“Mambo a Lesa o omi.”—BAHEBELU 4:12.

NYIMBO: 37, 116

1. (a) Ñanyi mwingilo Lesa ye apele Adama? (b) Kufumatu kyokya kimye, bantu ba Lesa babena kwingijisha byepi buno bupe bwa mulaka?

YEHOBA LESA wapa bantu mulaka kwikala ke bupe. Mu bujimi bwa Edena, Lesa wapele Adama mwingilo wa kutumba banyama bonse mazhina. Adama watumbile nyama yense jizhina jamufwainwa. (Ntendekelo 2:19, 20) Kufumatu kyokya kimye, bantu ba Lesa bengijisha mulaka kutotelamo Yehoba ne kubuulako bakwabo pe aye. Mu ano moba, bantu ba Lesa babena kwingijisha buno bupe kutuntulula Baibolo pa kuba’mba bantu bavula bafunde pe Yehoba.

2. (a) Ñanyi mafunde alondejile ba mu Kavoto ka Bantuntuluzhi ba Baibolo wa Ntanda Ipya pa kutuntulula? (b) Tusakufunda pa ka mu uno mutwe?

2 Ma Baibolo beatuntulula mu milaka yavula bingi, bino amo beatuntulula bingi bulongo kukila akwabo. Pa kuba’mba batuntulule Baibolo bulongo, Kavoto ka Bantuntuluzhi ba Baibolo wa Ntanda Ipya kafuukwilepo kulondela mafunde anema asatu: (1) Kunemeka jizhina ja Lesa ne kwijingijisha bimye byavula mu Mambo anji byonka byo bejingijishe mu binembelo bitanshi. (Tangai Mateo 6:9.) (2) Kutuntulula byambo biji mu  binembelo bitanshi kyambo pa kyambo inge kyakonsheka. Po kyabula kukonsheka, kutuntulula mwayila mulanguluko. (3) Kwingijisha mulaka wapela kutanga ne kumvwa. * (Monai tubyambo twa munshi.) (Tangai Nehemiya 8:8, 12.) Ano mafunde asatu o o balondela bantuntuluzhi ba Baibolo wa Binembelo bya Ntanda Ipya mu milaka kukila pa 130. Mu uno mutwe, tusakufunda pa byo balondejile ano mafunde mu Baibolo wa Binembelo bya Ntanda Ipya ye bapitulukamo wa mu 2013, ne byo bamutuntulula mu milaka ikwabo.

BAIBOLO UNEMEKA JIZHINA JA LESA

3, 4. (a) Bisopelo bina bitelwa’mba Tetragrammaton bitaanwa pi? (b) Bantuntuluzhi bavula ba Baibolo bauba byepi na jizhina ja Lesa?

3 Jizhina ja Lesa bejinemba na bisopelo bina bya Kihebelu bitelwa’mba Tetragrammaton. Twakonsha kutaana bino bisopelo bina mu mamanyusikilipiti a kala a Kihebelu, nabiji mu Mivungilo ya mu Kalunga Kafwa. Kabiji bitaanwa ne mu ma Septuagint amo a Kingiliki. Ano ma Septuagint anembelwe myaka 200 Kilishitu saka akyangye kusemwa kufika ku myaka 100 kufuma pasemekejilwe Kilishitu. Bantu bavula bakumya bingi inge bamona jizhina ja Lesa byo jitaanwa bimye byavula mu mamanyusikilipiti a kala.

Bantu bavula bakumya bingi inge bamona jizhina ja Lesa byo jitaanwa bimye byavula mu mamanyusikilipiti a kala

4 Kwa kubula nangwa kuzhinaukatu ne, jizhina ja Lesa jafwainwa kutaanwa mu Baibolo. Pano bino, mu ma Baibolo avula kechi muji jizhina ja Lesa ne. Kya kumwenako, byo papichiletu myaka ibiji kufuma po balupwijile Baibolo wa Binembelo bya Ntanda Ipya bya Kingiliki bya Bwina Kilishitu, banembi bakwabo balupwile Baibolo wa American Standard Version ye bapitulukamo. Baibolo wabo wa mu 1901 waingijishe jizhina ja Lesa, bino mu uno Baibolo wabo wa mu 1952 ye bapitulukilemo, bejifumishemo. Mambo ka? Bantuntuluzhi ba uno Baibolo balangulukile’mba “kechi kyayilamo nangwa pacheche” kwingijisha jizhina ja Lesa ne. Ne mu ma Baibolo avula a Kizungu ne a milaka ikwabo namo bejifumyamo.

