“Anweba Yehoba, . . . mwi Mbumbi wetu; atweba bonse twalengwa na maboko enu.”—ISAYA 64:8.

NYIMBO: 89, 26

1. Mambo ka Yehoba o aikela Mbumbi mukatampe kukila bantu bonse?

MU November 2010, bapoteeshe mulondo wa buchimba wa bena China pepi mamilyonyi 70 mu England. Twakonsha kukumya bingi kuba’mba mbumbi wakonsha kubumba kintu kyawama kufuma ku maloba ne kwikipotesha mali avula. Yehoba Mbumbi wetu wakila kintu kyonse kyakonsha kulenga bantu. Baibolo wamba’mba Yehoba walengele muntu walumbuluka “na lukungu lwa panshi,” ko kuba’mba kufuma ku buchimba. (Ntendekelo 2:7) Uno muntu wajinga Adama “mwana wa kwa Lesa” kabiji wajinga na bulume bwa kumwesha byubilo bijipo na Lesa.—Luka 3:38.

2, 3. Twakonsha kulondela byepi byaubile bena Isalela balapijile?

2 Adama walekele kwikala mwana wa kwa Lesa kimye kyo asatukijile Mulenga wanji. Bino baana ba kwa Adama bavula basalapo Yehoba kwikala Kalama wabo. (Bahebelu 12:1) Bakookela Mulenga wabo kabiji kino kimwesha’mba bakeba aye kwikala Shabo kabiji Mbumbi wabo, kechi Satana ne. (Yoano 8:44) Kwikala ba kishinka kwi Lesa wabo kwituvululamo  byaambile bena Isalela balapijile amba: “Anweba Yehoba mwi Shetu. Atweba twi buchimba, kabiji anweba mwi Mbumbi wetu; atweba bonse twalengwa na maboko enu.”—Isaya 64:8.

3 Lelo jino, bapopweshi ba kine ba Yehoba bebikako bingi kwikala bepelula ne kukookela Lesa. Bomvwa bulongo kutela Yehoba amba Shabo kabiji bakeba’mba ekale Mbumbi wabo. Nanchi tukeba kwikala byonka biji buchimba bwanekena pa kuba’mba Lesa etubumbe ne kwikala bipe bya buneme nyi? Nanchi tumona balongo ne banyenga kuba’mba Lesa ubena kukibabumba nyi? Pa kuba’mba twibamonenga bino, tusa kwisamba pa bantu Yehoba bo asala kubumba, kilengela kwibabumba ne byo ebabumba.

YEHOBA USALA BANTU BO ABUMBA

4. Yehoba usala byepi bantu bo akokela kwi aye? Tongolaipo bamo.

4 Yehoba kechi umona bantu byonka byo twibamona ne. Aye utala mu muchima ne kwituyuka bulongo byo tuji. (Tangai 1 Samwela 16:7b.) Yehoba wamwesheshe amba utala mu michima ya bantu kimye kyo atendekeshe kipwilo kya bena Kilishitu. Lesa wakokele bantu bo balengulwile kwiya kwi Aye ne ku Mwananji. (Yoano 6:44) Mufaliseo aye Saulo bamulengulwile mambo wajinga “wa mwenga, wamanyikanga bantu kabiji wa bulunji.” (1 Timoti 1:13) Bino Yehoba watajile mu muchima wa kwa Saulo, kechi wamulengulwile’mba buchimba bwatama ne. (Byambo bya Maana 17:3) Yehoba wamwene’mba wakonsha kubumba Saulo kwikala ‘muntu ye asala’ ukasapwila “ku bisaka bya bantu ne ku bamfumu ne ku bena Isalela.” (Byubilo 9:15) Kabiji Yehoba wasajile bantu bakwabo bo akonsheshe kubumba kwikala ‘bya kwingijilamo bya buneme,’ mwavwangilwe bantu bapendwapendwanga kala, ba bulalelale ne bangivi. (Loma 9:21; 1 Kolinda 6:9-11) Byo batendekele kufunda Binembelo, bakoseshe lwitabilo lwabo mwi Yehoba kabiji baswile kwibabumba kwi aye.

Kechi twafwainwa kulengulula bantu baji mu nyaunda yetu nangwa mu kipwilo ne

5, 6. Kuketekela Mbumbi wetu aye Yehoba kuketulengela kumonanga byepi (a) bantu baji mu nyaunda yetu? (b) balongo ne banyenga?

