“Itabila mwi Nkambo Yesu, kabiji ukapuluka.”—Byubilo 16:31.

Abino byambo byawama bitekenesha, bebyambile kwi mutumwa Paulo ne Silasa kubuula kaili wajinga mu muzhi wa Filipai mu Makedonya. Nanchi bino byambo byatala mu ka? Pa kuba’mba tumvwishe kwitabila mwi Yesu byo kwakwatankana na kwitupokolola ku lufu, patanshi twafwainwa kuyuka ene mambo o tufwila. Monai bifunjisha Baibolo.

Bantu kechi bebalengele’mba bakafwenga ne

“Yehoba Lesa wabikile muntu mu bujimi bwa Edena kuba’mba ebujimenga ne kwibulama. Kabiji Yehoba Lesa wakambizhe muntu amba: ‘Ku bichi byonse bya mu bujimi wakonsha kujako monka mo usakila. Bino ku kichi kya kuyuka byawama ne byatama, kechi wafwainwa kujako ne, mambo mu juba jo ukajako, kine ukafwa.’”—Ntendekelo 2:15-17.

Lesa wabikile muntu mutanshi, Adama mu bujimi bwa Edena, paladisa wa pano pa ntanda mwavujile banyama ne bichi byawama. Mwajinga bichi byapanganga bipangwa Adama byo afwainwe kujangako ponse po akebela. Nangwa byonkabyo, Yehoba Lesa waambijile Adama kubula kuja ku kichi kimo, kabiji wamusopeshe’mba inge akajeko, ukafwa.

Nanchi Adama wayukile ene mambo o bamukainye nyi? Wayukile lufu byo luji; mambo wamonanga banyama na kufwa. Inge Adama bamulengele kuba’mba ukafwa, ko kuba’mba inge kechi kyayijilemo Lesa kumukanya kujako ne. Adama wavulukile’mba umvwe wakookejile Lesa ne kubula kuja ku kyokya kichi, inge waikele myaka ne myaka kwa kubula kufwa.

Bamo bamba’mba akya kichi kyaimenejilengako kwilaala, buno ke bubela bufiita. Bino Yehoba wakebelenga Adama ne mukazhanji Evwa amba ‘basemenga ne kusemununa, kuyuzha ntanda ne kwiijima.’ (Ntendekelo 1:28) Kintu kyo ebakainye kujako kyajinga kichi. Yehoba wikitongwele’mba “kichi kya kuyuka byawama ne byatama” mambo kino kichi kyaimenejilengako luusa lwanji lwa kukwasha bantu kuyuka kintu kyawama nangwa kyatama. Umvwe Adama wabujile kuja ku kipangwa kya ku kyokya kichi, inge wamwesheshe lukookelo ne lusanchilo lwanji ku wamulengele kabiji wamupele bintu byonse byawama.

Adama wafwile mambo kechi wakookejile Lesa ne

“Lesa waambijile Adama amba: ‘Na mambo a kuba waji . . . kuja ku kichi kyo nakukambizhe, . . . mu jisulwila ja mu kilungi kyobe mo mo ukamwenanga shinkwa wobe kufikatu ne kimye kyo ukabwela ku mushiji, mambo ku mushiji ko ko wafumine. Mambo wi lukungu ne ku lukungu ko ko ukabwela.’”—Ntendekelo 3:17, 19.

 Adama wajiile ku kichi kyo bamukainye kujako. Kintu kyo aubile ajinga mambo akatampe bingi. Bwajinga bunsatuki, wakaine bintu byonse byawama Yehoba byo amubijile. Kuja ku kipangwa kwamwesheshe’mba Adama wakaine Yehoba kumutangijila ne kwisajilapo mwine bya kuba, kintu kyo aubile mwafuma makatazho akatampe.

Byonkatu byaambile Yehoba, Adama wafwile. Lesa walengele Adama “na lukungu lwa panshi” kabiji wamubuujile’mba “ukabwela ku mushiji.” Adama kechi watwajijile kwikala mumi nangwa kuya ku mpunzha ikwabo ne. Byo afwile kechi waikele mumi ne, waikele byonkatu byajinga lukungu lo bamufumisheko.—Ntendekelo 2:7; Musapwishi 9:5, 10.

Tubena kufwa mambo twafuma kwi Adama

“Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.”—Loma 5:12.

Milengulwila ya kwa Adama nangwa’mba bundengamambo mwafuma bintu byatama bingi. Adama byo alengele mambo, wiletejile aye mwine makatazho, kechi kwikalatu myaka 70 nangwa 80 ne, bino kechi waikele myaka ne myaka ne. Kabiji Adama byo alengele mambo, koloka kwapwile kabiji wasambwisheko kubula koloka kwanji ku baana banji bonse.

Atweba bonse twi baana ba kwa Adama. Kwi aye ko ko twatambula mubiji wabula koloka ulenga mambo ne kufwa. Paulo walumbulwile bingi bulongo lukatazho lo tujimo. Wanembele’mba: “Amiwa nemuntunshi ye bapotesha ku bundengamambo. Amiwa kamulanda! Ñanyi ukampokolola ku uno mubiji ubena kuya ku lufu?” Paulo wakumbula mwine buno bwipuzho amba: ‘Nsanchila Lesa kupichila mwi Yesu Kilishitu Nkambo yetu!’—Loma 7:14, 24, 25.