5. Mambo ka o kyanemena kwingijisha jizhina ja Lesa mu Baibolo?

5 Nanchi kyanema bantuntuluzhi kwingijisha jizhina ja Lesa nyi? Ee kyanema. Yehoba, mwine Nembi wa Baibolo ukeba bantu kuyuka jizhina janji. Ntuntuluzhi wawama wafwainwa kuyuka kine kintu kibena kukeba mwine wanembele yewo buku, ne kutuntulwila monkamo. Binembelo byavula bimwesha’mba jizhina ja Lesa janema kabiji twafwainwa kwijinemeka. (Kulupuka 3:15; Salamo 83:18; 148:13; Isaya 42:8; 43:10; Yoano 17:6, 26; Byubilo 15:14) Kabiji Yehoba watangijile banembi ba Baibolo kwingijisha jizhina janji bimye byavula bingi mu mamanyusikilipiti a kala. (Tangai Ezikyo 38:23.) Onkao mambo, inge bantuntuluzhi bafumyamo jizhina ja Lesa, ko kuba’mba kechi bamunemeka Yehoba ne.

6. Mambo ka jizhina ja Lesa o bejinungijileko bimye bitanu na kimo mu Baibolo wa Binembelo bya Ntanda Ipya ye bapitulukamo?

 6 Lelo jino, kuji bishiino byavula bimwesha’mba twafwainwa kwingijishanga jizhina ja Yehoba. Baibolo wa Binembelo bya Ntanda Ipya ye bapitulukamo wa mu 2013 waingijisha jizhina ja Lesa bimye 7,216. Ko kuba’mba bejingijisha bimye bikwabo 6 kununga pa byo bejingijishe mu Baibolo wa kala. Bimye bitanu byo banungako po baingijisha jizhina ja Lesa bebitaine mu Mivungilo ya mu Kalunga Kafwa yo basolola katataka. * (Monai tubyambo twa munshi.) Abino bimye batanu biji mu 1 Samwela 2:25; 6:3; 10:26; 23:14, 16. Kimye kya butanu na bumo kiji mu Mitonyi 19:18, kabiji bekinungileko panyuma ya kukebakeba mu mamanyusikilipiti a Baibolo a kala aketekelwa.

7, 8. Jizhina ja kuba’mba Yehoba jilumbulula ka?

7 Bena Kilishitu ba kine bamona kuba’mba kyanema kuyuka mwatala jizhina ja Lesa. Jizhina janji jilumbulula’mba “Ulengela Bintu Kwikalako.” * (Monai tubyambo twa munshi.) Kala mabuku etu alumbululanga jizhina ja Lesa kwingijisha kinembelo kya Kulupuka 3:14, kyaamba’mba: “Nkekala Monka mo Nkafuukwila Kwikala.” Baibolo ye bapitulukilemo wa mu 1984 walumbulwile’mba Yehoba wilengela aye mwine kwikela monka mo akebela pa kuba’mba afikizhe milaye yanji. * (Monai tubyambo twa munshi.) Pano bino, Baibolo ye bapitulukamo wa 2013 walumbulula’mba: “Nangwa kya kuba jizhina ja Yehoba jakonsha kuvwangamo uno mulanguluko, kechi jilumbululatu mo akonsha kwikela aye mwine ne. Javwangamo ne bintu byo alengela’mba byubiwe kutazha ku bilengwa byanji ne kuba kyaswa muchima wanji.”

8 Yehoba ulengela bilengwa byanji kwikela monka mo akebela. Kya kumwenako, Lesa walengejile Nowa kwikala ntungi wa kufiika bwato, Bezalela kwikala sendwe wa bya kulengalenga, Gidiona kwikala kilobo wayuka kulwa nkondo, ne Paulo kwikala mishonale. Jizhina ja Lesa janema bingi ku bantu banji, kabiji o ene mambo Kavoto ka Bantuntuluzhi ba Baibolo wa Ntanda Ipya o kabikijilemo jizhina ja Lesa mu uno Baibolo.

9. Mambo ka o kyanemena kutuntulula Baibolo mu milaka ikwabo?

9 Mu ma Baibolo avula bafumyamo jizhina ja Lesa. Bavula bengijisha kyambo kya kuba’mba “Nkambo” nangwa jizhina ja lesa wa bubela wayukanyikwa mu nyaunda yabo. Kino kyo kishinka kimo kyalengela Jibumba Jitangijila kumona’mba kyanema bantu ba milaka yonse kwikala na Baibolo unemeka jizhina ja Lesa. (Tangai Malakai 3:16.) Pa kino kimye, jizhina ja Yehoba babena kwijinemeka mu Baibolo wa Binembelo bya Ntanda Ipya uji mu milaka kukila pa 130.