5 Twaketekela’mba Yehoba usala bantu bafwainwa bo akokela kwi aye. O ene mambo o twafwainwa kubujila kulengulwila bantu baji mu nyaunda yetu nangwa mu kipwilo. Akilangulukai pa byaubile mwanamulume umo wa jizhina ja Michael byo bamufwakashijile ku Bakamonyi ba kwa Yehoba. Waambile’mba: “Nebapangile. Namwesheshe byubilo byatama bingi. Palutwe kacheche, namonañene na kisemi kyajinga na byubilo byo natemenwe. Nakuminye bingi pa kuyuka’mba bajinga Bakamonyi ba kwa Yehoba. Byubilo byabo byandengejile kulangulukapo bulongo pa ene mambo o nashikijilwe Bakamonyi. Popo nayukile’mba kyandengejile kushikwa Bakamonyi ke bulubi ne bintu bya bubela  byaambanga bantu pe abo.” Michael wakebele kufunda byavula kabiji waswile kufunda Baibolo. Mu kuya kwa kimye, wabatizhiwe kabiji watendekele mwingilo wa kimye kyonse.

6 Umvwe twayuka’mba Yehoba ye Mbumbi wetu, tukamweshanga byubilo byawama ku balongo betu ne banyenga. Tukayuka’mba Yehoba ubena kukibabumba pa muntu pa muntu. Yehoba byobyo ebamona. Utala mu michima yabo kabiji wayuka’mba bumbulwakulumbuluka bwabo kechi bukatwajijila ne. Kabiji wayuka ne byubilo byawama byo bakonsha kwikala nabyo. (Salamo 130:3) Ne atweba twakonsha kumonanga bakwetu byonka bibamona Yehoba. Twakonsha kwingijila pamo na Mbumbi wetu kukwasha balongo betu ne banyenga kuwamisha byubilo byabo. (1 Tesalonika 5:14, 15) Bakulumpe mu kipwilo bo bafwainwa kwikala kulutwe mu kuba bino.—Efisesa 4:8, 11-13.

MAMBO KA YEHOBA O ETUBUMBILA?

7. Mambo ka o tusanchila inge Yehoba witufundako?

7 Bantu bamo bakonsha kwamba’mba: ‘Kechi natangako muchima ku lujimuno lwa bansemi ne, kufikatu ne kimye kyo naikele na baana bami.’ Inge twakoma, tunemeka lujimuno mambo twayuka’mba lumwesha butemwe. (Tangai Bahebelu 12:5, 6, 11.) Kine Yehoba witutemwa byo tuji baana banji, o ene mambo o etutekenya pa kwitufunda nangwa amba kwitubumba. Ukeba’mba twikale na maana ne lusekelo kabiji ne kumutemwa byo aji Shetu. (Byambo bya Maana 23:15) Kechi ukeba’mba tuyandenga ne, kabiji kechi ukeba’mba tukafwe kwa kubula kulapila ne.—Efisesa 2:2, 3.

Yehoba witutemwa byo tuji baana banji, o ene mambo o etutekenya pa kwitufunda nangwa amba kwitubumba

8, 9. Yehoba ubena kwitufunjisha byepi ano moba, kabiji ukatwajijila byepi kwitufunjisha mu ntanda ipya?

8 Kampe twajinga na byubilo byatama saka tukyangye kuyuka Yehoba. Bino Yehoba witubumbile kabiji witukwashishe kupimpula byubilo byetu, luno tuji na byubilo byawama. (Isaya 11:6-8; Kolose 3:9, 10) Twikala mu paladisa wa ku mupashi. Uno paladisa ke lunengezho lwawama lwabikako Yehoba lwa kwitukwasha pa kuba’mba etubumbe. Tumvwa’mba twazhikijilwa nangwa kya kuba twikala mu ino ntanda yatama. Aba bakomena mu bisemi mo babula kwitemwa, luno bomvwa’mba bataana butemwe mu balongo ne banyenga mu paladisa wa ku mupashi. (Yoano 13:35) Kabiji twafunda kutemwa bakwetu. Bino kyakilamo kunema, twayuka Yehoba kabiji tumumona’mba Shetu.—Yakoba 4:8.

9 Mu ntanda ipya, tukamwenamo bingi pa kwikala mu paladisa wa ku mupashi. Kabiji tukeyowanga bwikalo bwawama kimye ino ntanda kyo ikekala paladisa mu bukalama bwa Bufumu bwa Lesa. Pa kyokya kimye, Yehoba ukatwajijila kwitubumba ne kwitufunjisha mu mashinda awama bingi. (Isaya 11:9) Kabiji Yehoba uketukwasha kwikala na milanguluko ne mibiji yalumbuluka.  Inge wauba bino, kiketupelela kuyuka mikambizho yanji ne kwiikookela. Onkao mambo, twayai tuswishenga Yehoba kwitubumba ne kumwesha’mba twanemeka kino kishiino kimwesha’mba witutemwa.—Byambo bya Maana 3:11, 12.

