“Byo tubena kwingijila nanji pamo, twimusashijila namba mutambule lusa lukatampe lwa Lesa kabiji kange mwilwalule kwikala ke lwatutu ne.”—2 KOLINDA 6:1.

NYIMBO: 75, 74

1. Nangwa kya kuba Yehoba ye Mwine Wakila, ñanyi mwingilo ye aichilapo ba kwingila nanji?

YEHOBA ye Mwine Wakila. Ye walengele bintu byonse, kabiji uji na maana avula bingi ne na bulume bukatampe. Yehoba byo akwashishe Yoba kuyuka kino kishinka, Yoba waambile’mba: “Nayuka namba anweba mwakonsha kuba bintu byonse kabiji kafwako kintu kyo mwafuukula kuba kyo mwakonsha kukankalwa ne.” (Yoba 42:2) Yehoba wakonsha kuba byonse byo akeba kuba kwa kubula wa kumukwasha. Bino umwesha butemwe kupichila mu kwitako ba kwingila nanji mu kuba kyaswa muchima wanji.

2. Ñanyi mwingilo mukatampe Yehoba ye aichileko Yesu kwingijila pamo nanji?

2 Lesa walengele Mwananji, aye Yesu, saka akyangye kulenga muntu nangwa umo ne bintu byonse ne. Kepo Yehoba aswishishe Mwananji kumukwashako kulenga bintu byonse. (Yoano 1:1-3, 18) Mutumwa Paulo wanembele pe Yesu amba: “Bintu  byonse byalengelwe kupichila mwi aye, bya mwiulu ne bya pano pa ntanda, bimweka ne bibula kumweka, nangwa matanda nangwa bunkambo nangwa makafulumende nangwa ba luusa. Bintu byonse byalengelwe kupichila mwi aye kabiji byalengejilwe aye yenka.” (Kolose 1:15-17) Onkao mambo, Yehoba kechi wapelejiletu pa kupa Mwananji mwingilo mukatampe ne, bino wabuujile ne bantu pa uno mwingilo ye amupele. Uno ke munema mukatampe.

3. Ñanyi mingilo Yehoba yo apele Adama kwingila, kabiji mambo ka?

3 Yehoba waichileko ne bantu kuba’mba bengijilenga pamo ne aye. Kya kumwenako, waswishishe Adama kutumba banyama mazhina. (Ntendekelo 2:19, 20) Akifwanyikizhai lusekelo lwajinga ne Adama pa kwingila uno mwingilo. Wateleko maana kumona byamwekelenga banyama ne byo baubilenga, kepo ebatumbile mazhina ebafwainwa. Yehoba ye walengele banyama bonse, onkao mambo, inge wakebelenga, inge wibatumbile mazhina aye mwine. Pano bino, wamwesheshe Adama byo amutemenwe kupichila mu kumuswisha kutumba banyama mazhina. Kabiji Lesa wapele Adama mwingilo wa kwalula ntanda yonse kwikala paladisa. (Ntendekelo 1:27, 28) Pano bino, Adama wafuukwilepo kuleka kwingijila pamo ne Lesa, kabiji mwafumine buyanji bukatampe kwi aye mwine ne ku baana banji bonse.Ntendekelo 3:17-19, 23.

4. Bantu bamo baingijile byepi pamo ne Lesa kufikizha kyaswa michima wanji?

4 Mu kuya kwa moba, Lesa waichileko bantu bakwabo kwingijila pamo ne aye. Nowa wafiikile bwato mo apulukijile aye ne kisemi kyanji mu kimye kya Muyulo. Mosesa wapokolwele kisaka kya bena Isalela kufuma mu Ijipita. Yoshua watangijile bena Isalela kutwela mu Ntanda ya Mulaye. Solomone washimikile nzubo ya Lesa mu Yelusalema. Maliya wasemene Yesu. Abano bantu ba kishinka bonse ne bakwabotu bavula baingijile pamo ne Yehoba kufikizha kyaswa muchima wanji.

