Ba Blessing * byo bafikile mu Europe, baketekejile kuba’mba bakengilanga mwingilo wa kwichika bantu nsuki. Bino byo papichile moba jikumi na kwibapuma ne kisemi kyabo kwikimanyika, kibalengejile kwikala bapite.

Bipikichala bibena kumwesha bazha mu moba a kala mu Ijipita

Ba Blessing baketekejile kufolanga 200 kufika ku 300 euros pa juba jimo na mambo a kuba bakulumpe babo bankito bajinga na nkongole yafikile ku 40, 000 euros. * Ba Blessing baambile’mba, “Nalangulukilenga bya kunyema, pano bino nachiinenga byo bafwainwe kuba balongo bami. Kafwako kyo nafwainwe kuba ne.” Ba Blessing baingijilepo mwingilo wingila bantu 4 milyonyi wa bupite na mambo a kwibakanjikizha.

Myaka nobe 4,000 yapitapo, nsongwalume aye Yosefwa bamupoteshe ku bakolojanji. Bamupoteshe mu buzha ku kinemanga wa bena Ijipita. Bino byo akaine kuba byakebelenga ba muka nkambo yanji, bamupelemo mambo pa bintu byo abujile kuba. Kino kyamulengejile kumutaya mukaleya.—Ntendekelo 39:1-20; Salamo 105:17, 18.

Yosefwa wajinga muzha wajingako kala; ba Blessing bajinga bazha mu kitota kya bu 21. Bano bonse baikele bazha na mambo a kwibapotesha, busulu bo bapotesha bantu nobe bipe. Mu buno busulu banemeka bingi mali kukila bantu.

NKONDO YALENGELA BANTU BAVULA KWIBAPOTESHA MU BUZHA

Inge mu kyalo mwaikala nkondo, bantu bebapoteshanga bingi mu buzha. Mfumu wa bena Ijipita aye Thutmose III wabwezhezhe bakaili 90,000 byo kwajinga kipekenyi kya bashilikale mu Kenana. Bena Ijipita baingijishanga bano bantu mu mikochi, kushimika mazubo mo bapopwelanga balesa babubela ne kupoya mifolo mwapitanga mema.

 Mu Bufumu bwa bena Loma, makondo alengelanga bantu kwibapotesha mu buzha kabiji na mambo a kukeba bazha kyalengelanga makondo. Kyatainwe kuba’mba, mu kitota kitanshi, kichika kya bena Loma bajinga bazha. Bazha ba bena Ijipita ne ba bena Loma bebamanyikanga bingi. Bazha baingilanga mu mikochi ya bena Loma baikalangatu myaka 30.

Byo papichile kimye, bazha balekele kwibobila lusa. Pakachi ka myaka kitota kya bu 16 ne 19, busulu bwa kupotesha bazha bo bwaletanga bingi mali. Kwesankana na sawakya wafumine ku UNESCO, waambile’mba, ‘banabalume, banabakazhi ne baana pakachi ka 25 ne 30 milyonyi bobo bapoteshe mu buzha.’ Kabiji bazha bavula bafwile kimye kyo babukilenga kalunga ka mema ka Atlantic. Ba Olaudah Equiano bazha bapulukile baambile’mba: “Bazha bebamanyikanga bingi.”

Ne mu ano moba bantu bakibapotesha mu buzha. Kipamo kya International Labour Organization kyapaine sawakya wa kuba’mba, banabalume, banabakazhi ne baana nobe 21 milyonyi bengila nobe bazha mu bishimikwa, kimo kimye bebapa mali acheche bingi kabiji kimo kimye kechi bebapa ne mali ne. Bazha ba mu ano moba bengila mu mikochi, mu bishimikwa mobalenga bivwalo, bafyatula matafwali, mu bishimwa mubila bantu bulalelale ne mu mazubotu a bantu. Nangwa kya kuba mizhilo kechi yaswisha kuba bino ne, bino bantu bakitwajijila na kupotesha bantu mu buzha.

Bantu bavula lelo jino bengila nobe bazha

KUKASULUKA

Na mambo a kumanyika bazha, kino kibalengelanga kulwila luusa lwabo. Mu kitota kitanshi, bantu baambilangako bazha bakwabo ne bazha 100,000 basatukijile bufumu bwa bena Loma. Mu kitota kya bu 18, bazha ba pa jikuji ja Caribbean ja ku Hispaniola baimenejile kuntundwa bankambo yabo. Bazha baingilanga mu majimi a myeenge bebamanyikanga bingi. Kino kyalengejile malwañano pa myaka  13 pakachi ka bantu ne kulengela kyalo kya Haiti kwiimena mu 1804.

