Go dayrɛkt to di men tin

Go dayrɛkt to di say we di difrɛn difrɛn atikul dɛn de

 STORI 8

Di Jayant dɛn we Bin De na di Wɔl

Di Jayant dɛn we Bin De na di Wɔl

WETIN yu go tink if yu si pɔsin we tɔl te i rich di silin na yu os? Da pɔsin de na jayant. Fɔstɛm, jayant dɛn bin de na di wɔl. Di Baybul se dɛn papa dɛn na enjɛl dɛn we kɔmɔt na ɛvin. Bɔt aw dis apin?

Mɛmba se, na Setan na di bad enjɛl we de nɔmɔ fɔ kɔz trɔbul. I ivin tray fɔ mek di ɔda enjɛl dɛn du bad. Tɛm bin kam we dɛn enjɛl ya bigin lisin Setan in wɔd. Dɛn lɛf fɔ du di wok we Gɔd gi dɛn fɔ du na ɛvin. Dɔn dɛn kam na di wɔl ɛn tɔn mɔtalman. Yu no wetin mek dɛn du so?

Di Baybul se na bikɔs dɛn enjɛl ya bin si fayn uman dɛn na di wɔl, ɛn dɛn bin want de wit dɛn. So dɛn kam ɛn mared dɛn uman ya. Di Baybul se dis tin we dɛn du na bad tin bikɔs Gɔd mek enjɛl dɛn fɔ de na ɛvin.

We dɛn enjɛl ya ɛn dɛn wɛf dɛn bɔn pikin dɛn, di pikin dɛn bin difrɛn. Fɔs, i nɔ bin tan lɛk se dɛn difrɛn. Bɔt we dɛn bin de gro, dɛn bin de gɛt ayt ɛn trɛnk smɔl smɔl te dɛn tɔn jayant.

Dɛn jayant ya bin bad. Bikɔs dɛn bin gɛt ayt ɛn trɛnk, dɛn bin jɔs de du bad to pipul dɛn. Dɛn bin de tray fɔ fos ɔlman fɔ du di bad tin dɛn we dɛn bin de du.

Bay dɛn tɛm ya, Inɔk bin dɔn day, bɔt wan ɔda gud man bin de na di wɔl. In nem na Noa. I bin de du wetin Gɔd tɛl am fɔ du ɔltɛm.

Wan de, Gɔd tɛl Noa se i de kam pul ɔl di bad pipul dɛn na di wɔl. Bɔt Gɔd go sev Noa ɛn in famili ɛn sɔm animal dɛn. Lɛ wi si aw Gɔd du dis.