“Anweba bena Isalela, telekai: Yehoba Lesa wetu ye Yehoba umotu.”—MPITULUKILO YA MU MIZHILO 6:4.

NYIMBO: 138, 112

1, 2. (a) Mambo ka bantu bavula o bayukila byambo biji mu Mpitulukilo ya mu Mizhilo 6:4? (b) Mambo ka Mosesa o aambijile bino byambo?

PA MYAKA yavula, Bayudea bengijisha byambo biji pa Mpitulukilo ya mu Mizhilo 6:4 mu lulombelo lwabo. Luno lulombelo belutela’mba Shema, kabiji kyo kyambo kyatatwilapo mu Kihebelu pa kino kyepelo. Bayudea bavula balomba luno lulombelo pa juba pa juba, lukelo ne mabanga kumwesha’mba bengijilatu Lesa bunke.

2 Bino byambo, biji mu jashi japeleleko jaambile Mosesa ku kisaka kya bena Isalela. Mu mwaka wa 1473 Kilishitu saka akyangye kwiya, kino kisaka kyajinga mu kiselebwa kya Moabu kabiji bajinga pepi kwabuka Mukola wa Yodano ne kushinda Ntanda ya Mulaye. (Mpitulukilo ya mu Mizhilo 6:1) Mosesa watangijile bano bantu pa myaka 40, kabiji wakebelenga’mba bakose pa kuba’mba bakachinchike makatazho o bakapitamo. Bafwainwe kuketekela mwi Lesa wabo aye Yehoba ne kwikala ba kishinka kwi aye. Onkao mambo, byambo bya kwa Mosesa byapeleleko bibatundaikile bingi. Byo ebabuujile  Mikambizho Jikumi ne mizhilo ikwabo yafumine kwi Yehoba, Mosesa wibavulwilemo byambo byanema biji mu Mpitulukilo ya mu Mizhilo 6:4, 5. (Tangai.)

3. Ñanyi mepuzho o tusakwisambapo mu uno mutwe?

3 Bena Isalela bayukile’mba Yehoba Lesa wabo ke “Yehoba umotu.” Bena Isalela ba kishinka bapopwelanga Lesa umotu, ko kuba’mba Lesa wa bashakulu babo. Pano mambo ka Mosesa o ebavulwijilemo kuba’mba Yehoba Lesa wabo ye “Yehoba umotu”? Bino byambo byakwatankana byepi na kutemwa Lesa na muchima wetu yense, na mweo wetu yense ne na bulume bwetu bonse? Kabiji twakonsha kulondela byepi byambo biji mu Mpitulukilo ya mu Mizhilo 6:4, 5 lelo jino?

LESA WETU YE “YEHOBA UMOTU”

4, 5. (a) Byambo bya kuba’mba “Yehoba umotu” bilumbulula ka? (b) Yehoba wapusanako byepi na balesa ba bisaka bikwabo?

4 Wapusanako. Byambo bya kuba’mba “Yehoba umotu” bilumbulula’mba Yehoba wapusanako, kafwako waesakana nanji ne. Mambo ka Mosesa o aambijile bino byambo? Kechi waambilenga pa lufunjisho lwa balesa basatu ne. Yehoba ye Mulenga wa jiulu ne ntanda kabiji ye Kalama wa bilengwa byonse. Ye Lesa yenka wa kine, kechi kujipo lesa mukwabo waesakana nanji ne. (2 Samwela 7:22) Onkao mambo, byambo byaambile Mosesa byavulwilengamo bena Isalela amba bafwainwa kupopwelatu Yehoba bunke bwanji. Kechi bafwainwe kuba byaubanga bantu bebazhokolokele bapopwelanga balesa ba bubela ne balesa babakazhi ne. Bano bantu baitabijile’mba balesa babo bakonsha kutangijila bilengwa.

5 Bena Ijipita bapopwelanga lesa juba aye Ra, lesa wamukazhi wa lwelele aye Nut, lesa wa ntanda Geb, lesa wa Nile aye Hapi ne banyama. Yehoba wamwesheshe’mba wakila bano balesa ba bubela byo aletele Binkunka Jikumi. Bena Kenana bapopwelanga Baela, lesa wa bubela ye baketekejile’mba ye walengele bumi. Kabiji bamumonanga’mba ye lesa wa lwelele, wa mvula ne kinkunkwila. Bantu bavula baketekejile mwi Baela amba wibazhikijila. (Kubala 25:3) Bena Isalela bafwainwe kuvulukanga’mba Lesa wabo, “Lesa wa kine” wapusanako, ke “Yehoba umotu.”—Mpitulukilo ya mu Mizhilo 4:35, 39.

