiova tɛl Samiɛl se: ‘Tek da spɛshal ɔyl ɛn go na Jɛsi in os we de na Bɛtliɛm. A dɔn pik wan pan in bɔy pikin dɛn fɔ bi kiŋ.’ We Samiɛl si Jɛsi in fɔs bɔy pikin we nem Ilayab, i tɔk na in at se: ‘I go mɔs bi se na dis Jiova dɔn pik.’ Bɔt Jiova tɛl am se: ‘Nɔ luk aw i tɔl ɛn fayn. Nɔto in a dɔn pik fɔ bi kiŋ.’

So Jɛsi kɔl in ɔda pikin we nem Abinadab, ɛn kam wit am to Samiɛl. Bɔt Samiɛl tɛl am se: ‘Nɔto in Jiova dɔn pik.’ Dɔn Jɛsi kam wit in ɔda pikin we nem Shama. Bɔt Samiɛl tɛl am bak se: ‘Nɔto in Jiova dɔn pik.’ So Jɛsi kam wit sɛvin pan in bɔy pikin dɛn to Samiɛl, bɔt Jiova nɔ pik ɛniwan pan dɛn. So Samiɛl aks am se: ‘Na ɔl yu bɔy pikin dɛn dis?’

Jɛsi ansa am se: ‘Nɔ, i lɛf di las wan. Bɔt i dɔn go mɛn di ship dɛn.’ We dɛn kam wit Devid, Samiɛl si se in na fayn yɔŋ man. Jiova tɛl am se: ‘Na dis wan a dɔn pik. Tɔn di ɔyl na in ed.’ Ɛn na dat Samiɛl du. Bɔt nɔto naw Devid go bi kiŋ, di tɛm go kam we i go bi kiŋ na Izrɛl.