“Bulunda bwa pa muchima ne Yehoba buji na boba bamwakamwa.”—SALAMO 25:14.

NYIMBO: 106, 118

1-3. (a) Mambo ka o twashiinwa’mba ne atweba twakonsha kwikala balunda na Lesa? (b) Bañanyi bo tusakwisambapo mu uno mutwe?

MU BAIBOLO, Abalahama bamutela bimye bisatu amba mulunda na Lesa. (2 Byambo bya Moba 20:7; Isaya 41:8; Yakoba 2:23) Ye yenkatu mu Baibolo ye batongola mu kushinkamika amba mulunda na Lesa. Nanchi kino kibena kulumbulula’mba Abalahama ye muntutu wajinga mulunda na Yehoba nyi? Ine. Baibolo umwesha’mba ne atweba bonse twakonsha kwikala balunda na Lesa.

2 Mu Mambo a Lesa muji mashimikila avula a banabalume ne banabakazhi ba kishinka bavula baakamwanga Yehoba ne kwitabila mwi aye, kabiji baikele balunda nanji. (Tangai Salamo 25:14.) Bonse bano baji mu ‘jibumba jikatampe ja bakamonyi’ jatongwele Paulo. Bano bantu bonse bajinga balunda na Lesa.Bahebelu 12:1.

3 Twayai twisambe pa balunda ba Yehoba basatu bo baambapo mu Baibolo: (1) Luta, mwanamukazhi wafwilwa wa kishinka wafumine ku Moabu, (2) Hezekiya, mfumu wa Yuda wa kishinka, ne (3) Maliya inanji Yesu, kabiji mwanamukazhi wipelwile.  Twakonsha kufunjilako ka ku bano bonse byo baikele balunda na Lesa?

WAMWESHESHE BUTEMWE BUBULA KWALUKA

4, 5. Ñanyi kintu kyakatazha kyafwainwe kufuukula Luta, kabiji mambo ka o kyakatezhe? (Monai kipikichala kitanshi.)

4 Naomi ne balokazhi banji abo ba Luta ne Olipa, baendelenga lwendo lwalepa kufuma ku Moabu kuya ku Isalela. Saka bakijitu mu jishinda, Olipa wafuukwilepo kubwela kwabo ku Moabu. Bino Naomi wakebeshe kubwela kwabo ku Isalela. Nga Luta wafuukwilepo kuba ka? Kyamukatezhe bingi kufuukula bya kuba. Nanchi wafwainwe kubwela kwabo ku Moabu na kwikala na kisemi kyanji nyi, inyi kuya ne Naomi, muko wanji wa mukazhi ku Betelema?Luta 1:1-8, 14.

Kisemi kya kwa Luta kyaikalanga mu Moabu. Umvwe wabwelele kwabo, bakonsheshe kumutambwila ne kumulama bulongo. Wayukile bantu ba mu Moabu, mulaka wabo, ne bisho byabo. Naomi kechi wakonsheshe kupa Luta bino byonse inge waya nanji ku Betelema ne. Kabiji Naomi waakaminwe’mba kechi ukakonsha kukebela Luta mwanamulume wa kumusongola nangwa nzubo ne. Onkao mambo, Naomi wamwambijile kubwela ku Moabu. Byonka byo twamona kala, Olipa wabwelele “ku balongo banji ne ku balesa banji.” (Luta 1:9-15) Pano bino, Luta wakaine kubwela ku bantu banji ne balesa babo babubela.

6. (a) Ñanyi kintu kyawama kyafuukwilepo Luta? (b) Mambo ka Boaza o aambijile’mba Luta wafyamine mu byapi bya Yehoba?

6 Kyamweka Luta wafunjile pe Yehoba ku bamwatawanji nangwa kwi Naomi. Wafunjile’mba Yehoba wapusanako na balesa ba bena Moabu. Watemenwe Yehoba kabiji wayukile’mba ye yenkatu ye afwainwe kutemwa ne kupopwela. Onkao mambo, