“Shikishai, . . . bañonyi bapitañana mwiulu, ne abo basakwimubuula. Ñanyi mu bino bintu byonse wabula kuyuka amba kuboko kwa Yehoba ko kwauba kino?”—Yoba 12:7, 9.

PA MYAKA kukila 3,000 yapitapo, mushakulu Yoba wataine kishinka kya kuba’mba, bañonyi betulengela kuyuka mingilo ya Lesa. Bino byo boba, bitulengela kumvwisha bintu bimo. Baibolo waambapo bingi pa bañonyi. Ku bano bañonyi tufunjilako byavula mu bwikalo ne byo twafwainwa kwikala balunda ne Lesa. Twayai twambepo pa bañonyi bamo.

KULENGELA KAMIMBYA KINSA

Kamimbya

Bantu baikalanga mu Yelusalema bayukile bingi bulongo tumimbya. Mambo twalengelanga binsa mu jizezelo ja kishimikwa. Tumo twalengejile binsa ku nzubo ya Lesa yashimikile Solomone. Tuno tumimbya twalengenga binsa ku nzubo ya Lesa pa mwaka pa mwaka twazhikijilwanga kabiji twana twato twakomanga bulongo.

Mwana wa kwa Kola wanembele Salamo 84 waingijilanga pa nzubo ya Lesa mulungu umo pa bañondo batanu na umo. Wamonanga binsa mu kipango kya nzubo ya Lesa. Wakebanga bingi kwikalamo kikupu nobe tuno tumimbya twalenganga binsa mu bipango bya Yehoba. Waambile’mba: “Byo natemwapo tente wenu wa lusambakeno, anweba Yehoba wa mabumba! Muchima wami yense utonga, kine nkebesha bingi kwikala mu bipango bya Yehoba. . . Mambo ne kañonyi kataana mwa kwikala konkakwa ne kamimbya kalenga kinsa, mokalamina twana twako kwipi na kya kusokelapo bitapisho kyenu, anweba Yehoba wa mabumba, Mfumu wami kabiji Lesa wami!” (Salamo 84:1-3) Nanchi ne atweba ne baana betu tusanta ne kukebesha kupwila pamo na bantu ba Lesa nyi?—Salamo 26:8, 12.

ÑENDABWALA WAYUKA KIMYE KYANJI

Ngauzhi Yelemiya wanembele’mba: ‘Ñendabwala wayuka kimye kyanji.’ Kwa kubula nangwa kuzhinaukatu ne, wamonanga tuno tuñonyi byo twavilukanga mu Ntanda ya Mulaye. Kimye kya mwela wa mebele, bañendabwala batoka kukila pa 300,000 bavilukanga kufuma ku Africa kuya ku Buyeke bwa Europe kukilañanya mu Musanza wa Yodano. Tuno tuñonyi tuyuka kimye kya kubwela kotusemena mu kimye kya kisalo. Byonka biji tuñonyi tukwabo tuviluka, nato ‘twayuka kimye kya kubwelelamo.’—Yelemiya 8:7.

Buku wa Collins Atlas of Bird Migration waamba’mba: “Tuno tuñonyi twingijisha maana a kisemwa kuyuka kimye kya kuviluka.” Yehoba Lesa wapele maana tuno tuñonyi a kuyuka kimye kya kuviluka. Bino muntu bamupa bulume bwa kulanguluka ne kuyuka kimye. (Luka 12:54-56) Kupusanako na maana a kisemwa a ñendabwala, maana a kuyuka Lesa o alengela bantu kuyuka bintu bibena kumweka mu ano moba a kupelako. Bena Isalela bajingako mu moba a kwa Yelemiya kechi bamonanga  bino biyukilo ne. Lesa walumbulwile kyalengejile. Waambile’mba: “Bakana byambo bya Yehoba, pano ñanyi maana o baji nao?”—Yelemiya 8:9.

Lelo jino kuji bishinka byavula bitulengela kuyuka’mba tubena kwikala mu moba Baibolo o itela’mba, “moba a kupelako.” (2 Timoti 3:1-5) Nanchi mwafunjilako ku ñendabwala ne kuyuka “kimye” kyo tujimo nyi?

