Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 41

Di Snek we Dɛn Mek wit Kɔpa

Di Snek we Dɛn Mek wit Kɔpa

DA TIN de we rap rap pan da stik fiba tru tru snek, nɔto so? Bɔt nɔto tru tru snek. Na snek we dɛn mek wit kɔpa. Jiova tɛl Mozis fɔ put am pan di stik so dat we di pipul dɛn luk am, dɛn nɔ go day. Bɔt di ɔda snek dɛn we de na grɔn na tru tru snek dɛn. Dɛn dɔn bɛt di pipul dɛn ɛn dis dɔn mek di pipul dɛn sik. Yu no wetin mek di snek dɛn bɛt di pipul dɛn?

Na bikɔs di Izrɛlayt dɛn tɔk bad bɔt Gɔd ɛn Mozis. Dɛn grɔmbul se: ‘Wetin mek yu pul wi kɔmɔt na Ijipt fɔ mek wi kam day na dis ples? Natin nɔ de fɔ it ɛn wata sɛf nɔ de fɔ drink. Ɛn wi dɔn taya fɔ it dis mana.’

Bɔt di mana na fayn tin fɔ it. Na mirekul Jiova bin de du fɔ gi dɛn di mana. Ɛn i du mirekul bak fɔ gi dɛn wata. Bɔt di pipul dɛn nɔ bin de tɛl Gɔd tɛnki fɔ di tin dɛn we Gɔd bin de du fɔ dɛn. So Jiova sɛn dɛn bad bad snek ya fɔ pɔnish di Izrɛlayt dɛn. Di snek dɛn bɛt di pipul dɛn, ɛn bɔku pan dɛn day.

We ɔl dis de bi, di pipul dɛn go to Mozis ɛn tɛl am se: ‘Wi dɔn du bad we wi tɔk bad bɔt yu ɛn Jiova. Duya pre to Jiova lɛ i mek dɛn snek ya go.’

So Mozis pre to Jiova fɔ di pipul dɛn. Ɛn Jiova tɛl Mozis fɔ mek snek wit kɔpa. I tɛl Mozis fɔ put am pan wan stik, ɛn mek ɔl di wan dɛn we di snek dɛn dɔn bɛt, luk am. Mozis du ɔl wetin Gɔd tɛl am. Ɛn di pipul dɛn we di snek dɛn dɔn bɛt, luk di snek we Mozis mek wit kɔpa, ɛn dɛn wɛl.

Dis de tich wi sɔntin. Wi ɔl tan lɛk di Izrɛlayt dɛn we di snek dɛn bɛt. Ɛnisay yu luk tide, pipul dɛn de ol, sik ɛn day. Dis ɔl de apin bikɔs di fɔs man ɛn uman we na Adam ɛn Iv, nɔ bin du wetin Jiova want, ɛn na dɛn bɔn wi ɔl. Bɔt Jiova dɔn du sɔntin we go mek wi de sote go.

Jiova mek in pikin we na Jizɔs Krays, kam na di wɔl. Dɛn kil Jizɔs bikɔs bɔku pipul dɛn bin tink se in na pɔsin we bad. Bɔt Jiova sɛn Jizɔs fɔ kam sev wi. If wi falamakata am ɛn du di tin dɛn we i se, wi go gɛt layf we go de sote go. Wi go lan bɔku tin bɔt Jizɔs leta.