5. Ñanyi mwingilo ye twakonsha kwingilako, kabiji nanchi ko kuba’mba Yehoba kechi wakonsha kwingila uno mwingilo aye mwine nenyi? (Monai kipikichala kitanshi.)

5 Lelo jino, Yehoba witwita kwingila papelela bulume bwetu kutundaika Bufumu bwanji. Kuji mashinda avula bingi o twakonsha kwingijilamo Lesa. Nangwa kya kuba atweba bonse kechi twakonsha kumwingijila mu jishinda jimotu ne, bino atweba bonse twakonsha kusapwila mambo awama a Bufumu. Umvwe Yehoba wakebelenga, inge waingijile uno mwingilo aye mwine. Inge wakebelenga, inge waambilengatu na bantu pano pa ntanda aye mwine saka aji mwiulu. Yesu waambile’mba Yehoba wakonsha ne kulengela mabwe kubuula bantu pa Mfumu wa Bufumu bwanji. (Luka 19:37-40) Bino Yehoba wituswisha kwikala “ba mwingilo umo” ne aye. (1 Kolinda 3:9) Mutumwa Paulo wanembele’mba: “Byo tubena kwingijila nanji pamo, twimusashijila namba mutambule lusa lukatampe lwa Lesa kabiji kange mwilwalule kwikala ke lwatutu ne.” (2 Kolinda 6:1) Ke munema mukatampe bingi kwitwita kwingijila pamo ne Lesa. Twayai tumone ene mambo kino o kituletela lusekelo lukatampe.

KWINGIJILA PAMO NE LESA KWITULETELA LUSEKELO

6. Mubeji wa Lesa waambile’mba waumvwanga byepi kwingijila pamo na Shanji?

6 Kufumatu ne kala, kwingijila pamo ne Yehoba kuletela bakalume banji lusekelo. Saka akyangye kwiya pano pa ntanda, Mubeji wa Lesa waambile’mba: “Yehoba wandengele, kabiji  yami ntendekelo ya byo alenga . . . Najinga sendwe wanji. Kabiji wantemenwangakotu pa juba pa juba; naikalanga na lusekelo kwi aye kimye kyonse.” (Byambo bya Maana 8:22, 30) Kimye Yesu kyo aingijilenga pamo na Shanji, wajinga na lusekelo mambo waingijile bintu byavula kabiji wayukile’mba Yehoba wamutemwa. Pano nga atweba?

Ñanyi kintu kyakonsha kwituletela lusekelo kukila kufunjisha muntu bukine? (Monai jifuka 7)

7. Mambo ka mwingilo wa kusapwila o wituletela lusekelo?

7 Yesu waambile’mba twikala bingi na lusekelo kimye kyo tutambwila bintu ne kyo tupana. (Byubilo 20:35) Kituletejile bingi lusekelo kimye kyo twatambwijile bukine, pano bino, mambo ka o kituletela lusekelo inge ketubuuleko bakwetu bukine? Ke na mambo a kuba’mba tumona byo bekala bingi na lusekelo inge bayuka bifunjisha Baibolo ne kutendeka kwikala balunda na Lesa. Tumvwa bingi bulongo inge twamona byo bapimpula ndangulukilo yabo ne bwikalo bwabo. Mwingilo wa kusapwila ye mwingilo wanema bingi kabiji wituletela lusekelo kukila mingilo yonse yo twakonsha kwingila. Ulengela boba bekala balunda na Lesa kwikala na bumi bwa myaka ne myaka.2 Kolinda 5:20.

