BYO KILUMBULULA

Kyambo kya kuba’mba lujimuno, kyakonsha kulumbulula kutangijila nangwa kufunjisha muntu. Javula kino kimweka inge bansemi babena kufunjisha mwanabo kuleka byubilo byatama. Kabiji kino kyambo kilumbulula ne kufunjisha baana kwikala na byubilo byawama byakonsha kwibakwasha kufuukulanga bintu bulongo mu bwikalo bwabo.

ENE MAMBO O KYANEMENA

Ano moba mu bisemi byavula, bansemi baleka kufunjisha baana, bachina kwibafunjisha mambo balanguluka’mba kuba bino kulengela baana kumona nobe kechi banema ne. Nangwa byonkabyo, bansemi ba maana bafunjisha baana babo ne kwibapa mizhilo yo bafwainwa kulondelanga.

Ba Pamela baambile’mba: “Baana bafwainwa kuyuka’mba kechi byonse byo bafwainwa kuba ne, kuba bino kwibalengela kukoma bulongo. Inge bansemi kebabule kufunjisha baana babo, baana bakekalatu nobe bwato buji pa kalunga ka mema bo babena kukumpula ku luvula, kechi bakayuka byo bafwainwa kuba mu bwikalo bwabo ne.”

BYO MWAKONSHA KUBA

Kange mwikileke ne. Inge mwanenu kechi ubena kulondela mizhilo ya pa nzubo ne, mwafwainwa kumololako. Umvwe mwanenu ubena kulondela mizhilo ya pa nzubo mwafwainwa kumusanchila.

Ba Christine baambile’mba: “Kimye kyonse nsanchila bingi baana bami pa kwikala balukookela, mambo kyakatazha bingi mu ino ntanda baana kwikala na lukookelo. Inge ke musanchile baana, kibapelela bingi kuswa kwibafundako.”

JIFUNDE JA MU BAIBOLO: “Kyonka muntu kyo abyala, kyo kyo akanowa.”—Ngalatiya 6:7.

Mwafwainwa kutekanya. Mwafwainwa kufunjishanga baana benu kwesakana na mafumbi, bulume ne bintu byatama byo bauba. Kukambula mwana kwesakana na bintu byo auba kulengela mwana kufunjilako ku byo auba. Twambe bino, inge mwanenu kechi ubena kwingijisha bulongo foni ne, mwakonsha kumwangata foni. Kabiji kechi mwafwainwa kufikenangatu kuzhingila inge mwanenu watamisha ne.

Ba Wendell baambile’mba: “Inge mwanami walubankanya, nkeba bingi kuyuka inge wakubilamotu nangwa ne. Paji lupusano pa kubilamotu kintu ne kuba kintu kya mapuso. Inge mwayuka bino, kipeela kuyuka bya kukwasha mwanenu.”

JIFUNDE JA MU BAIBOLO: “Kange muzhingijishenga baana benu ne, pa kuba’mba babule kupopomenwa.”—Kolose 3:21.

Temwainga baana benu. Kyapela bingi baana kukookela byo mubena kwibabuula inge bayuka’mba mwibatemwa.

Ba Daniel baambile’mba: “Mwanetu inge walubankanya, patanshi twamusanchilanga pa bintu byawama byo aubanga. Twamulumbulwilanga kuba’mba kechi wafwainwa kwilengulula na mambo a byo alubankanya ne, bino wafwainwa kupimpulako, kabiji tukeba kumukwasha kuba bino.”

JIFUNDE JA MU BAIBOLO: “Butemwe butekanya ne kuba lusa.”—1 Kolinda 13:4.