JIFUNDE JA MU BAIBOLO: ‘Ilekelaingako mambo umvwe umo uji na mambo na mukwabo. Byonkatu Yehoba byo emulekejileko mambo, ne anweba byo byo mwafwainwa kubanga.’—Kolose 3:13.

Kilumbulula ka? Mu Baibolo bundengamambo buji nobe nkongole, kabiji kwilekelako mambo kuji nobe kufuuta nkongole. (Luka 11:4) Buku umo waambile’mba mu Binembelo, kyambo kya Kingiliki kyo batuntulula’mba ‘kulekelako mambo’ kilumbulula “kufuuta nkongole ne kubula kwambila muntu amba apane.” Onkao mambo, inge twalekelako mambo muntu, ko kuba’mba kechi tukeba aketubwezhezhe kintu ne. Inge twalekelako mambo bakwetu kechi kilumbulula’mba twaswisha kintu kyatama nangwa kukepesha bintu byatama byo betuba ne. Atweba kechi tukeba kulama kintu ku muchima nangwa kya kuba ‘umo uji na mambo’ ne atweba ne.

Nanchi kino kingila ne lelo jino nyi? Byo tuji bantu babula koloka, atweba bonse tulenga mambo. (Loma 3:23) Onkao mambo, twafwainwa kwikala na muchima wa kulekelako mambo bakwetu, mambo ne atweba juba jimo tukakeba bakwetu kwitulekelako mambo. Byonkabyo, inge twalekelako mambo bakwetu, tukamwenamo bintu byawama. Mu ñanyi jishinda?

Umvwe twatwajijilatu kuzhingila ne kubula kulekelako mambo bakwetu, ko kuba’mba tukekozhangatu ku muchima atweba bene. Kwikala na bino byubilo kwitulengelatu kubula kwikala na lusekelo, kufwa bukiji ne kwitulengela kubula kukasuluka mu bwikalo bwetu. Kabiji byakonsha ne kwitulengela kukolwa. Dokotala umo aye Yoichi Chida ne wafunda bilanguluka bantu aye Andrew Steptoe banembele mu sawakya wa American College of Cardiology amba: “Kikola kya muchima kiya na mambo a bukaji ne kuzhingila.”

Kabiji monai bintu byawama bifumamo mu kulekelako mambo bakwetu. Umvwe twalekelako mambo bakwetu, tukakwatankana ne kwikala mu mutende ne kwikala na bulunda bwakosa. Kyakilapo kunema ke kya kuba’mba tukekala byonka biji Lesa ulekelako mambo bandengamambo balapila, kabiji ukeba ne atweba kubanga byonka bino.—Mako 11:25; Efisesa 4:32; 5:1.