“Monai butemwe Tata bo etutemwa!”—1 YOANO 3:1.

NYIMBO: 91, 13

1. Mutumwa Yoano witutundaikile kulangulukanga pa ka, kabiji mambo ka?

MUTUMWA Yoano witutundaika kulangulukapo bingi pa butemwe bukatampe Yehoba bo etutemwa. Pa 1 Yoano 3:1 tutangapo’mba: “Monai butemwe Tata bo etutemwa!” Inge ke tulanguluke languluke pe Yehoba byo etutemwa ne byo amwesha’mba witutemwa, tufwenya kwipi ne aye ne kumutemwa bingi.

2. Mambo ka bamo o kibakatezha kuswa amba Lesa wibatemwa?

2 Kyatamakotu ke kya kuba’mba bantu bamo kibakatazha kuswa amba Lesa wibatemwa. Balanguluka’mba Lesa kechi wata bantu muchima ne. Kabiji balanguluka ne kuba’mba Lesa ulengatu muzhilo ne kukambula boba babula kwiilondela. Na mambo a mafunjisho a bubela, bamo balanguluka ne kuba’mba Lesa wakanama kabiji kechi kyakonsheka kumutemwa ne. Bakwabo nabo balanguluka’mba Lesa watemwa bantu bonse, kechi na mambo a bintu byo boba ne. Pano bino, kufunda  Baibolo kwimukwasha kuyuka bukine pe Yehoba. Mwayuka kuba’mba butemwe kyo kyubilo kyanji kikatampe kabiji wapaine Mwananji kwikala bukuzhi bwenu. (Yoano 3:16; 1 Yoano 4:8) Bino, na mambo a bintu byo mupitamo mu bwikalo, kyakonsha kwimukatazha kuswa amba Yehoba wimutemwa.

3. Ki ka kiketukwasha kuyuka Yehoba byo etutemwa?

3 Pa kuba’mba tuyuke Yehoba byo etutemwa, patanshi twafwainwa kuyuka’mba Yehoba ye witulengele. Ye witupele bumi. (Tangai Salamo 100:3-5.) O ene mambo Baibolo o aambila’mba muntu mutanshi wajinga “mwana wa kwa Lesa.” (Luka 3:38) Kabiji Yesu witufunjishe kutela Yehoba amba “Tata wetu wa mwiulu.” (Mateo 6:9) Onkao mambo, Yehoba ye Shetu, kabiji witutemwa byonka nsemi wa mulume wawama byo atemwa baana banji.

4. (a) Yehoba ye Shetu wa mutundu ka? (b) Tusakwisamba pa ka mu uno mutwe ne walondelapo?

4 Bantu bamo kibakatazha bingi kulanguluka’mba nsemi wa mulume ke muntu uji na butemwe. Apo kampe bavuluka byo bebayanjishanga ku bwanyike na mambo a kuba’mba bashabo bakanamine. Yehoba kechi wakonsha kuba bino ku baana banji ne. Ye Shetu wawama kukila bonse. (Salamo 27:10) Witutemwa bingi kabiji umwesha’mba wituta muchima mu mashinda avula bingi. Inge ketumvwe amba Yehoba witutemwa, ne atweba tukamutemwa bingi. (Yakoba 4:8) Mu uno mutwe, tusakwisamba pa mashinda ana Yehoba mo amweshesha’mba witutemwa. Kabiji mu mutwe walondelapo, tukesamba pa mashinda ana mo twakonsha kumweshesha’mba twamutemwa.

YEHOBA WITUTEMWA KABIJI MPANYI

5. Ñanyi bintu Lesa byo apa bantu bonse?

5 Mutumwa Paulo byo ajinga mu muzhi wa Atene mu Gilisi, wamwene’mba mwajinga bankishi bavula ne kuba’mba bantu baitabijile’mba bano balesa babo ba bubela bo bebapele bumi. Onkao mambo, wibabuujile pe “Lesa walengele ntanda ne byonse bijimo.” Waambile’mba Lesa “upa bantu bonse bumi, muya ne bintu byonse” ne kwamba’mba “aye ye ulengela’mba twikale na bumi ne kwenda.” (Byubilo 17:24, 25, 28) Yehoba witupa bintu byonse byo tukeba pa kuba’mba twikale na bumi ne kwikala na lusekelo. Langulukai pa bintu bimo byo etupa na mambo a kuba witutemwa.

