Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 55

Wan Smɔl Bɔbɔ We Sav Gɔd

Wan Smɔl Bɔbɔ We Sav Gɔd

DIS bɔbɔ fayn, nɔto so? Na in nem Samiɛl. Ɛn di man we put in an na Samiɛl in ed nem Ilay. Na Ilay na di ay prist. Di ɔda man na Samiɛl in papa, na in nem Ɛlkena. Ɛn di uman na Samiɛl in mama, na in nem Ana. Dɛn kam wit Samiɛl to Ilay.

Samiɛl bin ol lɛk fɔ ɔ fayv ia so we dɛn kam wit am na Jiova in Os. Bɔt i de kam de na Jiova in Os wit Ilay ɛn di ɔda prist dɛn. Wetin mek Ɛlkena ɛn Ana mek Samiɛl kam de na Jiova in Os, pan ɔl we i smɔl so? Lɛ wi si.

Bifo Ana bɔn Samiɛl, in at bin pwɛl bad bikɔs i nɔ bin ebul bɔn pikin, ɛn i bin want pikin bad. So wan de, we Ana go na Jiova in Os, i pre se: ‘E Jiova, duya nɔ fɔgɛt mi! If yu gi mi bɔy pikin, a prɔmis se a go gi am to yu fɔ lɛ i sav yu te i day.’

Jiova ansa Ana in prea, ɛn i nɔ tu te Ana bɔn Samiɛl. Ana lɛk in pikin, ɛn i bigin tich am bɔt Jiova frɔm we i smɔl. I tɛl in man se: ‘As Samiɛl big smɔl so, a go kɛr am go na Jiova in Os fɔ lɛ i sav am de.’

Na dat wi de si Ana ɛn Ɛlkena de du na di pikchɔ. Bikɔs Samiɛl in mama ɛn papa dɔn tich am gud wan bɔt Jiova, i gladi fɔ kam de na Jiova in Os. Ɛvri ia, Ana ɛn Ɛlkena kin kam na Jiova in Os fɔ kam wɔship, ɛn fɔ kam fɛn Samiɛl. We Ana kin kam, i kin kam wit nyu klos we i mek fɔ Samiɛl.

Samiɛl kɔntinyu fɔ sav na Jiova in Os. Jiova ɛn di pipul dɛn lɛk am. Ilay in tu bɔy pikin dɛn we nem Ɔfni ɛn Finias, nɔ bin de du wetin fayn na Jiova in yay. Dɛn bin de du bɔku bad tin dɛn. Ɛn dɛn bin de mek ɔda pipul dɛn du wetin Jiova nɔ want. Ilay fɔ dɔn mek dɛn lɛf fɔ mek sakrifays fɔ pipul dɛn sin, bɔt i nɔ du am.

Bɔku bad tin dɛn bin de apin na Jiova in Os, bɔt dat nɔ mek Samiɛl lɛf fɔ sav Jiova. Ɛn bɔku pipul dɛn nɔ bin lɛk Jiova, so i bin dɔn te we Jiova tɔk to mɔtalman. We Samiɛl big smɔl, sɔntin apin.

Wan de, we Samiɛl de slip na Jiova in Os, i yɛri wan vɔys de kɔl am. I wek ɛn ansa se: ‘A de ya.’ So i grap ɛn rɔn go to Ilay, ɛn tɔk se: ‘A yɛri yu kɔl mi, so a dɔn kam.’

Bɔt Ilay tɛl am se: ‘A nɔ kɔl yu; go ledɔm bak.’ So Samiɛl go ledɔm bak.

Dɔn di vɔys kɔl di sɛkɔn tɛm: ‘Samiɛl!’ So Samiɛl grap ɛn rɔn go to Ilay bak. I se: ‘A yɛri yu kɔl mi, so a dɔn kam.’ Bɔt Ilay tɛl am se: ‘A nɔ kɔl yu, mi pikin. Go ledɔm bak.’ So Samiɛl go ledɔm bak.

Di vɔys kɔl di tɔd tɛm: ‘Samiɛl!’ So Samiɛl rɔn go to Ilay. I se: ‘Luk mi, dis tɛm ya, yu go mɔs dɔn kɔl mi.’ Ilay no wantɛm se na Jiova go mɔs dɔn de kɔl Samiɛl. So i tɛl Samiɛl se: ‘Go ledɔm bak, if i kɔl yu igen, tɔk se: “Jiova tɔk, yu savant de lisin.”’

So na dat Samiɛl tɔk we Jiova kɔl am bak. Jiova tɛl Samiɛl se i de kam pɔnish Ilay ɛn in tu bɔy pikin dɛn. Leta, Ɔfni ɛn Finias day we dɛn go fɛt di Filistin dɛn. We Ilay yɛri bɔt wetin dɔn apin, i fɔdɔm wit in bak ɛn brok in nɛk, ɛn insɛf day. So wetin Jiova bin tɔk dɔn bi.

We Samiɛl tɔn big man, na in bin bi di las jɔj we rul na Izrɛl. We i dɔn ol, di pipul dɛn tɛl am se: ‘Fɛn kiŋ we go rul wi.’ Samiɛl nɔ bin want du am, bikɔs na Jiova na dɛn kiŋ. Bɔt Jiova tɛl am mek i du wetin di pipul dɛn se.