BAIBOLO WATUNTULULWA BULONGO KABIJI WAPELA KUMVWA

10, 11. Ñanyi makatazho amo ajingako pa kutuntulula Baibolo wa Binembelo bya Ntanda Ipya mu milaka ikwabo?

10 Kwajinga makatazho avula pa kutuntulula Baibolo mu milaka ikwabo kwingijisha Baibolo wa Kizungu wa Binembelo bya  Ntanda Ipya. Kya kumwenako, Baibolo wa Kizungu waingijishe kyambo kya Kihebelu kya “Shelo” pa Musapwishi 9:10 ne mu byepelo bikwabo. Kino kyambo bekingijisha ne mu ma Baibolo akwabo a Kizungu. Pano bino, kino kyambo kechi bakonsheshe kwikingijisha mu milaka ikwabo ne mambo bantu bavula bamba ino milaka kechi bekiyuka kyambo kya Kihebelu kya “Shelo” ne. Mu madikishonale abo kino kyambo kifwamo, kabiji bamo balangulukanga’mba kampe jizhina ja mpunzha. Na mambo a bino, bantuntuluzhi bebaswishishe kutuntulula kyambo kya Kihebelu kya “Shelo” ne kyambo kya Kingiliki kya “Hadesi” amba “Kilende.” Ino yo ntuntulwilo yawama kabiji ilengela byambo kumvwanyika.

11 Kyambo kya “mweo” mu Kihebelu ne mu Kingiliki nakyo kyakatazhanga kwikituntulula mu milaka imo. Mu ino milaka, kino kyambo kya “mweo” javula kilumbulula’mba kipuku nangwa kintu kifuma mu muntu inge wafwa. Pa kuchinuzhuka luno lukatazho, bantuntuluzhi bebaswishishe kutuntulula kyambo kya “mweo” kwesakana na bibena kwambiwapo mu jojo jishimikila. Ndumbulwilo ya kyambo kya “mweo” ne monse mo kyatala mwakonsha kwiitaana mu bya kulumbulula mu Baibolo wa Kizungu wa New World Translation of the Holy Scriptures—With References. Byambo bya kwitukwasha kuyuka byambo bya Kihebelu ne Kingiliki bebibika mu tubyambo twa munshi mu Baibolo ye bapitulukamo pa kuba’mba kitupelelenga kutanga Baibolo ne kumvwisha.

Kimye kavoto kyo kapitulukilenga mu uno Baibolo, kapitulukile mu mepuzho avula aipwizhe bantuntuluzhi

12. Ñanyi lupimpu lukwabo lwaubiwe mu Baibolo ye bapitulukamo wa mu 2013?

12 Mepuzho aipwizhenga bantuntuluzhi  asolwele ne byambo bikwabo bya mu Baibolo bantu byo baumvwinanga mungi. Onkao mambo, mu September mu 2007, Jibumba Jitangijila jaswishishe kuba’mba batendeke kupitulukamo mu Baibolo wa Kizungu. Kimye kavoto kyo kapitulukilenga mu uno Baibolo, kapitulukile mu mepuzho avula aipwizhe bantuntuluzhi. Byambo bya Kizungu bya kala bebipingizhepo na byambo bya katataka, kino kyalengejile byambo kupela pa kwibitanga ne kwibyumvwa kwa kubula kulubankanya mulanguluko. Mwingilo wa kutuntulula waubiwa katataka papo naye wakwashisheko kuwamisha Baibolo wa Kizungu.—Byambo bya Maana 27:17.

BANTU BASANTA BINGI

13. Bavula bomvwa byepi pa Baibolo wa Kizungu ye bapitulukamo wa mu 2013?

13 Bavula bomvwa byepi pa Baibolo wa Kizungu wa Binembelo bya Ntanda Ipya ye bapitulukamo? Ofweshi mukatampe wa Bakamonyi ba kwa Yehoba uji mu Brooklyn, ku New York watambwila makalata a kusanta kufuma ku balongo ne banyenga. Bavula bomvwa byonka byaumvwine nyenga wanembele’mba: “Baibolo uji nobe kibokoshi kyayula na bya buneme. Kutanga byambo bya Yehoba biji mu Baibolo ye bapitulukamo wa mu 2013, twakonsha kwikufwanyikizha ku kutajisha kya buneme kimo kimo kibena kumweka bulongo, kyalezhima, kiji na musombelo wawama ne buya. Binembelo byo banemba mu mulaka wapela byankwasha kwikala na bulunda bwawama na Yehoba, kabiji waikala nobe nsemi wa mulume ubena kuntangila byambo byanji byawama saka ankumbachilamo.”