6. Yehoba witupa ntanda iji byepi? (Monai kipikichala kitanshi.)

6 Kya kumwenako, Yehoba witunengezhezha ntanda yawama bingi ya kwikalamo. (Salamo 115:15, 16) Ntanda yawama bingi kukila mapulaneti onse. Basayansi bapitañana mu lwelele ne kutaanamo mapulaneti avula, bino bakankalwa kutaana pulaneti mukwabo mwakonsha kwikala bantu. Yehoba kechi witupatu bintu byo tukeba pa kuba’mba twikale na bumi ne, bino walengele ne ntanda yawama kabiji yazhikijilwa mo twakonsha kwikala na lusekelo. (Isaya 45:18) Inge twalanguluka pa ntanda yetu itupa Shetu aye Yehoba, kine tumvwa kuba’mba witutemwa bingi.—Tangai Yoba 38:4, 7; Salamo 8:3-5.

7. Jishinda Yehoba jo etulengejilemo jimwesha byepi amba witutemwa?

7 Jishinda jikwabo Yehoba mo amweshesha’mba witutemwa ke kwitulenga na byubilo  byo ajipo nabyo. (Ntendekelo 1:27) Kino kibena kulumbulula’mba twakonsha kumvwa amba witutemwa kabiji ne kumwesha byo twamutemwa. Wayuka’mba kino kyo kyakonsha kwitulengela kwikala na lusekelo lwa kine. Mambo nangwatu baana bekala bingi na lusekelo inge bayuka’mba bansemi babo bebatemwa. Kabiji vulukai’mba Yesu witufunjishe amba tukekala na lusekelo inge twafwenya kwipi na Shetu, aye Yehoba. (Mateo 5:3) Witupa “bintu byonse byo twatemwa.” Kine, aye mpanyi kabiji witutemwa bingi.—1 Timoti 6:17; Salamo 145:16.

YEHOBA WITUFUNJISHA BUKINE

8. Mambo ka o tukebela Yehoba kwitufunjisha?

8 Bansemi ba balume batemwa bingi baana babo kabiji kechi bakeba’mba muntu ebajimbaike nangwa kwibatwala mungi ne. Pano bino, bansemi bavula lelo jino bakana mizhilo ya mu Baibolo yaamba pa byawama ne byatama. Onkao mambo, bakankalwa kufunjisha bulongo baana babo,  kabiji kino kibaletela makatazho ne kubula lusekelo. (Byambo bya Maana 14:12) Pakuba Yehoba upa baana banji lutangijilo lwawama mambo aye ye “Lesa wa bukine.” (Salamo 31:5) Umvwa bulongo kwitufunjisha bukine pe aye. Kabiji witufunjisha bya kumupopwela ne kwitubuula jishinda jawama ja kwikelamo. (Tangai Salamo 43:3.) Ñanyi bintu Yehoba byo etufunjisha bimwesha’mba witutemwa bingi?

Bansemi ba balume bena Kilishitu balondela Yehoba kupichila mu kufunjisha baana babo bukine ne kwibakwasha kwikala balunda na Shabo wa mwiulu (Monai mafuka 8-10)

9, 10. (a) Mambo ka Yehoba o etubuujila pe aye mwine? (b) Ñanyi bintu byo etufunjisha pa kyaswa muchima wanji?

9 Kitanshi, Yehoba witubuula pe aye mwine. Ukeba’mba tumuyuke. (Yakoba 4:8) Onkao mambo, witubuula jizhina janji. Kabiji Baibolo watongola jizhina janji bimye byavula kukila mazhina akwabo. Yehoba witubuula ne byo aji. Inge twamona bintu byo alenga, tuyuka’mba uji na bulume ne maana. (Loma 1:20) Kabiji inge twatanga Baibolo, tufunda pa byo etutemwa ne byo abula misalululo. Inge twayuka byubilo byawama biji ne Yehoba, twikala balunda nanji.

