Makatazho akonsha kwitupezha kalango, kwitukokesha, ne kwitulengela kushikwa bumi. Mfumu Davida waikalanga bingi na makatazho. Pano waubanga byepi mu bimye bya makatazho? Davida wakumbula mu salamo ye aimbile na muchima yense amba: “Naita na jiwi jami kwi Yehoba; Na jiwi jami kwi Yehoba ko nasashijila. Ndondolola mambo ami ku meso anji; Ne kumwesha ku meso anji malwa ami. Muchima wami byo apungijile munda, Anweba mwayukile jishinda jami.” Davida walombanga Lesa kumukwasha.—Sala. 142:1-3.

Davida walombanga Yehoba kumukwasha mu bimye bya makatazho

Mu salamo mukwabo Davida waimbile’mba: “Kuji kintu kimo kyo nalomba kwi Yehoba, kyo kyonka kyo nkakebanga: Namba, ngikale mu nzubo ya Yehoba moba o nse a mweo wami, Mmonenga buya bwa Yehoba, Ne kulangulukalanguluka mu nzubo yanji yazhila.” (Sala. 27:4) Davida kechi wajinga mwina Levi ne, pano akimufwanyikizhai saka aimana pangye ya kipango kyazhila, mpunzha ya mpopwelo ya kine. Saka abena kusanta mu muchima kya kuba ubena kukeba ne kwikala monka moba onse a mweo wanji pa kuba’mba ‘amonenga buya bwa Yehoba.’

Kyambo kya “buya” kilumbulula kintu kyawama pa kwikimona, pa kwikikwata, nangwa pa kulangulukapo. Davida kimye kyonse wasantanga mu muchima pa kulanguluka pe Lesa byo anengezhezhe jishinda ja kumupopwelamo. Onkao mambo, twakonsha kwishikisha atweba bene amba, ‘Nanchi neumvwa byonka byaumvwanga Davida nyi?’

‘LANGULUKAINGA’ PA LUNENGEZHO LWA LESA

Mu ano moba Yehoba wanengezha jishinda ja kumusolomokelamo jabula kumvwangamo kishimikwa. Jino jishinda ajo javwangamo nzubo ya Lesa ya ku mupashi, ko kuba’mba lunengezho lwazhila lwa mpopwelo ya kine. * Inge ke ‘tulangulukelanguluke’ pa luno lunengezho, ne atweba tukamonanga “buya bwa Yehoba.”

Akilangulukai pa kyakusokelapo bitapisho kya mukuba kyajinga pa kibelo kya tente wa lusambakeno. (Lupu. 38:1, 2; 40:6) Kino kya kusokelapo bitapisho kyaimenangako kuswa Lesa ko aishile kuswa mulambo wa kwa Yesu wa bumi bwanji bwa bumuntu. (Hebe. 10:5-10) Akilangulukai pa byo kitukunza! Mutumwa Paulo wanembele’mba: “Twakijinga balwanyi, twapwaine ne Lesa kupichila mu lufu lwa Mwananji, pano byo twapwana, tukapulukila mu bumi bwa Mwananji.” (Loma 5:10) Kwikala na lwitabilo mu mashi a kwa Yesu aichikile kwitulengela kutalwa bulongo kwi Lesa ne kwituketekela byo tuji balunda nanji. Onkao mambo, ano mashi etulengela kwikala na “bulunda bwa pa muchima ne Yehoba.”—Sala. 25:14; NW.

‘Yehoba witukokolosha’ byo ‘azhimañanya’ mambo etu. (Byu. 3:19) Bwikalo bwa bantu twakonsha kwibwesakanya ku kaili waja nyenye ne kuleka byubilo byanji byatama saka bakyangye kumwipaya. Pa kumona bino, nchibamambo wa lusa wamulekelako mambo ne kumufumya pa mutanchi wa kumwipaya. Uno kaili muchima wanji ukokoloka kabiji umvwa bingi bulongo. Byonka biji uno nchibamambo, ne Yehoba naye ulekelako mambo bantu balapila ne kwibafumya pa bafwainwa lufu.