YEHOBA BYO ETUBUMBA

10. Yesu wamwesheshe byepi muchima wa kutekanya ujipo na Mbumbi Mukatampe?

10 Byonkatu mbumbi byo ayuka biji buchimba bo abena kubumba, ne Mbumbi wetu aye Yehoba wituyuka bulongo. Wayuka kubula kukosa kwetu, bintu byo tukankalwa kuba, ne bintu byo twauba kabiji witubumba kwesakana na byo tuji. (Tangai Salamo 103:10-14) Twakonsha kuyuka Yehoba byo etumona inge twalanguluka Yesu byo aubanga na batumwa banji. Bimye bimo, batumwa bepachikilenga pa wajinga mukulumpe pe abo. Umvwe mwajingako, inge mwamwenenga byepi byubilo bya batumwa? Kampe inge mwalangulukilenga’mba kechi baji nobe buchimba bwanekena ne. Bino Yesu wayukile’mba Lesa wakonsha kwibabumba inge bateleka ku lujimuno lwanji ne kulondela kyubilo kyanji kya kwipelula. (Mako 9:33-37; 10:37, 41-45; Luka 22:24-27) Yesu byo asangwilwe, batumwa batambwile mupashi wa Lesa kabiji kechi batele muchima pa wajinga mukulumpe pe abo ne. Bino bateletu muchima pa mwingilo wibapeele Yesu.—Byubilo 5:42.

11. Davida waikele byepi nobe buchimba bwanekena, kabiji twakonsha kumulondela byepi?

11 Lelo jino, Yehoba wingijisha Baibolo, mupashi wanji wazhila ne kipwilo pa kwitubumba. Baibolo wakonsha kwitubumba byepi? Twafwainwa kumutanganga, kulanguluka languluka pa byo tutanga ne kulomba Yehoba amba etukwashe kwingijisha byo tufunda. Mfumu Davida wanembele’mba: “Nemuvuluka saka nji pa mwanya wami; ndanguluka languluka pe anweba mu bilo bya bufuku.” (Salamo 63:6) Kabiji wanembele’mba: “Nkamutotanga Yehoba, yenka wambuula bya kuba. Nangwatu mu kimye kya bufuku, milanguluko yami ya mukachi mwine, imfunjisha.” (Salamo 16:7) Kya kine, Davida walangulukanga pa lujimuno lwa Yehoba ne kwiluswisha kupimpula milanguluko yanji nangwa kya kuba bimye bimo lwakatazhanga kwilulondela. (2 Samwela 12:1-13) Twafwainwa kwikala na lukookelo ne kwipelula byonka byajinga Davida. Ishikishai amba: ‘Umvwe natanga Baibolo, nanchi ndanguluka languluka pa byo natanga ne kuswisha byamfundako Lesa kwalula ndangulukilo yami nyi? Nanchi nafwainwa kutwajijila kuba bino nyi?’—Salamo 1:2, 3.

12, 13. Yehoba witubumba byepi kwingijisha mupashi wazhila ne kipwilo kya bena Kilishitu?

12 Mupashi wazhila wakonsha kwitubumba mu mashinda avula bingi. Wakonsha kwitukwasha kwikala na byubilo bijipo ne Yesu ne kumwesha bipangwa bya mupashi byapusana pusana. (Ngalatiya 5:22, 23) Butemwe kyo kipangwa kimo kya mupashi. Twamutemwa Lesa kabiji tukeba kumukookela ne kuba’mba etubumbenga mambo twayuka’mba tumwenamo mu mikambizho yanji. Kabiji mupashi wazhila witupa bulume bwa kuchinuzhuka kwitubumba ku ino ntanda yatama. (Efisesa 2:2) Mutumwa Paulo byo ajinga mwanyike, bamufunjishe byubilo byatama ku bantangi ba bupopweshi bwa Bayudea bajinga na bwitote. Bino mupashi wazhila wamukwashishe kupimpula  byubilo byanji. Wanembele’mba: “Mambo bintu byonse nji na ngovu ya kwibyuba na mambo a yewa umpa bulume.” (Filipai 4:13) Ne atweba twafwainwa kulombanga mupashi wazhila mambo twayuka’mba Yehoba ukakumbula milombelo yetu ya kufuma panshi ya muchima.—Salamo 10:17.

