YESU KECHI wajinga munonshi nangwa kalama ne. Kabiji kechi wajingapo na nzubo ya kyanji kyanji ne. Bino bintu byo afunjishanga byakwasha bantu bavula bingi. Nanchi Yesu Kilishitu kine wajingako nyi? Bashayuka ba mu ano moba ne bajingako kala baambapo’mba ka?

  • Shayuka unemba pa byaikalanga bantu kala, aye Michael Grant wanembele’mba: “Byonkatu byo tuswa mashimikila aji mu mabuku anemba bashayuka ba bya mpito, byo byo twafwainwa kuswa mashimikila aji mu mabuku a Lulayañano Lupya. Onkao mambo, twafwainwa ne kuswa kuba’mba Yesu wajingako, byonkatu byo tuswa amba bantu banembwa mu mabuku akwabo bajingako.”

  • Rudolf Bultmann, mufunjishi mukulumpe ufunjisha pa byanembwa mu mabuku a Lulayañano Lupya, wanembele’mba: “Kafwako bishinka byafwainwa kwitulengela kuzhinauka’mba Yesu kechi wajingako ne. Kafwako muntu uji na maana wakonsha kukana’mba Yesu ye watendekele jibumba jikatampe ja bupopweshi ne, kabiji batanshi kwikala mu jino jibumba ke [bena Kilishitu] baikalanga mu Pelisitina.”

  • Shayuka, aye Will Durant, wanembele’mba: “[Yesu] ke muntu wa kukumya, kabiji mingilo yanji ne byubilo byanji byatundaika bantu kufikatu ne lelo jino. Umvwe kya kuba banabalume banembele Mambo Awama basombeletu jishimikila ja kwa Yesu, kino kyakonsha kwikala kya kukumya kyakila ne bya kukumya byonse byanembwa mu Mambo Awama.”

  • Albert Einstein, Muyudea wasemekejilwe mu Germany, kabiji wajinga sendwe mu bya sayansi, waambile’mba: “Ne Muyudea, bino jonse nkumbwa bingi byajinga [Yesu].” Byo bamwipwizhe inge waitabila kuba’mba Yesu wajingako, Einstein wakumbwile’mba: “Kine wajingako. Muntu yense inge watanga Mambo Awama, wakonsha kumvwatu nobe ubena kumona Yesu. Byonse byanembwa pe aye bimwesha’mba wajinga muntu wa kine. Jishimikila ja kusombatu kechi jakonsha kwikala bino ne.”

    “Muntu yense inge watanga Mambo Awama, wakonsha kumvwatu nobe ubena kumona Yesu.”—Albert Einstein

 MABUKU ANEMBELWE KALA AAMBAPO’MBA KA?

Byavula byanembwa pe Yesu ne mwingilo wanji byanembwa mu Baibolo, mu mabuku atelwa’mba Mambo Awama. Ano ke mabuku a Mateo, Mako, Luka ne Yoano. Bino, Yesu bamutongola ne mu mabuku amo abula a mu Baibolo anembele bantu babujile bena Kilishitu.

  • TACITUS

    (Wajingako mu mwaka wa 56 kufika mu 120 C.E.) Tacitus ke shayuka umo ye banemeka bingi wanembele byavula pa byaikalanga bena Loma kala. Wanembele pa byamwekelenga mu bufumu bwa bena Loma kutendeka mu mwaka wa 14 C.E. kufika mu 68 C.E. (Yesu wafwile mu 33 C.E.) Tacitus wanembele’mba kimye mujilo mukatampe kyo asokele bintu byavula mu muzhi wa Loma mu 64 C.E, bantu bapelemo Mfumu Nelo mambo, amba ye walengejile. Tacitus wanungilepo’mba, pa kuba’mba Nelo “efumye mu mambo,” watongwele bena Kilishitu amba bo basokele uno mujilo. Kepo Tacitus aambile’mba: “Jizhina [ja kuba’mba bena Kilishitu] jafumine ku ntangi wabo aye Kilishitu, ye bazhachishe ne kwipaya ku kije kyalengele kitumbafumu Pontiusa Pilato, mu bukalama bwa kwa Tibeliusa.”—Annals, XV, 44.

