Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 4

Wetin Mek Gɔd Drɛb Dɛn

Wetin Mek Gɔd Drɛb Dɛn

LUK wetin de apin naw. Gɔd dɔn drɛb Adam ɛn Iv na di fayn gadin na Idɛn. Yu no wetin mek Gɔd drɛb dɛn?

Na bikɔs dɛn du wan bad tin. Na dat mek Jiova de pɔnish dɛn. Yu sabi di bad tin we Adam ɛn Iv du?

Dɛn du sɔntin we Gɔd tɛl dɛn nɔ fɔ du. Gɔd bin tɛl dɛn fɔ it di frut dɛn we di tik dɛn na di gadin de bia, bɔt dɛn nɔ fɔ it wan tik in frut. If dɛn it am, dɛn go day. Wi no se i bad fɔ tek sɔntin we dɛn dɔn tɛl wi nɔ fɔ tek, nɔto so? Yu tink se Adam ɛn Iv bin yɛri Gɔd in wɔd? Lɛ wi si.

Wan de, we Iv in wan bin de na di gadin, wan snek kam tɔk to am. I tɛl Iv fɔ it di frut we Gɔd bin dɔn tɛl dɛn nɔ fɔ it. Jiova nɔ mek snek dɛn fɔ tɔk. So dis min se na ɔda pɔsin mek di snek tɔk. Udat mek di snek tɔk?

Nɔto Adam mek di snek tɔk. So i go mɔs bi se na wan pan di pipul dɛn we Jiova bin dɔn mek lɔntɛm bifo i mek di wɔl. Dɛn pipul ya na enjɛl dɛn, ɛn wi nɔ de si dɛn. Wan pan dɛn enjɛl ya bigin fil big bɔt insɛf. I bigin tink se insɛf fɔ rul lɛk Gɔd. Ɛn i bin want mek pipul dɛn yɛri in wɔd, bɔt i nɔ bin want mek pipul dɛn yɛri Jiova in wɔd. Na in na di enjɛl we mek di snek tɔk.

Dis enjɛl bin ebul ful Iv. We di enjɛl tɛl Iv se if i it di frut i go tan lɛk Gɔd, Iv biliv am. So i it, ɛn Adam insɛf it. Adam ɛn Iv nɔ bin yɛri Gɔd in wɔd, ɛn na dat mek Gɔd drɛb dɛn na di fayn gadin usay dɛn bin de.

Bɔt wande wande, Gɔd go mek di wan ol wɔl fayn lɛk di gadin we bin de na Idɛn. Leta, wi go lan aw wisɛf go jɔynan fɔ mek di wan ol wɔl fayn lɛk di gadin we bin de na Idɛn. Bɔt naw, lɛ wi si wetin apin to Adam ɛn Iv afta Gɔd drɛb dɛn.