Inge twayuka byubilo byawama biji ne Yehoba, twikala balunda nanji

10 Yehoba witufunjisha ne kyaswa muchima wanji. Witubuula’mba twi ba mu kisemi kyanji. Witubuula ne byo twafwainwa kuba pa kuba’mba twingijilenga pamo na bonse ba mu kisemi kyanji saka twakwatankana kabiji mu mutende. Baibolo umweshatu patoka amba Lesa kechi witulengele na luusa lwa kwifuukwila kyawama ne kyatama ne. (Yelemiya 10:23) Yehoba wayuka bintu byakonsha kwituwamina. Kabiji twakonsha kwikalatu na lusekelo ne mutende mu bwikalo inge twakookela lutangijilo lwanji. Yehoba witufunjisha buno bukine bwanema mambo witutemwa.

11. Shetu wa butemwe witubuulapo amba ka pa bwikalo bwa kulutwe?

11 Nsemi wa mulume uji na butemwe ulangulukishapo pa bikekala baana banji kulutwe. Ukeba’mba bakekalenga bulongo. Kyatamakotu ke kya kuba’mba bantu bavula luno bakamwa bingi mambo kechi bayuka bikamweka kulutwe ne, kabiji bavula bataya kimye kyabo kuba bintu bikabula ne kwibakwasha kulutwe na lwendo. (Salamo 90:10) Tumusanchila bingi Shetu, aye Yehoba, mambo kechi witufunjishatu bya kwikala na lusekelo luno ne, bino witulaya ne bwikalo bwawama kulutwe.

YEHOBA UTANGIJILA BAANA BANJI NE KWIBAFUNDAKO

12. Yehoba wakwashishe byepi Kaina ne Baluka?

12 Yehoba byo amwene’mba Kaina ukeba kuba kintu kyatama bingi, waesekele kumukwasha kupichila mu kumushikisha’mba: “Mambo ka o wazhingijila ne kumvwa ku muchima kutama? Umvwe ube byawama, nanchi kechi nsakukutemwa nenyi?” (Ntendekelo 4:6, 7) Kaina wakaine bukwasho bwa Yehoba, onkao mambo wamwene bya malwa. (Ntendekelo 4:11-13) Kimye kikwabo, Yehoba wamwene’mba Baluka walangulukilenga byatama byamulengejilenga kukooka ne kulefulwa. Onkao mambo, Yehoba waambijile Baluka amba wafwainwa kupimpula ndangulukilo  yanji mambo yatama. Baluka waumvwijile lujimuno lwa Yehoba ne kupulusha bumi bwanji.Yelemiya 45:2-5.

13. Bakalume ba Yehoba ba kishinka bafunjijileko ka ku meseko?

13 Yehoba witutangijila ne kwitufundako mambo witutemwa. Kechi witololakotu inge twalubankanya ne, bino witufunjisha ne byo twafwainwa kuba. (Bahebelu 12:6) Mu Baibolo tutangamo mashimikila a bakalume ba kishinka Yehoba bo afunjishe kwikala bantu bawama. Kya kumwenako, Yosefwa, Mosesa, ne Davida bapichile mu makatazho abaya bingi. Yehoba wajinga nabo kimye kyo bapichilenga mu ano makatazho. Kabiji bintu byo bafunjile kimye kyo bapichilenga mu ano makatazho bibakwashishe kimye Yehoba kyo ebapele mingilo ikatampe. Inge ketutange mu Baibolo Yehoba byo akwashishe ne kufunjisha bantu banji, tumvwa’mba Yehoba kine witutemwa bingi.—Tangai Byambo bya Maana 3:11, 12.

14. Yehoba umwesha byepi amba witutemwa inge twalubankanya?

14 Nangwatu inge twalubankanya, Yehoba utwajijila kwitutemwa. Inge twakookela byo abena kwitufundako ne kulapila, aye ‘uketulekelako mambo etu onsetu.’ (Isaya 55:7) Kino kyalumbulula’mba ka? Byambo byaambile Davida pe Yehoba byo alekelako mambo, bitumwesha’mba ke Shetu wa lusa. Waambile’mba: “Aye ukulekelako mambo obe onse ne kukubuka bikola byobe byonse; upokolola bumi bobe mu kimbo, kabiji ukuvwika butemwe bwanji bubula kwaluka ne lusa lwanji nobe munchinya. Byonkatu musela byo aji kwalepa na muzhika, byo byo abika kwalepa mizhilulwila yetu.” (Salamo 103:3, 4, 12) Yehoba witufundako ne kwitutangijila mu mashinda apusana pusana. Nanchi mupelawizha kukookela inge wimufundako nyi? Vulukainga’mba Yehoba witufundako mambo witutemwa.—Salamo 30:5.