Bena Isalela byo bafumine mu Ijipita, baumvwine bingi bulongo pa kukasuluka ku makatazho o bapitangamo kimye kyo bajinga bazha. Kampe bantu 3 milyonyi bo bafumine mu buzha mu Ijipita. Bano bantu bafwainwe kukasuluka ku makatazho o bapichilengamo. Baibolo waamba’mba, byo bajinga mu buzha mu Ijipita bano bantu baingilanga “kyakosa mingilo yonse ya buzha.” (Kulupuka 1:11-14) Kabiji Felo wabikilepo muzhilo wa kwipaya baana ba balume basemwanga pa kuba’mba bakepesheko kuvula kwa bena Isalela.—Kulupuka 1:8-22.

 Lesa ye walengejile bena Isalela kufuma mu buzha mu Ijipita. Lesa wabuujile Mosesa amba, “Kine namona kumanama kwa bantu bami,” kabiji “nkekila na kwibapokolola.” (Kulupuka 3:7, 8) Na mambo a kino, pa mwaka pa mwaka Bayudea bonse mwaya ntanda bavuluka juba ja Kijiilo kya Lupitailo.—Kulupuka 12:14.

KIMYE KIKAPWA BUZHA

Baibolo waamba’mba, “Yehoba Lesa wetu kechi uji na misalululo ne,” kabiji itubula ne kuba’mba kechi waaluka ne. (2 Byambo bya Moba 19:7; Malakai 3:6) Lesa watumine Yesu kuba’mba asapwile “mambo awama ku bayanji . . . , ne kukasulula bonse bamanyikwa.” (Luka 4:18) Nanchi kino kilumbulula’mba muzha yense wafwainwa kwikala na mutende nyi? Ine. Yesu waishile na kukasulula bantu ku bundengamambo ne lufu. Kabiji waambile kuba’mba “bukine bukemukasulula.” (Yoano 8:32) Ne mu ano moba bukine bwambilengapo Yesu bukasulula bantu mu mashinda avula bingi.—Monai kakitenguluzha ka kuba’mba “ Kukasuluka ku Buzha Bukwabo.”

Lesa wakwashishe Yosefwa ne ba Blessing kufuma mu buzha mu mashinda avula bingi. Mwakonsha kutanga jishimikila ja kwa Yosefwa mu bitango 39 kufika ku 41 mu buku wa Ntendekelo. Ba Blessing bafumine mu buzha mu jishinda ja kukumya bingi.

Panyuma ya kwibapanga mu kyalo kimo kya mu Europe bayile ku Spain. Mu kino kyalo batendekele kufunda Baibolo na Bakamonyi ba kwa Yehoba. Bebikileko bingi kuleka byo baubanga kabiji batendekele kwingila nkito ikwabo pa kuba’mba bapwishe nkongole yabo. Juba jimo, ba Blessing bebatumijile foni ku bakulumpe babo ba nkito. Bakulumpe babo ba nkito bakebelenga kubuula ba Blessing kuba’mba, kechi bafwainwa kupana nkongole ne. Kabiji bebalombele ne kwibalekelako mambo. Ki ka kyalengejile? Mambo bakulumpe babo ba nkito nabo batendekele kufunda Baibolo na Bakamonyi ba kwa Yehoba. Ba Blessing baambile’mba: “Bukine bwitukasulula mu jishinda ja kukumya bingi.”

Yehoba Lesa kyamukolele bingi ku muchima bena Isalela byo bebamanyikilenga mu Ijipita, ne luno kimukola bingi ku muchima pa kumona nshiji ibena kuba bantu lelo jino. Kya kine, pa kuba’mba buzha bukapwe, pafwainwa kubiwa lupimpu lukatampe bingi mu bwikalo bwa bantu. Lesa walaya kuleta lupimpu pano pa ntanda. Baibolo waamba’mba: “Tubena kutengela meulu apya ne ntanda ipya monka mwayila mulaye wanji, kabiji mu bino mo mukekala bololoke.”—2 Petelo 3:13

^ jifu. 2 Jizhina japimpulwa.

^ jifu. 3 Pa kyo kya kimye mali aingijishanga bantu ba ku Europe anemenetu byonka byanema mali a kina America.