14, 15. Bantu bomvwa byepi pa Baibolo wa Binembelo bya Ntanda Ipya wa mu milaka ikwabo?

14 Bantu babula kwamba Kizungu bamba milaka ikwabo nabo basanta pa Baibolo wa Binembelo bya Ntanda Ipya. Mwanamulume wakikulumpe wikala mu Sofia ku Bulgaria waambile pa Baibolo wa mulaka wa Kibulgariani amba: “Natanga Baibolo pa myaka yavula, bino nkyangye kutangapo Baibolo wapela kumvwa kabiji ufika pa muchima nobe uno ne.” Kabiji nyenga wa ku Albania wanembele’mba: “Mambo a Lesa  abena kumvwanyika bingi bulongo mu Kialbaniani! Ke kintu kyawama bingi Yehoba kwisamba ne atweba mu mulaka wetu!”

15 Mu byalo byavula, ma Baibolo aji bingi na mutengo nangwa kukatazha kwiataana. Kutambwila Baibolo ke mapesho akatampe. Sawakya wafumine ku Rwanda waambile’mba: “Pa myaka yavula bantu bafundanga Baibolo na balongo kechi banungulukanga ne, mambo kechi bajinga na ma Baibolo ne. Kechi baikalanga na mali a kupota ma Baibolo o bapoteshanga mu machechi a ku mpunzha kwabo ne. Javula kechi baumvwishanga mwatala byepelo bimo ne, kabiji kino kibalengelanga kubula kununguluka.” Kimye kyalupukile Baibolo wa Binembelo bya Ntanda Ipya mu mulaka wabo, kisemi kimo kya mu Rwanda kiji na baana bana kyaambile’mba: “Twamusanchila bingi Yehoba ne kalume wa kishinka kabiji wa maana pa kwitupa Baibolo. Twi bayanji bingi kabiji kechi twajingapo na mali a kupotela yense wa mu kisemi Baibolo ne. Pano luno, bonse tuji na ma Baibolo. Pa kumwesha kusanta kwi Yehoba, kisemi kyetu kitangila pamo Baibolo pa juba pa juba.”

16, 17. (a) Yehoba ukeba amba bantu banji bobe ka? (b) Twafwainwa kwibikako kuba ka?

16 Baibolo wa Binembelo bya Ntanda Ipya ye bapitulukamo, kulutwe na lwendo bakamutuntulula ne mu milaka ikwabo. Satana ukebesha bingi kulekesha uno mwingilo, bino twayuka’mba Yehoba ukeba bantu banji bonse kumvwa byo abena kwamba mu mulaka wapela kumvwa. (Tangai Isaya 30:21.) Katatakatu “pano pa ntanda pakakumbana maana a kuyuka Yehoba byonkatu mema byo akumbana mu kalunga ka mema.”—Isaya 11:9.

17 Twayai twibikeko kwingijisha bya bupe byonse byafuma kwi Yehoba, kuvwangakotu ne uno Baibolo unemeka jizhina janji. Muswishai ambenga ne anweba pa juba pa juba kupichila mu Mambo anji. Aye uteleka ku milombelo yetu yonse. Kwisamba kwa uno mutundu kuketukwasha kuyuka bulongo Yehoba, kabiji tukamutemwa bingi.—Yoano 17:3.

“Ke kintu kyawama bingi Yehoba kwisamba ne atweba mu mulaka wetu!”

^ par. 2 Monai bya Kulumbulula A1 mu Baibolo wa Binembelo bya Ntanda Ipya.

^ par. 6 Mivungilo ya mu Kalunga Kafwa yabanda myaka 1,000 kukila manyusikilipiti wa Kihebelu wa Mazoleta.

^ par. 7 Mabuku amo byo byo alumbulula, bino kechi bashayuka bonse baswa ne.

^ par. 7 Monai New World Translation of the Holy Scriptures—With References, Appendix 1A mu mutwe wa kuba’mba “The Divine Name in the Hebrew Scriptures,” pa jipa 1561.