YEHOBA WITUZHIKIJILA

15. Ñanyi jishinda jikwabo Yehoba mo amweshesha’mba witutemwa?

15 Nsemi wa mulume uji na butemwe uzhikijila kisemi kyanji ku bizumba. Abino byo byuba ne Shetu aye Yehoba. Nyimbi wa masalamo waambile pe Yehoba amba: “Aye uzhikijila bumi bwa bantu banji ba kishinka; wibapokolola mu kuboko kwa mubi.” (Salamo 97:10) Langulukai pa kino: Byonkatu byo mupelawizha kuzhikijila meso enu na mambo a kuba anema kwi anweba, Yehoba naye byo byo apelawizha kuzhikijila bantu banji mambo banema kwi aye.—Tangai Zekaliya 2:8.

Yehoba upelawizha kuzhikijila bantu banji mambo banema kwi aye

16, 17. Yehoba wazhikijile byepi bantu banji ba kala kabiji uzhikijila byepi ba mu ano moba?

16 Jishinda jimo Yehoba jo azhikijilemo bantu banji ba kala ne jo azhikijilamo ba mu ano moba ke kupichila mu bamalaika banji. (Salamo 91:11) Malaika umo waipayile bashilikale bena Asilya 185,000 mu bufuku bumotu ne kupokolola bantu ba Lesa. (2 Bamfumu 19:35) Mu myaka kitota kitanshi, bamalaika bapokolwele Petelo, Paulo, ne bakwabo bajinga mu kaleya. (Byubilo 5:18-20;  12:6-11) Katataka papo, kwajinga nkondo ikatampe mu kyalo kimo mu Africa. Mu kino kyalo mwajinga milukuchi na mambo a kulwa, bwivi, kulaala bantu kya kwibakanjikizha ne kwipayañana. Nangwa kya kuba kafwako mulongo wafwile ne, bavula bipe babyo byaonaikile. Pano bino, bonse bayukile’mba Yehoba wibatemwa ne kuba’mba wibata muchima. Nangwa kya kuba bapichile mu ano makatazho, batwajijile kwikala na lusekelo. Kimye mulongo waimenejilengako ofweshi mukatampe kyo aimwine bano balongo ne banyenga, bamukumbwile’mba: “Tujitu bulongo, kabiji tubena kusanchila Yehoba!”

17 Ibyo kuba’mba bakalume ba Yehoba bamo, nabiji mwana wa bwanga aye Setepena ne bakwabotu, bebepayile na mambo a bukishinka bwabo. Kechi kimye kyonse Yehoba kyo akanya bintu bya uno mutundu kubiwa ne. Pano bino, uzhikijila jibumba ja bantu banji kupichila mu kwibajimunako pa mashinda apusana pusana engijisha Satana kwibajimbaika. (Efisesa 6:10-12) Tutaana luno lujimuno mu Baibolo ne mu mabuku anengezha jibumba ja Yehoba. Kya kumwenako, witujimunako pa bubi buji mu bintu bimo bitaanwa pa intaneti, mu kutemwa mali, mu mafilimu amwesha bulalelale ne bukapondo, ne mu mabuku ne makayo atama. Kine, Yehoba witutemwa kabiji ukeba kwituzhikijila.

MUNEMA MUKATAMPE

18. Mumvwa byepi pa kuyuka’mba Yehoba wimutemwa?

18 Kimye Mosesa kyo alangulukile pa myaka yonse yo aingijile Yehoba, washiinwe’mba Yehoba wamutemenwe. Mosesa Waambile’mba: “Mu kimye kya lukelo, tumweshai butemwe bwenu bubula kwaluka, pa kuba’mba twimbenga na lusekelo ne kusangalala mu moba etu onse.” (Salamo 90:14) Twatokwa bingi pa kuyuka ne kumvwa’mba Yehoba witutemwa. Ke munema mukatampe bingi Yehoba byo etutemwa! Tumvwa byaumvwine mutumwa Yoano waambile’mba: “Monai butemwe Tata bo etutemwa!”—1 Yoano 3:1.