SANGALELAINGA MU MPOPWELO YA KINE

Bintu bikwabo bya mu bupopweshi bwa kine byamonanga Davida pa nzubo ya Lesa ke mabumba a bena Isalela aiyanga na kuteleka byo batanganga Mizhilo ne kwiilumbulula pa mvula bantu, kufutumuna binunka bulongo, ne byaingilanga bañanga ne  bena Levi mingilo yazhila. (Lupu. 30:34-38; Bala. 3:5-8; Mpitu. 31:9-12) Bino bintu byaubanga bena Isalela mu bupopweshi bwa kine bipasha na bibena kubiwa mu ano moba.

Byonka byo kyajinga kala, ne atweba tumona ‘byo kyawama ne byo kitutokela ku muchima inge balongo ne balongo baikala pamo na muchima umotu.’ (Sala. 133:1) Bantu bavula babena kwiya mu jibumba balengela “balongo betu” mwaya ntanda kuvula bingi. (1 Pe. 2:17) Mambo a Lesa beatanga ne kwialumbulula pa kupwila kwetu. Kupichila mu jibumba janji, Yehoba witunengezhezha mitanchi ya kwitufunjisha mikambizho yanji. Mabuku alumbulula Baibolo avula bingi a kwingijisha pa lufunjisho lwa pa bunke. Umo wa mu Jibumba Jitangijila waambile’mba: “Kulanguluka pa Mambo a Lesa, pa byo alumbulula ne kupesapesa pa kukeba kumvwisha mo atala kundengela kwikala munonshi ku mupashi kabiji kundetela bingi lusekelo pa juba pa juba.” Ibyo ‘kuyuka bintu kwituletela bingi lusekelo.’—Mana 2:10.

Mu ano moba, bapopweshi ba kwa Lesa milombelo yabo yaitabilwa iya kwi Yehoba pa juba pa juba. Ino milombelo kwi Yehoba ijitu nobe byakufutumuna biji na bwema bwawama. (Sala. 141:2) Kuyuka kuba’mba Yehoba Lesa umvwa bulongo kuteleka ku milombelo yetu kwituletela bingi lusekelo.

Mosesa walombele’mba: “Bibusa bya Yehoba Lesa wetu bikale pe atweba, ne mingilo ya maboko etu ilumbuluke. Kine, peshai mingilo ya maboko etu.” (Sala. 90:17) Yehoba upesha mwingilo wetu ye tubena kwingila na kizaku. (Mana 10:22) Kampe mwakwashapo bamo kufunda bukine. Nangwa kampe mwaingila mwingilo wa kusapwila pa myaka yavula na kuchinchika myendeleko, lumanamo ne bikola. (1 Tesa. 2:2) Nangwa byonkabyo, nanchi kechi mwamona “buya bwa Yehoba” ne kuyuka kuba’mba mubena kumutokesha bingi ku muchima Shetu wa mwiulu nenyi?

Davida waimbile’mba: “Yehoba kyo kyami kyangabilwapo, bo buswanyi bwami ne kitomeno kyami: Anweba yenu mulama kyami kyo bangabilapo. Mizhinge ya kupimako yantujilwa panengela.” (Sala. 16:5, 6) Davida wasanchile bingi pa ‘kyo bamwabijilepo,’ ko kuba’mba kwikala na bulunda bwawama ne Yehoba ne jishuko ja kumwingijila. Byonka byajinga bwikalo bwa kwa Davida, ne atweba nangwa tupite mu makatazho abaya byepi, tuji na mapesho avula bingi a ku mupashi. Onkao mambo, twayai atweba bonse tutwajijile kusangalela mu bupopweshi bwa kine ne ‘kulanguluka langulukanga’ kimye kyonse pa nzubo ya kwa Yehoba ya ku mupashi.

^ par. 6 Monai Kyamba kya Usopa kya Kibemba kya July 1, 1996, mapa 14-24.