Janet waamba’mba: “Aku batata bafwatu, bamwatawami bambuujile’mba babena kusongola mwanamukazhi mukwabo. Kechi papichile ne kimye kyabaya ne, kwa kubula kundaya, balongolwele bivwalo byabo mo bebilaminanga ne kunsha na baana babiji.” Janet watwelele nkito yo bamufoleshangatu mali acheche a kukankalwa kubwezha nkongole ya nzubo ku banki. Kabiji wajinga ne na makatazho akwabo kechi kubulatu mali ne. Waamba’mba, “Bijikila byo twafwainwe kwikala nabyo bantu babiji, pa kwibinshila bunke byampezhezhe maana. Nepangamo mambo kuba’mba mbena kukankalwa kumwena bintu baana bami byonka byuba bansemi bakwabo. Ne lunotu mbena kulanguluka pa bakwetu byo bammona amiwa ne baana bami. Abya balanguluka’mba paji byo nafwainwe kuba pa kuba’mba ndame masongola ami nyi?”

Janet

Lulombelo lwakwasha Janet kukepeshako milanguluko ne kukosesha bulunda bwanji ne Lesa. “Bufuku po po kikilamo kunkatazha inge kwazhindama ne milanguluko yamvujila. Kulomba ne kutanga Baibolo ko kunkwasha kuba’mba ndaale. Kinembelo kinkwasha bingi ke Filipai 4:6, 7, kyaamba’mba: ‘Kange mubambishenga michima yenu na mambo a kintu nangwa kimo ne, bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba; kabiji mutende wa Lesa wakila milanguluko ya bantu ukalama michima ne milanguluko yenu.’ Ndomba bimye byavula bufuku kabiji mutende wa Yehoba untekenesha bingi.”

Byambo byaambile Yesu mu lulombelo lo alombele mu Jashi ja pa Mutumba jingila ku bijikila byonse, jaamba’mba: “Shenu wayuka bintu byo mukeba saka mukyangye ne kumulomba.” (Mateo 6:8) Kabiji twafwainwa kumulomba. Lulombelo jo jishinda jawama jo twakonsha kwingijisha ‘kufwenya kwipi ne Lesa.’ Ki ka kikafumamo inge saka tuba bino? “Ne aye ukafwenya kwipi ne anweba.”—Yakoba 4:8.

 Lulombelo lwitukwasha mu bintu byavula bingi kechi ku bijikilatu ne. Kabiji Yehoba ‘Umvwa milombelo,’ ukwasha bonse bamukeba na lwitabilo. (Salamo 65:2) O ene mambo Yesu o afunjishe baana banji ba bwanga “kulomba kimye kyonse kwa kubula kuleka.” (Luka 18:1) Twafwainwa kulombanga kwi Lesa kwitutangijila ne kwitukwasha, ne kuyuka’mba uketufweta na mambo a lwitabilo lwetu. Kechi twafwainwa kuzhinauka’mba ukakankalwa kwitukwasha ne. ‘Kulombanga kimye kyonse’ kumwesha’mba tuji na lwitabilo lwa kine.—1 Tesalonika 5:17.

BYO KILUMBULULA KWIKALA NA LWITABILO

Lwitabilo lo lu ka? Lwitabilo lulumbulula ‘kuyuka’ Lesa. (Yoano 17:3) Tuba bino inge saka tufunda milanguluko ya Lesa iji mu Baibolo. Tufundamo kuba’mba witumona atweba bonse kabiji ukeba kwitukwasha. Nangwa byonkabyo, lwitabilo lwa kine kechi kuyukatu Lesa ne. Kabiji lulumbulula ne kwikala na bulunda bwawama ne aye. Byonkatu byo tuba pa kuba’mba twikale na mulunda, kechi twakonsha kwibulenga juba jimo ne. Lwitabilo lwetu nalo “lukayanga na kukoma” byo tukafundanga pe aye ne kuba “bintu bimutokesha ku muchima,” ne byo tumona byo abena kwitukwasha. (2 Kolinda 10:15; Yoano 8:29) Aluno lo lwitabilo lwajingapo ne Janet lwamukwashishe kuyuka mwa kubila na bijikila.

Janet waamba’mba, “Kintu kyandengela kukosesha lwitabilo lwami ke kumona Yehoba byo ankwasha mu bwikalo bwami. Bimye byavula tumona nshiji yo betuba itulengela kubula kuyuka mwa kubila. Na mambo a kulomba, kimye kyonse Yehoba witukwashanga mu jishinda jo nabujile kuketekela. Kimye kyo ndomba kwi aye, mvuluka bintu byavula byo angubila. Kimye kyonse witukwasha pa kimye kyafwainwa. Kabiji wampa balunda ba kine, banabalume ne banabakazhi bena Kilishitu. Bankwasha kimye kyonse kabiji baikala ke bakufunjilako baana bami.” *

“Nayuka ene mambo Yehoba o aambila pa Malakai 2:16 amba: ‘Nashikwa kwikana.’ Ku mukwabo wa mu masongola wabula mambo, kimukola bingi ku muchima. Papita myaka yavula kufuma panshijile bamwatawami, pano bino ne luno kikinkola ku muchima. Inge natendeka kuvuluka bintu byo napitamo, ngubapo bintu bimo byakonsha kukwasha mukwetu, kino kinkwasha ne amiwa.” Kulondela jifunde ja mu Baibolo jakanya kwipaatula ku bakwetu, kwakwasha Janet kukepeshako bijikila. *Byambo bya Maana 18:1.

Lesa “ye shabo baana babula bashabo kabiji ye upokolola banabakazhi bafwilwa.”—Salamo 68:5

Janet waamba’mba, “Kintu kintekenesha ke kuyuka’mba Lesa ‘ye shabo baana babula bashabo kabiji ye upokolola banabakazhi bafwilwa.’ Aye kechi uketusha byonka byaubile bamwatawami ne.” (Salamo 68:5) Janet wayuka’mba Lesa kechi witweseka “na bintu byatama ne.” Pakuba aye upana maana “na muchima yense” ne kupana “bulume bwakila bwa bantu” kwitukwasha kuyuka mwa kubila na bijikila.—Yakoba 1:5, 13; 2 Kolinda 4:7.

Pano twakonsha kuba byepi inge twaikala na bijikila na mambo a kuba’mba bumi bwetu buji mu kizumba?

^ par. 10 Pa kuba’mba muyukilepo ne bikwabo mwa kubila na bijikila, monai mutwe wa kuba’mba “Nanchi Muji na Bulume pa Bumi Bwenu Nyi? mu Labainga! wa July 2015, uji ne pa keyala wa www.jw.org/kqn.