8. Bantu bamo baambapo amba ka pa lusekelo lufuma mu kwingijila pamo ne Yehoba?

8 Inge ketukwashe bantu kufunda pe Lesa, tuyuka’mba tubena kusangajika Yehoba kabiji usanta bingi pa kwibikako kwetu kumwingijila. Kino nakyo kituletela lusekelo. (Tangai 1 Kolinda 15:58.) Ba Marco bekala mu Italy, baambile’mba: “Nji na lusekelo lukatampe kuyuka’mba mbena kwingijila Yehoba papelela bulume bwami, kechi kwingijila muntu ne, mambo aye wakonsha kulubamo bukiji byo naingila.” Kyo kimotu ne ba Franco babena kwingijila mu Italy, nabo baambile’mba: “Kupichila mu Mambo anji ne bintu bya ku mupashi byo etupa, Yehoba wituvululamo pa juba pa juba byo etutemwa ne kuba’mba mingilo yonse yo tumwingijila yanema, nangwa kya kuba kwi atwe bene yakonsha kumweka nobe kechi yanema ne. O ene mambo kwingijila pamo ne Lesa o kundetela lusekelo ne kulengela bwikalo bwami kuwama.”

 KWINGIJILA PAMO NE LESA KWITULENGELA KUFWENYA KWIPI NE AYE NE NA BAKWETU

9. Bulunda bwajinga pakachi ka Yehoba ne Yesu bwajinga byepi, kabiji mambo ka?

9 Inge tubena kwingijila pamo na bantu bo twatemwa, tufwenya kwipi ne abo. Tutendeka kwibayuka bulongo ne kuyuka byubilo byabo. Tuyuka byo bakeba kuba mu bwikalo bwabo ne byo babena kuba pa kuba’mba bafikizhe byo bakeba. Yesu waingijile pamo ne Yehoba pa myaka ya kukankalwa kubala. Butemwe pakachi kabo bwakosele bingi kya kuba kafwako kintu kyakonsheshe konauna bulunda bwabo ne. Yesu walumbulwile byakosele buno bulunda bwabo byo aambile’mba: “Amiwa ne Batata twi umo.” (Yoano 10:30) Bakwatankene bingi, kabiji baumvwañananga bingi pa kwingila mingilo yabo.

Kusapwila kukosesha lwitabilo lwetu mambo kwituvululamo milaye ya Lesa ne mizhilo yanji ya butemwe

10. Mambo ka mwingilo wa kusapwila o witulengela kufwenya kwipi ne Lesa ne na bakwetu?

10 Yesu walombele Yehoba amba azhikijile baana banji ba bwanga. Mambo ka? Walombele’mba: “Kuba’mba bekale umo byonka anweba ne amiwa byo tuji umo.” (Yoano 17:11) Inge tubena kwikela mwayila mafunde a Lesa ne kwingila mwingilo wa kusapwila, tuyuka bulongo byubilo byanji byawama. Tufunda buwame buji mu kuketekela mwi aye ne kulondela lutangijilo lwanji. Kabiji inge twafwenya kwipi ne Lesa, ne aye ufwenya kwipi ne atweba. (Tangai Yakoba 4:8.) Kabiji tufwenya kwipi na balongo betu ne banyenga mambo tupita mu makatazho epasha na o bapitamo ne kumwena lusekelo mu bintutu bimo, kabiji bonse tuji na bikonkwanyi bimotu mu bwikalo. Twingijila pamo, kusekela pamo, ne kuchinchikila pamo mu makatazho. Ba Octavia bekala mu Britain, baambile’mba: “Kwingijila pamo ne Yehoba kundengela kufwenya kwipi na bakwetu.” Balumbulwile’mba kyalengela ke na mambo a kuba balenga balunda na bantu “bakeba kuba bintu byonka byo bakebapo kuba ne abo mu bwikalo bwabo.” Kine, ne atweba byo byo tumvwa. Inge twamona balongo betu byo bebikako kusangajika Yehoba, kitulengela kufwenya kwipi ne abo.

