BYO KILUMBULULA

Balume ne bakazhi baji na mushingi benemeka bingi nangwa kya kuba bapusenamo mu bintu bimo. Buku wa kuba’mba Ten Lessons to Transform Your Marriage waamba’mba: “Balume ne bakazhi baji na mushingi bachinuzhuka kumina pa kintu kyo babena kukeba inge bapusenamo. Kabiji bebikako kupwisha makatazho bukiji bukiji. Bateleka inge mukwabo ubena kwamba ne kupwishisha pamo makatazho.”

JIFUNDE JA MU BAIBOLO: “Butemwe . . . kechi bukeba bintu bibuwamina abo bwine ne.”—1 Kolinda 13:4, 5.

Ba Micah baambile’mba: “Kutemwa mukazhi kulumbulula kumunemeka ne kubula kuba bintu byakonsha kumufichisha ku muchima ne kutamisha masongola.”

ENE MAMBO O KYANEMENA

Kubula kwipa mushingi kulengela baji mu masongola kwiambila byambo byatama ne kubula kwinemeka. Bapesapesa bya kupesapesa bataana kuba’mba bino byubilo byakonsha kulengela masongola kupwa.

Ba Brian baambile’mba: “Kwambila bakazhi benu byambo byatama kwakonsha kwibalengela kumvwa ku muchima kutama ne kumona nobe kechi banema ne, kuba bino kulengela kubula kwikala bulongo mu masongola.”

BYO MWAKONSHA KUBA

IIPUZHAI’MBA

Esekai kumona byambo byo mwingijisha pa kwisamba na benakwenu pa mulungu umo. Mwafwainwa kwiipuzha’mba:

  • ‘Nanchi kimye kyonse ñambila benakwami byambo byatama nyi, inyi ñamba byawama?’

  • ‘Mu ñanyi mashinda mo nafwainwa kumweshesha’mba mbena kunemeka benakwami?’

ISAMBAI NA BENAKWENU

  • Ñanyi byubilo ne byambo byakonsha kwimulengela kumona’mba benakwenu bemunemeka?

  • Ñanyi byubilo ne byambo bya benakwenu bimulengela kumona nobe kechi bemupa mushingi ne?

BYA KUBA

  • Nembai bintu bisatu byo mukeba benakwenu kubanga pa kumwesha’mba bemunemeka. Ambilai benakwenu nabo banembe bintu bisatu byo bakeba. Tambulai byanemba benakwenu ne kutendeka kulondela byo banemba.

  • Nembai byubilo byawama biji na benakwenu. Basanchilainga pa byobyo byubilo.

Ba Megan baambile’mba: “Mmwesha bamwatawami mushingi mu byo nguba kabiji nkebesha bingi kwibasangajika kimye kyonse. Kechi nguba bintu bikatampe ne, ngubatu tubitu tucheche kabiji byo nguba bimwesha’mba nanemeka bingi benakwami.”

Kishinka ke kya kuba’mba bintu byo muba byafwainwa kumwesha’mba mwanemeka benakwenu.

JIFUNDE JA MU BAIBOLO: “Vwalai muchima wa kifyele, wa lusa, wa kwipelula, wakooka ne wa butekanye.”—Kolose 3:12.