Yehoba Lesa kechi walauka alauka ne. Wa kishinka, kabiji wa kine

6, 7. Ñanyi ndumbulwilo ikwabo ya kyambo kya kuba’mba “umotu,” kabiji Yehoba wamwesheshe byepi amba “umotu”?

6 Kubula Kwalauka Alauka ne Bukishinka. Kyambo kya kuba’mba “umotu” mu byambo bya kuba’mba “Yehoba umotu” kilumbulula’mba kyaswa muchima wanji ne byubilo byanji byaketekelwa. Yehoba Lesa kechi walauka alauka ne. Wa kishinka, kabiji wa kine. Walayile Abalahama amba baana banji bakekala mu Ntanda ya Mulaye. Kabiji Yehoba waubile bya kukumya byavula bingi pa kuba’mba afikizhe uno mulaye wanji. Nangwa kya kuba papichile myaka 430 kufuma kimye kyo aambile uno mulaye, Yehoba kechi wapimpwile milanguluko yanji ne.—Ntendekelo 12:1, 2, 7; Kulupuka 12:40, 41.

 7 Byo papichile myaka yavula, Yehoba watelele bena Isalela amba bakamonyi banji, kabiji wibabuujile’mba: “Amiwa njitu byonka byo najinga kala. Kunyuma yami kechi kwajingapo Lesa mukwabo ne, kabiji kulutwe yami kechi kukekalapo Lesa mukwabo ne.” Kabiji Yehoba wamwesheshetu patoka amba kechi ukapimpula milanguluko yanji ne, byo aambile’mba: “Amiwa njitu byonka byo najinga kala.” (Isaya 43:10, 13; 44:6; 48:12) Bena Isalela batokelwe bingi pa kwingijila Lesa ubula kwaluka kabiji wa kishinka. Ne atweba byo byo kiji lelo jino.—Malakai 3:6; Yakoba 1:17.

8, 9. (a) Yehoba ukeba’mba bapopweshi banji bobenga byepi? (b) Yesu wakoseshe byepi byambo byaambile Mosesa?

8 Mosesa wavulwilemo bena Isalela amba Yehoba ukatwajijila kwibatemwa ne kwibata muchima. Kabiji Yehoba wakebelenga’mba bamwingijilengatu bunke bwanji, ne kumutemwa na muchima yense, na mweo yense ne na bulume bonse. Bansemi bafwainwe kutwajijila kufunjisha baana babo pe Yehoba pa kuba’mba bapopwelengatu Yehoba bunke bwanji.—Mpitulukilo ya mu Mizhilo 6:6-9.

9 Yehoba kechi upimpula milanguluko yanji ne, onkao mambo, kechi ukapimpula bikebewa ku bapopweshi banji ba kine ne. Inge tukeba’mba bupopweshi bwetu bumutokeshenga ku muchima, twafwainwa kumwingijilangatu bunke bwanji ne kumutemwa na muchima wetu yense, na maana etu onse, ne na bulume bwetu bonse. Yesu waambile’mba uno ye mukambizho wanema bingi. (Tangai Mako 12:28-31.) Twayai tufunde byo twakonsha kumwesha’mba twaitabila’mba “Yehoba Lesa wetu ye Yehoba umotu.”

INGIJILAINGATU YEHOBA BUNKE BWANJI

10, 11. (a) Mu ñanyi jishinda mo twafwainwa kupopwelatu Yehoba bunke bwanji? (b) Bansongwalume Bahebelu bamwesheshe byepi’mba bengijilatu Yehoba bunke bwanji?

10 Yehoba ye Lesa wetu yenka umotu. Tumwingijilatu aye bunke bwanji inge ketumupopweletu aye bunke. Kechi twafwainwa kupopwelanga balesa bakwabo nangwa kuvwangamo milanguluko ikwabo ya bubela nangwa byubilo byatama mu kupopwela Yehoba ne. Lesa wetu kechi wakilatu balesa bakwabo nangwa kwibakilatu bulume ne. Ye Lesa wa kine. Twafwainwa kupopwelangatu Yehoba bunke bwanji.—Tangai Lumwekesho 4:11.

11 Mu buku wa Danyela mwanembwa bansongwalume Bahebelu, ba Danyela, Hananiya, Mishela ne Azaliya. Bamwesheshe’mba bengijilatu Yehoba kimye kyo bakaine kuja kajo ka muzhilo ku bapopweshi ba Yehoba. Kabiji balunda ba kwa Danyela basatu bakaine kufukamina kipashañano kya ngolode kya kwa Nebukaneza. Batangizheko Yehoba mu bwikalo bwabo. Kabiji batwajijile kwikala ba kishinka kwi aye.—Danyela 1:1–3:30.