11. Mambo ka o tukakijilamo kufwenya kwipi na Yehoba ne na balongo betu mu ntanda ipya?

11 Pa kino kimye, butemwe bo twatemwa Lesa ne balongo betu bwakosa, bino bukakoselako bingi byo tukekalanga mu ntanda ipya. Akilangulukai pa mingilo yawama yo tukengilanga kulutwe na lwendo. Tukatambwilanga boba bakasangulwa ne kwibafunjisha pe Yehoba. Kabiji tukengilanga pa kuba’mba tukapimpule ntanda kwikala paladisa. Kikekala kya lusekelo bingi kwingijila pamo ne kuya na kulumbuluka pachepache mu bukalama bwa Kilishitu. Bantu bonse po po bakakilamo kufwenya kwipi na bakwabo ne na Yehoba, yenka ‘ukapa bilengwa byumi bintu byonse byo bikeba.’—Salamo 145:16.

KWINGIJILA PAMO NE LESA KWITUZHIKIJILA

12. Mwingilo wa kusapwila wituzhikijila byepi?

12 Twafwainwa kuzhikijila bulunda bwetu na Yehoba. Twikala mu ntanda ya kwa Satana  kabiji twi bambulwa kulumbuluka, onkao mambo, kyapeela kutendeka kulanguluka ne kuba bintu byonka byuba bantu ba mu ino ntanda. Kiji nobe kufwenka mu mukola kuya kubena kufumina mema. Onkao mambo, twafwainwa kufwenka na bulume pa kuba’mba tufike ko tubena kuya. Mu jishinda jimotu, twafwainwa kwibikako pa kuba’mba tubule kongolwa na bintu bya mu ntanda ya kwa Satana. Pano kusapwila kwituzhikijila byepi? Inge tubena kwamba pe Yehoba ne pa Baibolo, tuta muchima pa bintu byanema kabiji byawama, kechi pa bintu byakonsha kukookesha lwitabilo lwetu ne. (Filipai 4:8) Kusapwila kukosesha lwitabilo lwetu mambo kwituvululamo milaye ya Lesa ne mizhilo yanji ya butemwe. Kwitukwasha ne kutwajijila kwikala na byubilo byafwainwa kwitukwasha pa kuba’mba twizhikijile kwi Satana ne ntanda yanji.Tangai Efisesa 6:14-17.

Inge twapayankana mu mwingilo wa Yehoba, kechi twikala na kimye kya kutendeka kulanguluka pa makatazho etu ne

13. Kamonyi umo wikala mu Australia umvwa byepi pa mwingilo wa kusapwila?

13 Inge twapayankana mu kusapwila, kufunda, ne kwingijila bakwetu mu kipwilo, tuzhikijilwa mambo kechi twikala na kimye kya kutendeka kulanguluka pa makatazho etu ne. Ba Joel bekala mu Australia, baambile’mba: “Mwingilo wa kusapwila unkwasha kumona bintu byonka byo biji. Umvululamo makatazho abena kupitamo bantu ne buwame bo namwenamo mu kulondela mafunde a mu Baibolo mu bwikalo bwami. Mwingilo wa kusapwila unkwasha kwipelula; undengela kuketekela mwi Yehoba ne kuketekela balongo ne banyenga.”

14. Kuchinchika kwetu mu kusapwila kumwesha byepi amba mupashi wa Lesa uji ne atweba?

14 Kusapwila kwitulengela ne kushiinwa amba mupashi wa Lesa uji ne atweba. Kya kumwenako: Fwanyikizhai kuba’mba muji na mwingilo wa kupa bantu kajo kamo mu kimasamasa kyenu. Kechi mufola mali pa kwingila uno mwingilo ne, bino mwingijishatu mali enu. Kabiji bantu bavula kechi batemwa kajo ko mwibaletela ne, kabiji bamo bemushikwa na mambo a kwibaletela kano kajo. Nanchi mwakonsha kutwajijla kwingila uno mwingilo nyi? Mwakonsha kulefulwa bukiji ne kuleka kumwingila. Pano bino, atweba bavula twatwajijila kwingila mwingilo wa kusapwila myaka yonse, nangwa kya kuba witusendela kimye kyabaya ne mali avula bingi, kabiji ne bantu nabo betwendeleka nangwa kwituzhingijila. Kino kimweshatu patoka’mba mupashi wa Lesa ubena kwitukwasha.