  • SUETONIUS

    (Wajingako mu 69 C.E. kufika mu 122 C.E.) Uno mwina Loma wanembele buku wa kuba’mba Lives of the Caesars, waamba pa bamfumu batanshi 11 ba bena Loma. Kipungu kyaamba pa mfumu Kaludiusa (Claudius) kyaamba’mba kimye kimo kwajinga milukuchi pakachi ka Bayudea mu muzhi wa Loma na mambo a kwa Yesu. (Byubilo 18:2) Suetonius wanembele’mba: “Na mambo a kuba Bayudea bo balengelanga bingi malwañano na mambo a kwa Chrestus [Kilishitu], mfumu [Kaludiusa] wibapangilemo mu muzhi wa Loma.” (The Deified Claudius, XXV, 4) Nangwa kya kuba Suetonius wabepele’mba Yesu ye waletele milukuchi, bino washiinwe kuba’mba Yesu wajingako.

  • PLINY THE YOUNGER

    (Wajingako mu 61 C.E. kufika mu 113 C.E.) Uno wajinga kiloolo wa kibunji kya Bitinya (luno kyo kyalo kya Turkey), watumine nkalata ku Mfumu Trajan wa bena Loma, ya kwipuzha byo afwainwe kuba na bena Kilishitu mu kibunji kyanji. Pliny waambile’mba wakanjikizhenga bena Kilishitu kuleka bupopweshi bwabo, kabiji waipayile bakainenga kuleka. Wanembele’mba: “Aba . . . baswile kulomba ku Balesa [ba bubela], kulambila kipashañano kyenu aku na kusoka bya kufutumuna, ne kufinga Kilishitu . . . , nebakasulwile ne kwibaleka baya.”—Pliny—Letters, Book X, XCVI.

  •  FLAVIUS JOSEPHUS

    (Wajingako mu 37 C.E. kufika mu 100 C.E.) Wajinga ñanga wa Bayudea kabiji nembi wa bya kala. Wanembele’mba Anasa, ñanga mukatampe wa Bayudea wajinga bingi na luusa “wakonkenye pamo banchibamambo ba mu Saniedilini [kije kikatampe kya Bayudea] ne kuleta kwi abo mwanamulume wa jizhina ja Yakoba, nkasanji Yesu ye batelanga’mba Kilishitu.”—Jewish Antiquities, XX, 200.

  • BUKU WA TALMUD

    Uno ke buku wa mizhilo yonse yanembele bafunjishi ba Bayudea, yo banembele kutendeka mu mwaka wa 200 C.E kufika mu 500 C.E. Uno buku umwesha’mba ne balwanyi ba kwa Yesu baambile’mba wajingako. Mukuku umo waamba’mba: “Pa juba ja Kijiilo kya Lupitailo, Yeshu [Yesu] mwina Nazala bamwipayijile pa kichi.” Ne kya kine byo byo bamwipayile; Babylonian Talmud, Sanhedrin 43a, Munich Codex; monai Yoano 19:14-16.) Mukuku mukwabo ye banembele waamba’mba: “Kechi twafwainwa kwikala na mwana ukelengulwisha byonka byaubile mwina Nazala (ko kuba’mba Yesu) ne.”—Babylonian Taimud,Berakoth 17b, tubyambo twa panshi, Munich Codex; monai Luka 18:37.

BISHINKA BYA MU BAIBOLO

Mabuku a Mambo Awama aamba byavula pa bwikalo bwa kwa Yesu ne mwingilo wanji, kabiji atongola ne mazhina a bantu, mapunzha, ne kimye kyamwekelenga bintu. Kinembelo kya Luka 3:1, 2, kitukwasha kuyuka kimye Yoano Mubatizhi kyo atendekele mwingilo wanji. Uno Yoano ye wabijikile kwiya kwa kwa Yesu.

“Binembelo byonse byanembelwe na lutangijilo lwa mupashi.”—2 Timoti 3:16.

