Byambo biji mu Baibolo byafuma kwi Lesa ‘kabiji bikwasha bantu pa kwibafunjisha, pa kwibakajipila ne pa kwibololako.’ (2 Timoti 3:16) Nanchi bino byambo bya kine nyi? Monai mafunde a mu Baibolo byo akwasha bantu kuchinuzhuka makatazho a mu bwikalo.

KUKIZHAMO KUTOMA MALWA

Ba Delphine bo twaambapo kala baambile’mba makatazho o bapichilengamo ebalengejilenga kutoma bingi malwa. Baibolo kechi ukanya kutoma malwa ne, bino waamba’mba: “Kange wikale pa boba batoma binyu byavula” ne. (Byambo bya Maana 23:20) Kukizhamo kutoma malwa kuleta bikola mu mubiji, bulunda kupwa ne bantu bavula kufwa pa mwaka pa mwaka. Bantu inge ke balondele byaamba Baibolo, bakonsha kuchinuzhuka ano makatazho afuma mu kutoma malwa.

Abino byo byaubile ba Delphine. Baambile’mba: “Kutoma malwa kechi kwapwishishe makatazho o najinga nao ne. Bino nalondejile byambo biji pa Filipai 4:6, 7 bya kuba’mba: “Kange mubambishenga michima yenu na mambo a kintu nangwa kimo ne, bino . . . saka musolola kwi Lesa bintu byo mukeba.” Kimye kya bufuku inge natendeka kwikala na bijikila, nalombanga kwi Yehoba ne kumubuula byonse biji ku muchima wami pa kuba’mba ankwashe kubula kwikala na bukaji ne kwikala na milanguluko yawama inge naumvwa kutama ku muchima. Inge bwakya lukelo, nalombanga kuba’mba mbule kwikala na milanguluko yatama. Kuba bino kwandengelanga kuta muchima pa bintu byo nji nabyo kukila kuta muchima pa bintu byo nabula. Nafuukwilepo kwikileka kutoma malwa. Kuba bino kwandengejile kwikala na lusekelo kukila bantu batoma malwa.”

 BULALELALE

Mu bulalelale mufuma bintu byatama bingi. Mafunde a mu Baibolo akonsha kwitukwasha kuchinuzhuka bintu bilengela bulalelale nabiji kusengula kubi ne kutamba bya mulekese. Nsongwalume wa jizhina ja Samuel waambile’mba: “Kyapelele bingi kutendeka kusengula. Kimye kimo bantu bo nasengulanga nabo kechi nebatemenwe ne, nangwa kya kuba abo bantemenwe. Inge wayuka’mba muntu ye ubena kusengula nanji wakutemwa, kikatazha bingi kuleka kusengula.” Samuel bamwambilanga’mba watemwa bingi kusengula nangwa kya kuba kechi wayukile’mba byo byo aubanga ne. Kyamukatezhe bingi kuleka kusengula. Waambile’mba, “kusengula kwatama bingi mambo kwandengejile kwikala na byubilo byatama.”

Samuel watangile kibaaba kyaamba pa banyike kyajinga pa intaneti kyaambile pa kusengula. Kabiji walangulukile pa kinembelo kya Byambo bya Maana 20:11 kyaamba’mba: “Mwana (nangwa’mba “kalombwana,” tubyambo twa munshi) bamuyukila ku byubilo byanji, kana byubilo byanji byawama nangwa koloka.” Ñanyi bintu byafuminemo? Samuel po po ayukile’mba kusengula kubi kechi kwawama ne. Waambile’mba: “Mwanyike uji na kisela kya kusengula wikala na byubilo byatama inge wasongola. Natendekele kulanguluka pa bikomvwanga mwanamukazhi ye nkasongola inge ke nsengule na mwanamukazhi mukwabo. Kuyuka bino kwandengejile kulanguluka’mba kusengula kubi kwatama nangwa kya kuba kyapela bingi kusengula.” Samuel walekele kuba bino. Kuleka kusengula kwamulengejila kubula kuba bulalelale.

Ba Antonio nabo bajinga mu kizumba kya kuba bulalelale mambo bajinga na muteeto wa kutamba bya mulekese. Nangwa kya kuba basongwele mwanamukazhi ye batemenwe bingi, batwajijile na kino kyubilo kyatama. Baambile’mba kulanguluka pa kinembelo kya 1 Petelo 5:8 kwibakwashishe bingi. Kino kinembelo kyaamba’mba: “Jimukai, saka mulaba ne kukenkenta! Mulwanyi wenu aye Diabola upitañana nobe bokwe ubuluma ubena kukeba wa kuja.” Ba Antonio baambile’mba: “Bya mulekese byasampukila ne pa katele lelo jino, kabiji kechi bifuma mu milanguluko inge wibitamba ne. Kino kyepelo kyankwashishe kulanguluka pa wakebelenga’mba ngikale na uno muteeto. Nayukile’mba Diabola ye wakebelenga’mba ntambenga bya mulekese. Luno nayuka’mba Yehoba wakonsha kunkwasha ‘kujimuka ne kulaba’ pa kuba’mba nshinde ino milanguluko yatama ne kuzhikijila muchima wami ne masongola ami.” Ba Antonio bebakwashishe kusankilapo muteeto wabo watama. Kuba bino kwibakwasha kuchinuzhuka ne makatazho akwabo avula.

Byo twaambapo byamweshatu patoka’mba mu Baibolo, muji mafunde awama akonsha kwitukwasha kuchinuzhuka makatazho. Pano kyakonsha kwikala byepi inge muji na makatazho abula kupwa? Twayai tumone Mambo a Lesa byo akonsha kwitukwasha kupwisha ano makatazho.

Mafunde a mu Baibolo akonsha kwitukwasha kuchinuzhuka makatazho amo