Bantu bavula bepachika ne kufwanyikizha biji Mwiulu. Bino bifunjisha Baibolo byapusana bingi na byayuka bantu bavula.

Mwiulu mo mu ka?

BYAMBA BANTU BAMO

Bantu bavula baitabila mu bintu byapusana pusana pa biji jiulu ne ene mambo o jaikelako. Langulukai pa bino byalondelapo:

  • Bavula betela’mba bena Kilishitu bakonsha kuswa byaamba buku bwa kuba’mba New Catholic Encyclopedia amba mwiulu “ye muzhi wa bantu bafwila mwi Nkambo bo bapesha.”

  • Rabbi Bentzion Kravitz waambile’mba bupopweshi bwa Bayudea butatu muchima pa bwikalo bujiko pa kyokyo kimye kukila kulanguluka pa bwikalo bwikalako inge muntu wafwa. Pano bino waambile’mba: “Mwiulu, mweo wikala na lusekelo lukatampe ne kumvwa kuba’mba baji kwipi ne Lesa kukila kala.” Kabiji waswile’mba: “Nangwa kya kuba Bayudea baitabila mu bwikalo bwa mwiulu, buku wabo wazhila utelwa’mba Torah kechi waambapo byavula pa kino ne.”

  • Bahindu ne Babudda baitabila kuba’mba kuji meulu avula bingi kuya muntu inge wafwa. Ano meulu ke kwa kukookolokelatu, apa bino wasemekelwa jikwabo pa ntanda nangwa kuya na kwikala bwikalo bwa lusekelo kabiji bwa mutende, abuno bo bwikalo bantu bo bakeba.

  • Bantu bamo bakana mafunjisho onse a bupopweshi aamba pa bya mwiulu kabiji bamba’mba kulanguluka bino ke bumbulwa maana.

Bavula bafwanyikizha bintu byavula bingi pa biji jiulu

BIFUNJISHA BAIBOLO

Mu Baibolo kyambo kya “mwiulu” kilumbulula bintu byavula. Langulukai pa bino:

  • Kinembelo kya Ntendekelo 1:20 kilumbulula kulengwa kwa bañonyi ‘batumbuka bapitañana mu lwelele.’ Mu jino jishinda, kyambo kya “lwelele” nangwa’mba jiulu kilumbulula momwa mumweka na meso.

  • Isaya 13:10 watongola “tubangabanga twa mwiulu ne mwala wanshansha.”

  • Baibolo waamba pe Lesa amba ‘wikala mwiulu’ ne kuba’mba kuji bamalaika “ba mwiulu.” (1 Bamfumu 8:30; Mateo 18:10) Kyambo kya kuba’mba “mwiulu” kechi kilumbulula mpunzha ya kifwanyikizhotu ne, bino ke mpunzha ya kine mwakwikala. *

“Talai panshi mumone kufuma mwiulu mwazhila mo mwikala kabiji mwa lukumo.”Isaya 63:15.

Nanchi bantu bonse  bawama inge bafwa baya mwiulu nyi?

Baibolo kechi ufunjisha’mba ntanda mpunzha ya kwikalapo kimye kicheche na kupembela kufwa bino apa twaya mwiulu ne. Baibolo walumbulula bulongo kuba’mba lufu kechi lwajinga pa mulanguluko wa Lesa pa kulenga bantu ne. Akilangulukai pa kino:

  • Lesa wabuujile bamulume ne mukazhi batanshi amba: “Semainga ne kusemununa, muyuzhe ntanda.” (Ntendekelo 1:28) Lesa walengele ntanda kuba’mba ikekale muzhi wa bantu wa myaka ne myaka. Lufu lwafwainwetu kwiya inge mwanamulume ne mwanamukazhi mutanshi basatukila Lesa. Kyataminekotu ke kya kuba’mba bamusatukijile.—Ntendekelo 2:17; 3:6.

  • Bunsatuki bwa mwanamulume mutanshi bwaletele lufu kwi aye ne mukazhanji ne ku baana babo. (Loma 5:12) Nanchi kino kyalengejile bantu kubula kwikala na luketekelo nyi?

  • Baibolo waamba’mba “atweba tubena kutengela meulu apya ne ntanda ipya monka mwayila mulaye wanji.” * (2 Petelo 3:13) Kwingijisha Bufumu bwanji, Lesa ukawamisha ntanda ne kwiibwezha byonka byo akebelenga amba ikale, ‘kabiji lufu kechi lukekalako jibiji ne.’ (Lumwekesho 21:3, 4) Nanchi kino kibena kwamba pa bumi bwa mwiulu nyi, inyi pa ntanda? Pa kuba’mba kintu kikabule ‘kwikalako jibiji,’ ko kuba’mba kyajingako. Pano bino, mwiulu kechi mujipo lufu ne. Onkao mambo, kino kyepelo kibena kwamba pa bikamweka pano pa ntanda, Lesa po etulengejile kuba’mba tukekalenga kabiji po tukebesha kwikala na batemwe betu. Baibolo wasolola ne kuba’mba bafwa bakasangulwa ne kubwela na kwikala na batemwe babo.—Yoano 5:28, 29.

Bantu bavula bomvwa bingi bulongo kufunda bifunjisha Baibolo pa jiulu. Mwanamulume umo wayanga mu Katolika kala wa jizhina ja George waambile’mba: “Kyantekeneshe bingi pa kufunda bifunjisha Baibolo pa bumi bwa myaka ne myaka pano pa ntanda. Luno lufunjisho lwamfikile bingi pa muchima kukila lwa kuya mwiulu.” *

“Jiulu jo ja kwa Yehoba, pakuba ntanda wiipana ku baana ba bantu.”—Salamo 115:16.

^ par. 13 Ibyo kuba’mba Lesa mupashi kechi uji na mubiji wa bumuntu ne. (Yoano 4:24) Onkao mambo, mpunzha yo ekalako yafwainwa kwikala ya mupashi ibula kumweka kwi atweba.

^ par. 19 Kyambo kya “ntanda ipya” kechi kilumbulula’mba bakalenga ntanda ikwabo ne, bino, ke ñambilo ya kifwanyikizho ilumbulula bantu bakekalanga pa ntanda bo bakobila bibusa kwi Lesa.—Salamo 66:4.

^ par. 20 Baibolo ufunjisha kuba’mba bantu bachechetu bo basalwa bakalamanga ne Yesu mu Bufumu bwa Lesa mwiulu. Bano bantu baji 144,000.—1 Petelo 1:3, 4; Lumwekesho 14:1.