Luka wanembele’mba: “Mu mwaka wa bu 15 wa bukalama bwa kwa Tibeliusa Kesala, kimye Pontiusa Pilato kyo ajinga kitumbafumu wa Yudea, Heloda saka aji ntangi wa nkambi ya Ngalilea, ne Filipa mulongo wanji saka aji ndamakyalo wa kyalo kya Itulea ne Tilakonitisa, ne Lisanyasa saka aji ntangi wa nkambi ya Abilene, mu moba a ñanga mukatampe Anasa ne a kwa Kaifasa, byambo bya Lesa byaishile kwi Yoano mwana wa kwa Zekaliya mu kiselebwa.” Bishinka biji mu kino kinembelo bitukwasha kuyuka’mba “byambo bya Lesa byaishile kwi Yoano” mu mwaka wa 29 C.E.

 Bashayuka bonse baswa kuba’mba babinemanga batanu na babiji batongola Luka bajingako. Ibyo kuba’mba bashayuka bamo bakaine amba Pontiusa Pilato ne Lisanyasa kechi bajingako ne. Bino pa kupitapo kimye, bapoya bya kupoyapoya bataaine mabwe panembwa mazhina a bano bakalama babiji, kumwesha kuba’mba byanembele Luka bya kine. *

MAMBO KA O KYANEMENA?

Yesu wafunjishanga bantu pa Bufumu bwa Lesa, kafulumende ukalamanga ino ntanda yonse

Twafwainwa kuyuka inge kya kine Yesu wajingako, mambo bintu byo afunjishanga byanema bingi. Yesu wafunjishe bantu byo bakonsha kwikala ba lusekelo. * Kabiji walayile bantu amba kimye kibena kwiya bantu bonse kyo bakekala mu mutende, mu kafulumende umotu, utelwa’mba “Bufumu bwa Lesa.”—Luka 4:43.

Kuteela uno kafulumende amba “Bufumu bwa Lesa” kwayilamo bingi, mambo Lesa ukengijisha uno kafulumende kulama ntanda yonse ne kumwesha bumfumu bwanji. (Lumwekesho 11:15) Yesu waambilepo pa kino kishinka mu lulombelo lwanji amba: “Tata wetu wa mwiulu, . . . Bufumu bwenu bwiye. Kyaswa muchima wenu kyubiwe pano pa ntanda.” (Mateo 6:9, 10) Buno Bufumu inge bwatendeka kulama, ñanyi bintu byo bukobila bantu? Monai bintu bimo byo bukoba:

Bantu bamo balanguluka’mba ino milaye ke mashimikilatu. Pano bino, kuketekela mu milaye ya bantu kujitu nobe kuja mwela. Akilangulukai pa bino: Nangwa kya kuba bantu babena kuyilako palutwe mu bya kufunda, bya sayansi, ne bya kulengalenga, bino bantu bavula lelo jino baakamwa mambo kechi bayuka byo bukakya kesha ne. Kabiji pa juba pa juba, tubena kumona buyanji mu ntanda byo bubena kuvujilako, kubikapotu ne milukuchi, lwiso, mazhikakanwa, ne bantu kwibamanyika na mambo a bupopweshi. Abino byonse bimweshatu patoka’mba bantu bakankalwa kwilama abo bene.—Musapwishi 8:9.

Kyanema bingi kulangulukapo pa bwipuzho bwa kuba’mba: Nanchi Yesu kine wajingako nyi? * Pa 2 Kolinda 1:19, 20 paamba’mba: “Nangwa kya kuba milaye ya Lesa yavula byepi, yonse yaikala ‘ee’ kupichila mwi [Kilishitu].”

^ jifu. 23 Bataaine jibwe panembwa jizhina ja kwa Lisanyasa, kalama nangwa’mba “ntangi wa nkambi.” (Luka 3:1) Wajinga kalama wa nkambi ya Abilene mu moba atongola Luka.

^ jifu. 25 Mafunjisho amo afunjishe Yesu ataanwa mu Mateo kitango 5 kufika ku kitango 7, kabiji ano mafunjisho beatela’mba Jashi ja pa Mutumba.

^ jifu. 32 Inge mukeba kuyukilapo byavula pe Yesu ne byo afunjishanga, yai pa www.jw.org/kqn ne kuchinta po banemba’mba BIFUNJISHA BAIBOLO > MEPUZHO A MU BAIBOLO AKUMBULWA.