Yesu wapaine bumi bwanji kuba’mba tukekale myaka ne myaka

“Tata watumine Mwananji kwikala Mupulushi wa ba pano pa ntanda.”—1 Yoano 4:14.

 Yehoba Lesa wanengezhe jishinda ja kwitupokolwelamo ku bundengamambo ne lufu. Waubile byepi? Watumine Mwananji kufuma mwiulu kuba’mba asemwe kwikala muntu waoloka byonkatu byajinga Adama. Bino kupusanako ne Adama, Yesu “kechi walengelepo mambo ne.” (1 Petelo 2:22) Byo ajinga waoloka, kechi wafwainwe kufwa ne, aye wafwainwa kwikala muntu waoloka myaka ne myaka.

Nangwa byonkabyo, Yehoba waswishishe Yesu kuba’mba bamwipaye ku balwanyi banji. Byo papichile moba asatu, Yehoba wamusangwile kwikala kilengwa kya mupashi ne kubwela jibiji mwiulu. Yesu wapaine kitapisho kya bumi bwanji bwanema kwi Lesa kubwezha pa bintu Adama byo aelele kuvwangakotu ne baana banji. Yehoba watambwijile kino kitapisho, ne kwamba’mba bonse baketabila mwi Yesu, bakekala na bumi bwa myaka ne myaka.—Loma 3:23, 24; 1 Yoano 2:2.

Yesu wabwezha bintu byawama byaelele Adama. Witufwijile kuba’mba tukekale na bumi bwa myaka ne myaka. Baibolo waamba’mba: “Yesu . . . wafwile, pa kuba’mba mu lusa lukatampe lwa Lesa, atompele lufu bantu bonse.”—Bahebelu 2:9.

Kintu kyauba Yehoba kyamwesha byo atemwa bantu. Bunchibamambo bwanji bwaoloka bwalengejile bantu kubula kwikuula bene. Pano bino, butemwe ne lusa lwanji byamulengejile kufuukulapo mwine kupana Mwananji umotu kuba’mba akuule bantu.—Loma 5:6-8.

Yesu bamusangwile mu bafu, ne bantu bakwabo nabo bakebasangula

“Bino Kilishitu wasangwilwe mu bafu, ye mutanshi kusangulwa pa boba baponena mu tulo twa lufu. Mambo lufu byo lwaishile kupichila mu muntu umo, ne lusanguko lwa bafu nalo lwiya kupichila mu muntu umo. Byonkatu bantu bonse byo bafwa na mambo a kwa Adama, byonkabyo bonse bakasangulwa na mambo a Kilishitu.”—1 Kolinda 15:20-22.

Kwambatu kine, Yesu wajinga mumi kabiji wafwile, pano ñanyi bishinka bibena kumwesha’mba bamusangwile? Kishinka kikatampe ke kya kuba’mba Yesu byo bamusangwile wamwekele ku bantu bavula pa bimye byapusana pusana ne ku mapunzha apusana pusana. Kabiji wamwekele ne ku bantu kukila pa 500. Mutumwa Paulo wanembele bino mu nkalata yo anembejile bena Kolinda, waambile’mba bantu bamumwene bajinga bomi, kumwesha’mba bano bantu baambile bintu byo bamwene ne kumvwa.—1 Kolinda 15:3-8.

Paulo byo anembele’mba Kilishitu ye “nsomo” ya boba bo basangula kala, walumbulwilenga’mba kukekala ne bakwabo bo bakasangula. Yesu mwine waambile’mba kimye kibena kwiya “bonse baji mu bilende” kyo ‘bakafumamo.’—Yoano 5:28, 29.

Pa kuba’mba tukekale myaka ne myaka, twafwainwa kwitabila mwi Yesu

“Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”—Yoano 3:16.

 Byepelo bitanshi mu Baibolo byaamba pa kimye kyatendekele lufu ne Paladisa byo aonaikile. Kabiji byepelo byapelako mu Baibolo nabyo byaamba pa kimye lufu kyo bakelufumyapo ne Lesa byo akabwezha Paladisa pano pa ntanda. Abino bintu inge byaubiwa, bantu popo bakekala bulongo myaka ne myaka. Lumwekesho 21:4, waamba’mba: ‘Lufu kechi lukekalako jibiji ne.’ Pa kuba’mba tumvwishe mwatala uno mulaye, kyepelo 5 kyaamba’mba: “Bino byambo bya kishinka kabiji bya kine.” Bintu byonse byalaya Yehoba ukebifikizha.

Nanchi mwaswa kuba’mba “bino byambo bya kishinka kabiji bya kine” nyi? Pano fundai bintu byavula pe Yesu Kilishitu ne kumwitabila. Inge mwauba bino, Yehoba ukemubila bibusa. Kechi mukekalatu na bintu byawama byonka luno ne, bino mukekala ne na bumi bwa myaka ne myaka mu Paladisa pano pa ntanda, “mukabula lufu, kabiji mabingo, kujila ne misongo kechi bikekalako jibiji ne.”