Twafwainwa kutangizhako Yehoba mu bwikalo bwetu

12. Pa kuba’mba tumwingijilengatu Yehoba bunke bwanji, twafwainwa kuchinuzhuka ñanyi bintu?

12 Twafwainwa kutangizhako Yehoba mu bwikalo bwetu. Inge tukeba kumwingijilangatu aye bunke bwanji, kechi twafwainwa kutangizhako bintu bikwabo mu bwikalo  bwetu ne. Ñanyi bintu byo twakonsha kubula kutangizhako? Mu Mikambizho Jikumi, Yehoba wakambizhe bantu banji amba kechi bafwainwe kupopwela balesa bakwabo ne. Kabiji kechi bafwainwe kupopwela bankishi ne. (Mpitulukilo ya mu Mizhilo 5:6-10) Lelo jino, kuji mitundu yapusana pusana ya kupopwelamo bankishi, kabiji imo kyakonsha kukatazha kwiiyuka. Bino Yehoba kechi wapimpula bikebewa pa kumwingijila ne. Ukijitu “Yehoba umotu.” Twayai twisambe byo twakonsha kuchinuzhuka kupopwela bankishi lelo jino.

13. Ñanyi bintu byo twakonsha kutendeka kutemwa kukila kutemwa Yehoba?

13 Pa Kolose 3:5 (tangai) panembwa bintu byakonsha kutamisha bulunda bwetu na Yehoba. Tumona kuba’mba lunkumbwa, ko kupopwela bankishi. Mu ñanyi jishinda? Inge tubena kukebesha kintu, nabiji mali avula nangwa bwikalo bwa ntentente, twakonsha kunemeka bino bintu ne kwibimona nobe lesa. Byubilo byatama byonse byatongolwa pa Kolose 3:5 byakwatankana na lunkumbwa, ko kuba’mba mutundu umo wa kupopwela bankishi. Onkao mambo, umvwe ke tukebeshe kwikala na bino bintu, twakonsha kutendeka kwibitemwa kukila byo twatemwa Lesa. Ko kuba’mba Yehoba kechi ukekala “Yehoba umotu” kwi atweba ne. Kechi tukeba’mba kino kiketumwekele ne.

14. Ñanyi lujimuno lwaambile mutumwa Yoano kutazha ku kutemwa Lesa?

14 Mutumwa Yoano naye waambilepo bingi pa kino kishinka. Waambile kuba’mba inge muntu watemwisha bintu bya mu ino ntanda, ko kuba’mba “bya kusakasaka bya mubiji ne bintu bisakasaka meso ne muntu kwimwesha na bintu byo aji nabyo mu bwikalo,” kimwesha’mba “butemwe bwa kutemwa Tata kechi buji mwi aye ne.” (1 Yoano 2:15, 16) Onkao mambo, twafwainwa kwipimanga atweba bene kimye kyonse kumona inge twatemwa bintu bya mu ino ntanda. Twakonsha kutaana kuba’mba twatendeka kutemwa bya kisangajimbwe, mvwajilo ne mwekelo ya bantu ba mu ino ntanda. Nangwa kampe twakonsha kutendeka kukeba “bintu bikatampe” kupichila mu kukeba kufunda kufika palepa. (Yelemiya 45:4, 5) Ntanda ipya ijitu pepi. Onkao mambo, twafwainwa kuvulukanga byambo byanema byaambile Mosesa. Umvwe twayuka ne kwitabila kuba’mba “Yehoba Lesa wetu ye Yehoba umotu,” tukamwingijilangatu aye yenka kwapwa ne kumupopwela mu jishinda jo akeba.—Bahebelu 12:28, 29.

TWAJIJILAI KUKWATANKANA

15. Mambo ka Paulo o avulwijilemo bena Kilishitu amba Lesa ye “Yehoba umotu”?

15 Byambo bya kuba’mba “Yehoba umotu” bitukwasha kuyuka’mba Yehoba ukeba bakalume banji kukwatankana ne kwingila mwingilo umo. Mu kipwilo kitanshi kya bena Kilishitu, mwajinga Bayudea, Bangiliki, bena Loma ne bantu ba mu bisaka bikwabo. Bisho byabo ne nkomeno byapusene, kabiji kechi batemenwe bintu bimo ne. Na mambo a bino, bamo kibakatezhe bingi kuswa jishinda jakatataka ja kupopwelamo nangwa kuleka byubilo byabo bya  kala. Onkao mambo, Paulo wibavulwilemo kuba’mba bena Kilishitu bajitu na Lesa umo, Yehoba.—Tangai 1 Kolinda 8:5, 6.

