KWIKALA NA KIKOLA KIBULA KUPWA NANGWA BULEMA KWAKONSHA KULENGELA BWIKALO KUTAMA. Ba Ulf saka bakyangye kulemana beubilanga bintu bene, bino byo balemene baambile’mba: “Najinga bingi na bijikila. Kechi najinga na bulume bwa kwiubila bintu ne . . . Namwenengatu nobe ‘kafwako byonji ne.’”

Kyamwekejile ba Ulf, kituvululamo kuba’mba kechi tuji na bulume wa kwizhikijila ku bikola byonse ne. Bino nangwa byonkabyo, twafwainwa kubapo bintu bimo pa kuba’mba twizhikijilenga ku bikola bimo. Pano kyakonsha kwikala byepi inge tuji na kikola kibula kupwa? Nanchi kino kyakonsha kwitulengela kubula kwikala na lusekelo nyi? Ine, kechi byo ibyo ne, byonka byo tusa kumona. Patanshi, twayai twambe pa mafunde akonsha kwitukwasha kwikala na bumi bwawama.

MWAFWAINWA ‘KWILAMA BULONGO.’ (1 Timoti 3:2, 11) Kukizhamo kuja ne kutoma malwa kwatama mambo kubika bumi mu kizumba ne konauna mali avula. Pa Byambo bya Maana 23:20, 21, paamba’mba: “Kange wikale pa boba batoma binyu byavula, ne pa boba baja nyama yavula ne, mambo kitomi ne kiji bakayanda.”

MWAFWAINWA KWITOKESHA KU BUBIPISHO BONSE BWA MUBIJI. Baibolo waamba’mba: “Twayai twitokeshe ku bubipisho bonse bwa mubiji ne bwa mupashi.” (2 Kolinda 7:1) Bantu batamisha mibiji yabo inge kebanyeune nangwa kupepa fwanka nangwa kukizhamo kutoma malwa ne kwingijisha bizhima. Kipamo kya U.S. Centers for Disease Control and Prevention kyaamba’mba, kupepa fwanka “kulengela bantu kukolwa ne kulemana ne konauna binungwa bya mubiji.”

LAMAINGA BULONGO MUBIJI WENU NE BUMI MAMBO BWANEMA. “Aye [Lesa] ye ulengela’mba twikale na bumi ne kwenda.” (Byubilo 17:28) Kuyuka bino kwitulengela kuchinuzhuka bintu byakonsha kubika bumi bwetu mu kizumba, inge tubena kwingila nkito, pa kwendesha motoka nangwa mu bya kisangajimbwe byo tusala. Lusekelo lwa pa ka kimye kacheche kechi lwafwainwa kwitulengela kubika bumi bwetu mu kizumba ne.

KECHI MWAFWAINWA KUKIZHAMO KWIKALA NA BIJIKILA NE. Bongo ne mubiji bingijila pamo. Onkao mambo, mwafwainwa kuchinuzhuka kukizhamo kwikala na bijikila, bukaji, kichima ne bintutu bikwabo byakonsha  kwimulengela kwikala na bijikila. Pa Salamo 37:8 paamba’mba: “Kange uzhingile nangwa kubuuka bukaji ne.” Kabiji pa Mateo 6:34 paamba’mba: “Kange mubambishenga michima na mambo a juba ja kesha ne.”

LANGULUKAINGA PA BINTU BYAWAMA. Pa Byambo bya Maana 14:30 paamba’mba: “Muchima watekanya upana bumi ku mubiji.” Kabiji Baibolo waamba ne kuba’mba: “Muchima wa lusekelo ye muchi wawama.” (Byambo bya Maana 17:22) Basayansi nabo baswisha bino byaamba Baibolo. Dokotala wikala ku Scotland waamba’mba: “Bantu baji na lusekelo kechi bakolwa kolwa ne, bino aba babula lusekelo bakolwa bingi.”

TWAJIJILAI KWIKALA NA LUSEKELO NANGWA MUJI NA MAKATAZHO. Byonka byaubile ba Ulf bo twaambapo kuntendekelo, inge tubena kupita mu makatazho, twafwainwa kutwajijila kuchinchika. Nangwa byonkabyo, twafwainwa kumonangapo mashinda o twafwainwa kulondela pa kuba’mba tuchinchike. Bamo inge baji na makatazho bakizhamo bingi kwakamwa, kino kyakonsha kulengela bintu kutaminakotu. Pa Byambo bya Maana 24:10 paamba’mba: “Inge walefulwa mu juba ja bya malwa, ngovu yobe ikakepa.”

Kabiji bakwabo nabo inge baji na makatazho pakupitapo kimye bekalatu bulongo ne kupimpula milanguluko yabo. Bamonapo mashinda mwakupwishisha makatazho abo. Abino byo byaubile ba Ulf. Byo balombelepo ne kulanguluka langulukapo pa mashimikila aji mu Baibolo, baambile’mba, “natendekele kumonapo mashinda mwa kupwishisha makatazho.” Byonkatu bantu bapita mu makatazho byo bayuka buneme buji mu kwikala na kifyele ne lusa, ba Ulf nabo bayukile bino. Bino byubilo byo bibalengejile kutendeka kusapwila bantu byambo bya lutekenesho biji mu Baibolo.

Ba Steve nabo bapichilepo mu lukatazho lwabaya bingi. Byo bajinga na myaka 15, bajinga mu mapuso a pa mukwakwa kabiji ano mapuso ebalengejile kulemana. Byo bafikizhe myaka 18, maboko atendekele kwingila. Bayile ku sukulu mukatampe, ko batendekele kwingijisha bizhima, kutoma malwa ne kuba bulalelale. Kechi bayukile’mba bwikalo bwabo bukawamapo ne. Bino byo batendekele kufunda Baibolo, bapimpwile bwikalo bwabo kabiji balekele byubilo byatama byo baubanga. Baambile’mba, “nekilekele kulanguluka byo nalangulukanga kala amba kechi nanema ne. Luno bwikalo bwami bwawama, nji na lusekelo kabiji nsekela mu bintu byonka byo nji nabyo.”

Byaambile ba Steve ne ba Ulf bituvululamo byambo biji pa Salamo 19:7, 8, bya kuba’mba: “Mizhilo ya Yehoba yalumbuluka, ibwezhamo bulume. . . . Malamuna afuma kwi Yehoba aoloka, asangajika muchima; Mikambizho ya Yehoba yawama, ilengela muntu kumona kyeya.”