KWINGIJILA PAMO NE LESA KUMWESHA BYO TWAMUTEMWA NE BYO TWATEMWA BAKWETU

15. Mwingilo wa kusapwila wakwatankana byepi na bintu Lesa byo akeba kubila bantu?

15 Mwingilo wa kusapwila wakwatankana byepi na bintu Yehoba byo akeba kubila bantu? Lesa wakebelenga’mba bantu bakekalenga myaka ne myaka, kabiji nangwa kya kuba Adama walengele mambo, kyaswa muchima wa Lesa kechi kyapimpwilwe ne. (Isaya 55:11) Lesa wabikileko lunengezho lwa kwitupokolola ku bundengamambo ne lufu. Waubile byepi  bino? Yesu waishile pano pa ntanda ne kupana bumi bwanji kwikala kitapisho. Bino pa kuba’mba bantu bamwenemo mu kitapisho kyanji, bafwainwa kukookela Lesa. Onkao mambo, Yesu wafunjishe bantu bikeba Lesa kwi abo, kabiji wakambizhe baana banji ba bwanga kuba byonka byo aubile. Inge tubena kusapwila ne kukwasha bantu kwikala balunda na Lesa lelo jino, ko kuba’mba tubena kwingijila pamo ne Lesa mu lunengezho lwaji lwa butemwe lwa kupokolola bantu ku bundengamambo ne lufu.

16. Mwingilo wa kusapwila wakwatankana byepi na mikambizho ikatampe ya Lesa?

16 Inge tubena kukwasha bantu kutaana jishinda jaya ku bumi bwa myaka ne myaka, tumwesha’mba twibatemwa kabiji twatemwa Yehoba. Aye “wakeba’mba bantu bonse bapuluke ne kuyukisha bulongo bukine.” (1 Timoti 2:4) Kimye Mufaliseo umo kyo aipwizhe Yesu pa mukambizho mukatampe wa Lesa, Yesu waambile’mba: “‘Wafwainwa kutemwa Yehoba Lesa wobe na muchima wobe yense, ne na mweo wobe yense ne na maana obe onse.’ Uno ye mukambizho mukatampe kabiji ye mutanshi. Wa bubiji wapasha uno, ke uno: ‘Wafwainwa kutemwa mukwenu byonka byo witemwa obe mwine.’” (Mateo 22:37-39) Inge tubena kusapwila mambo awama, ko kuba’mba tubena kukookela ino mikambizho.Tangai Byubilo 10:42.

17. Mumvwa byepi pa munema wa kusapwila mambo awama?

17 Kine twatokwa bingi. Yehoba witupa mwingilo wituletela bingi lusekelo, witulengela kufwenya kwipi ne aye ne na balongo betu, kabiji witukwasha kuzhikijila bulunda bwetu ne aye. Kabiji witulengela kumwesha byo twatemwa Lesa ne bakwetu. Yehoba uji na bakalume banji bavula bingi kuzhokoloka ntanda, kabiji bano bonse bapita mu makatazho apusana pusana. Bino umvwe twi banyike nangwa bakikulumpe, banonshi nangwa bayanji, bakosa nangwa babula kukosa, bonse twibikako kubuulako bakwetu bintu byo twaitabilamo. Tumvwatu byonka byumvwa ba Chantel bekala ku France, baambile’mba: “Mwine wa bulume bonse, Mulenga wa bintu byonse, kabiji Lesa wa lusekelo, ubena kuñambila’mba: ‘Yanga ukambe! Ukañambileko, ukambe na muchima yense. Nakupa bulume bwami, Mambo ami Baibolo, bukwasho kufuma mwiulu, bakwenu pa ntanda, nakufunjisha ne kukupa mikambizho yawama pa kimye kyafwainwa.’ Ke munema mukatampe bingi kwingila mwingilo witupa Yehoba ne kwingijila pamo ne Lesa wetu!”