MPUNGU UMONA BINTU BIJI KWALEPA

Mpungu

Baibolo waamba pa mpungu bimye byavula bingi, kabiji bano bañonyi bavula bingi mu Ntanda ya Mulaye. Mpungu ‘ulengela kinsa kyanji peulu, kabiji ponka pa kinsa po po akebela kajo, mambo meso anji amona kufika kwalepa.’ (Yoba 39:27-29) Meso a mpungu amona palepa bingi. Wakonsha kumona kalulu kaji palepa kilomita umo.

Mpungu ‘umona bintu biji kwalepa,’ pa kuba Yehoba aye uyuka ne bikamweka kulutwe. O ene mambo Yehoba Lesa o aambijile’mba: “Kufumatu ku ntendekelo amiwa ñambila jimo bintu bikamweka kulutwe, kabiji kufumatu ne kala kene amiwa ñamba bintu bikyangye kumweka.” (Isaya 46:10) Kukookela byaamba Yehoba kwitulengela kumwenamo byawama mu maana ne mu bulume bwanji bwa kuyuka bikamweka kulutwe.—Isaya 48:17, 18.

Baibolo waesakanya baketekela mwi Lesa ku bampungu amba: “Aba baketekela mwi Yehoba bakekala na bulume. Bakatumbukanga kuya mwiulu nobe bampungu.” (Isaya 40:31) Mpungu kimupelela kulelemba mambo uyuka paji mwela wakaba upupa kuya mwiulu. Inge wafika paji uno mwela, utanyika byapi ne kutendeka kuzhokolokangatu ponkapo saka babena kumutwala mwiulu ku mwela wakaba. Mpungu kechi wingijishatu bulume bwanji byo etumpa mwiulu ne kusumuka kufika kwalepa ne. Ne bantu baketekela mwi Yehoba nabo batalatu kwi aye mambo wibalaya kwibapa “bulume bwakila bwa bantu.”—2 Kolinda 4:7, 8.

“BYONKA KYAJE BYO AKONKENYA PAMO TWANA TWANJI”

Kyaje na twana twanji

Byo ajinga pepi kufwa, Yesu waimene saka abena kutala Muzhi mukatampe wa Bayudea. Waambile’mba: “Yelusalema, Yelusalema, obewa wipaya bangauzhi ne kwasa mabwe boba bo bakutumina. Nakebeshe bingi kukonkanya pamo baana bobe, byonka kyaje byo akonkenya pamo twana twanji mu byapi! Bino obewa kechi wakebele kino ne.”—Mateo 23:37.

Lesa wapa bañonyi maana a kuzhikijila twana twabo. Bañonyi basemenatu panshi, nabiji banzolo bakenkenta bingi pa kuba’mba bamone bilwanyi. Inge nzolo wamona mpungu nangwa kabemba, ujimunako twana twanji pa kuba’mba tufyame mu byapi byanji. Kabiji mu byapi momo tufyama inge kuji bingi mute nangwa mvula mukatampe. Yesu naye wakebelenga kuzhikijila bangikazhi ba mu Yelusalema ne kwibakwasha kwikala na bulunda bwawama ne Lesa. Mu ano moba, Yesu ubena kwitwita kwiya koaji pa kuba’mba etukokoloshe ne kwituzhikijila ku bisendwa ne bijikila bya mu bwikalo.—Mateo 11:28, 29.

Kuji bintu byavula byo twakonsha kufunjilako ku bañonyi. Inge mwamona byo boba, esekainga kulanguluka pa byaambapo Binembelo pa bañonyi. Kulanguluka pa kamimbya kusakwimukwasha kunemeka nzubo ya Yehoba. Ketekelai mwi Yehoba mambo upana bulume bulengela kwikala nobe bampungu. Yai kwi Yesu pa kuba’mba bukine bwa mambo a Lesa bwimuzhikijilenga byonka kyaje byo azhikijila twana twanji mu byapi. Ikalainga bajimuka byonka biji bañendabwala ne kuyuka moba o tubena kwikalamo kwesakana na bibena kumweka mu ntanda.