Yehoba ukeba bakalume banji kukwatankana ne kwingila mwingilo umo

16, 17. (a) Ñanyi bungauzhi bubena kufika lelo jino, kabiji mwafuma ñanyi bintu? (b) Ñanyi bintu byakonsha kuleta mabano?

16 Nga mu kipwilo kya bena Kilishitu lelo jino kiji byepi? Ngauzhi Isaya waambile’mba “mu moba a ku mpelo,” bantu ba mu bisaka byonse bakeya na kupopwela Yehoba. Bakambanga’mba: “Aye uketufunjisha mashinda anji, kabiji tukendanga mu mashinda anji.” (Isaya 2:2, 3) Tuji bingi na lusekelo pa kwimwena bibena kufika buno bungauzhi lelo jino. Balongo betu ne banyenga bafuma mu mapunzha apusana pusana, bamba milaka yapusana pusana, kabiji bafuma mu bisho byapusana pusana. Pano bino, twakwatankana mu kupopwela Yehoba. Nangwa byonkabyo, na mambo a kuba twapusana pusana, bimye bimo tupusenamo.

Nanchi tubena kwingila na ngovu pa kuba’mba tutwajijile kukwatankana mu kipwilo nyi? (Monai mafuka 16-19)

17 Mumona byepi balongo ne banyenga bafuma mu bisho byapusanako na byenu? Mulaka wabo, mvwajilo, byubilo byabo ne kajo byakonsha kupusana na byenu. Nanchi  mwibachinuzhuka ne kukeba kwikalatu na bantu batemwa bintu byo mwatemwa nyi? Mumona byepi bakulumpe mu kipwilo kyenu banyike nangwa ba bikoba bikwabo nangwa bafuma mu bisho bikwabo? Inge twabula kujimuka, bino bintu byakonsha kuleta mabano.

18, 19. (a) Ñanyi lujimuno lwatongolwa pa Efisesa 4:1-3? (b) Twakonsha kuba byepi pa kuba’mba kipwilo kitwajijile kukwatankana?

18 Twakonsha kuchinuzhuka byepi ano makatazho? Paulo wajimwineko bena Kilishitu bajinga mu Efisesa, muzhi mwajinga bantu bafumine mu bisho byapusana pusana. (Tangai Efisesa 4:1-3.) Paulo watongwele byubilo nabiji kwipelula, kukooka muchima, butekanye ne butemwe. Bino byubilo biji nobe mashiki akosa alengela nzubo kubula kukunduka. Pa kuba’mba nzubo itwajijile kumweka bulongo, pakebewa kwingila na ngovu. Paulo wakebelenga bena Kilishitu bajinga mu Efisesa kwingila na ngovu “kulama buumo bwa mupashi mu mutende.”

19 Atweba bonse twafwainwa kwingila na ngovu pa kuba’mba tutwajijile kukwatankana mu kipwilo. Twakonsha kuba byepi bino? Kitanshi, twafwainwa kwikala na byubilo byatongwele Paulo. Bino byubilo ke: kwipelula, kukooka muchima, butekanye ne butemwe. Kya bubiji, twafwainwa kwingila na ngovu kutundaika “mutende ulengela kukwatankana.” Kupusenamo kuji nobe tumilala tucheche ku lukwatankano lwetu; onkao mambo, twafwainwa kwingila na ngovu kupwisha makatazho onse pa kuba’mba tutwajijile kukwatankana ne kwikala mu mutende.

20. Twakonsha kumwesha byepi amba twayuka’mba “Yehoba Lesa wetu ye Yehoba umotu”?

20 “Yehoba Lesa wetu ye Yehoba umotu.” Bino byambo byanema bingi. Bino byambo byakwashishe bena Isalela kuchinchika makatazho kimye kyo batwelele ne kushinda Ntanda ya Mulaye. Bino byambo byakonsha kwitutundaika ne atweba pa kuba’mba tukapuluke malwa akatampe ne kukekala mu Paladisa. Twayai twingijilengatu Yehoba bunke bwanji. Twafwainwa kumutemwa ne kumwingijilanga na muchima wetu yense, na maana etu onse, ne na bulume bwetu bonse, kabiji twafwainwa kwingila na ngovu pa kuba’mba twikale mu mutende na balongo betu ne kukwatankana. Inge twatwajijila kuba bino, tukekala pa mikooko ya kwa Yesu kimye kyo akeya na kuchibila bantu mambo kabiji tukemwena bikafika byambo byanji bya kuba’mba: “Iyai, anweba bo bapesha kwi Batata, swanai Bufumu bo bemunengezhejile ku ntendekelo ya ntanda.”—Mateo 25:34.