Yehoba wingijisha bakulumpe mu kipwilo kwitubumba, pano bino, twafwainwa kumvwinanga lujimuno lwabo (Monai jifuka 12, 13)

13 Kabiji Yehoba wingijisha kipwilo ne bakulumpe kwitubumba. Inge bakulumpe bamona’mba muji mumo mo tubena kubula kuba bulongo, betukwasha. Bino kechi bamba byo balanguluka abo bene ne. (Ngalatiya 6:1) Pakuba balomba Yehoba kuba’mba ebakwashe ne kwibapa maana. Kabiji bakebakeba bishinka mu Baibolo ne mu mabuku a bwina Kilishitu pa kuba’mba betukwashe. Inge bakulumpe baiya na kwimukwasha mu jishinda ja butemwe, kampe pa mvwajilo yenu, vulukainga’mba lujimuno lwabo lumwesha’mba Lesa wimutemwa. Inge mwaumvwina lujimuno, mukekala nobe buchimba bwanekena Yehoba bo akonsha kubumba, kabiji mukamwenamo byawama.

14. Yehoba umwesha byepi’mba wanemeka luusa lwetu lwa kwifuukwila bintu nangwa kya kuba uji na luusa pe atweba?

14 Umvwe twayuka Yehoba byo etubumba, kiketukwasha kumvwañana bulongo na balongo ne banyenga. Kabiji tukamweshanga byubilo byawama ku bantu baji mu nyaunda yetu kubikapotu ne bo tufunjisha Baibolo. Mu kimye kyanembejilwengamo Baibolo, mbumbi saka akyangye kubumba kipe, wawamishanga buchimba, kufumyako tumabwe ne bintutu bikwabo. Mbumbi Mukatampe aye Yehoba ukwasha bantu bakeba kwibabumba. Kechi wibakanjikizha kupimpula byubilo byabo ne, bino wibabuulatu mizhilo yanji yawama. Apa bino abo bene basalapo kupimpula byubilo byabo nangwa ne.

15, 16. Bantu bafunda Baibolo bamwesha byepi’mba bakeba Yehoba kwibabumba? Ambai kyamwekele.

 15 Akilangulukai pa kyamwekejile nyenga Tessie wikala mu Australia. Kechi kyamukatezhe kufunda byamba Baibolo ne. Pano bino, kechi wapimpwile byubilo byanji ne, kabiji kechi wayanga na kupwila ne. Nyenga wamufunjishanga Baibolo walombele kwi Yehoba ne kufuukulapo kuleka kuya na kumufunjisha. Bino wakuminye bingi pa kyamwekele. Byo bafunjilenga, Tessie wabuujile wamufunjishenga kyalengejilenga kubula kupimpula byubilo byanji. Waambile’mba wimonanga kwikala kamfutumfutu mambo wakayanga makayo a kuchikapo mali. Pano wafuukwilepo kuleka ano makayo.

16 Nobe mu kukopatu kwa jiso, Tessie watendekele kupwila ne kwikala na byubilo bya bwina Kilishitu nangwa kya kuba balunda nanji ba kala bamusekelenga. Mu kuya kwa kimye, Tessie wabatizhiwe ne kwikala painiya wa kimye kyonse nangwa kya kuba wajinga na baana ba bacheche. Kyamwekeshatu patoka kuba’mba inge bo tufunjisha Baibolo batendeka kupimpula byubilo byabo pa kuba’mba batokeshe Lesa ku muchima, Lesa ukafwenya kwipi ne abo kabiji ukebabumba kwikala bipe bya buneme.

17. (a) Ñanyi bintu byo mwatemwa pe Yehoba byo aji Mbumbi wenu? (b) Ñanyi bintu byavwangwa mu kwitubumba byo tukesambapo mu mutwe walondelapo?

17 Leji jino, bambumbi bamo babumba bingi bulongo bipe byawama bya buchimba. Ne Yehoba naye witutekenya pa kwitubumba kwingijisha lujimuno lwanji, kabiji wituketa pa kuba’mba amone byo tusakuba inge witufundako. (Tangai Salamo 32:8.) Nanchi mwamona kuba’mba Yehoba wimutemwa nyi? Nanchi mubena kumona Yehoba byo abena kwimubumba nyi? Inge ibyo, ñanyi byubilo bikemukwasha kwikala nobe buchimba bwanekena Yehoba bo akonsha kubumba? Ñanyi byubilo byo mwafwainwa kuchinuzhuka pa kuba’mba mubule kwikala nobe buchimba bwakosa bo bakonsha kukankalwa kubumba? Bansemi bakonsha kwingijila byepi pamo ne Yehoba pa kubumba baana babo? Mutwe walondelapo ukakumbula ano mepuzho.