Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 54

Di Man We Gɛt Trɛnk Pas Ɔlman

Di Man We Gɛt Trɛnk Pas Ɔlman

YU SABI udat na di man we bin gɛt trɛnk pas ɔlman na di wɔl? Na in nem Samsin. In na bin jɔj. Na Jiova bin gi Samsin trɛnk. Bifo dɛn bɔn Samsin, Jiova tɛl in mama se: ‘I nɔ go tu te yu go bɔn bɔy pikin. Na in go sev di Izrɛlayt dɛn na di Filistin dɛn an.’

Di Filistin dɛn na bad pipul dɛn we bin de na Kenan. Dɛn gɛt bɔku fɛtman dɛn, ɛn dɛn bin de trit di Izrɛlayt dɛn bad. Wan de, we Samsin de go usay di Filistin dɛn de, i mit-ɔp wan big layɔn. Bɔt Samsin kil di layɔn wit in ɛmti an. Ɛn i kil bɔku Filistin dɛn bak.

Leta, Samsin lɛk wan uman we nem Dilayla. Di Filistin dɛn edman dɛn tɛl Dilayla se dɛn go gi am plɛnti mɔni if i tɛl dɛn wetin mek Samsin gɛt trɛnk. Dilayla want ɔl da mɔni de. I nɔ lɛk Samsin, ɛn i nɔ lɛk Gɔd in pipul dɛn. So i bin de aks Samsin ɔltɛm wetin mek i gɛt trɛnk.

Dilayla lɛf de aks Samsin te Samsin tɛl am wetin mek i gɛt trɛnk. Samsin tɛl am se: ‘Dɛn nɔ wan de kɔt mi ia. Frɔm di tɛm we a bɔn, Gɔd pik mi fɔ bi in spɛshal savant we dɛn kɔl Nazarayt. If dɛn kɔt mi ia, a nɔ go gɛt trɛnk igen.’

We Dilayla no dis, i mek Samsin slip na in fut. Dɔn i kɔl wan man fɔ kam kɔt Samsin in ia. We Samsin wek, i nɔ gɛt trɛnk igen. Di Filistin dɛn kam ol am. Dɛn bɔs in yay dɛn ɛn dɛn mek i bi dɛn slev.

Wan de, di Filistin dɛn bin gɛt wan big big pati fɔ wɔship dɛn gɔd we dɛn kɔl Degɔn. Dɛn pul Samsin na jel fɔ kam laf am. Bɔt Samsin in ia bin dɔn bigin fɔ gro bak. Samsin tɛl di bɔbɔ we ol in an, se: ‘Lɛ a tɔch di pila dɛn we mek dis os tinap.’ Dɔn Samsin pre mek Jiova gi am trɛnk. Na de i ol di pila dɛn ɛn ala lawd wan se: ‘Lɛ a day wit di Filistin dɛn.’ Na 3,000 Filistin dɛn bin de na di pati. We Samsin push di pila dɛn, di os fɔdɔm ɛn kil ɔl dɛn bad pipul ya.