Nanchi bantu bafwa bakekala na bumi jibiji nyi?

MUKUMBU WA MU BAIBOLO: “Kimye kibena kwiya aba bonse baji mu bilende kyo bakomvwa jiwi [ja kwa Yesu] ne kufumamo.”Yoano 5:28, 29.

Yesu waambijile jimo kuba’mba, mu bukalama bwa Bufumu bwanji, baji mu Bilende bakafumamo. Fernando ye baambapo mu kibaaba kyafumako, waamba’mba, “nakuminye bingi kimye kitanshi kyo natangile Yoano 5:28, 29. Kyantundaikile bingi ne kundengela kulanguluka pa bintu bikobiwa kulutwe.”

Kala, Yoba muntu wa kishinka wayukile kuba’mba inge wafwa Lesa ukamusangula. Yoba waipwizhe’mba: “Umvwe muntu wafwa, nanchi wakonsha kwikala na bumi jibiji nyi?” Kabiji wakumbwile’mba: “Nkapembelelanga moba onse a mwingilo wami [mu Kilende] kufikatu ne byo nkakasuluka. Anweba mukangita, ne amiwa nketaba.”—Yoba 14:14, 15.

Lusanguko lwa kwa Lazalasa lwitulengela kuyuka bintu bikobiwa kulutwe

Mata nyenga ya kwa Lazalasa wayukile’mba kuji lusanguko. Lazalasa byo afwile, Yesu wamwambijile’mba: “Nkasobe usakusanguka.” Mata waambile’mba: “Nayuka namba ukasanguka mu juba jikapelako.” Kepo Yesu amwambijile’mba: “Amiwa yami lusanguko ne bumi. Awa wangitabila, nangwa wafwa, ukasanguka.” (Yoano 11:23-25) Ponkapotu Yesu wasangwile Lazalasa! Jino jishimikila jawama jitumwesha bintu byawama bikamweka kulutwe. Fwanyikizhai bantu babena kwibasangula ntanda yonse!

Nanchi kuji bantu bamo bo bakasangula kuya mwiulu nyi?

MUKUMBU WA MU BAIBOLO: Mambo a Lesa amwesha’mba lusanguko lwa kwa Yesu lwapusanako na lusanguko lwa bantu batanu na basatu bo banemba mu Baibolo. Aba bantu batanu na basatu bebasangwile ne kwikala na bumi pano pa ntanda. Pakuba lusanguko lwa kwa Yesu, tutanga’mba: “Yesu Kilishitu . . . waikala ku kilujo kya Lesa, mambo wayile mwiulu.” (1 Petelo 3:21, 22) Nanchi Yesu ye yenkatu ye basangwile kuya mwiulu nyi? Yesu wabuujile batumwa banji amba: “Umvwe naya ne kwimunengezhezha mpunzha, nkabwela jibiji ne kwimutambula, kuba’mba akwa ko nkekala, ne anweba mukekale konka.”—Yoano 14:3.

Kilishitu wayile mwiulu na kunengezha kwa kufikila baana banji ba bwanga. Aba bo bakasangula kuya mwiulu bakekala 144,000. (Lumwekesho 14: 1, 3) Pano abano baana banji ba bwanga bakoobanga ka kokwa?

 Bakekala na mingilo yavula bingi! Binembelo bitubuula’mba: “Ye wa lusekelo ne kuzhila awa ukekala mu lusanguko lutanshi; lufu lwa bubiji kechi luji na luusa pa bano ne, bino abo bakekala bañanga ba Lesa ne ba kwa Kilishitu kabiji bakekala bamfumu ne kulama pamo ne aye myaka 1,000.” (Lumwekesho 20:6) Aba bo bakasangula kuya mwiulu bakekala bamfumu ne bañanga ne kulama ntanda pamo ne Kilishitu.

Bañanyi bakwabo bo bakasangula?

MUKUMBU WA MU BAIBOLO: Binembelo byo banembele na lutangijilo lwa mupashi muji byambo byaambile mutumwa Paulo amba: “Naketekela mwi Lesa byonka byo baketekela ne abo kuba’mba, kukekala lusanguko lwa baoloka ne babula koloka.”Byubilo 24:15.

Mambo a Lesa etubuula’mba bantu bavula bafwa bakekala na bumi jibiji

Bañanyi bakekala pa bantu “baoloka” baambilepo Paulo? Akimonai kino. Danyela muntu wa kishinka bamwambijile ku mpelo ya bumi bwanji amba: “Ukalaala, pano bino ku mpelo ya moba akapelako ukabuuka ne kutambula mpunzha yobe.” (Danyela 12:13) Danyela ukasangukila pi? “Baoloka bakaswana ntanda, kabiji bakekalangamo myaka ne myaka.” (Salamo 37:29) Kabiji Yesu waambijile jimo amba: “Bo ba lusekelo aba bakooka michima, mambo bakaswana ntanda.” (Mateo 5:5) Danyela, banabalume ne banabakazhi ba kishinka bakebasangula ne kwikala jibiji na bumi pano pa ntanda myaka ne myaka.

Bañanyi bakekala pa bantu “babula koloka” baambilepo Paulo? Ke bantu bavula bingi bafwile kwa kubula kufunda ne kwingijisha bukine bwa mu Baibolo. Inge bebasangula, bakayuka ne kufunda pe Yehoba * ne Yesu. (Yoano 17:3) Aba bonse bafuukulapo kwingijila Lesa bakekala na bumi bwa myaka ne myaka byonkatu Yehoba byo aji na bumi.

Aba bonse bafuukulapo kwingijila Lesa bakekala na bumi bwa myaka ne myaka ne bumi bwawama kabiji bwa lusekelo

Bintu bikekala byepi pano pa ntanda?

MUKUMBU WA MU BAIBOLO: Lesa “ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne.(Lumwekesho 21:4) “Bakashimika mazubo ne kwikalamo, kabiji bakajimba miñanzañanza ne kuja bipangwa byayo.”—Isaya 65:21.

Fwanyikizhai kwikala bwikalo bwawama na balongo ne balunda nenu bakasanguka! Pano bino, bwipuzho ke bwa kuba’mba, mwakonsha kushiinwa byepi amba lusanguko lukekalako?

^ par. 15 Yehoba jo jizhina ja Lesa jiji mu Baibolo.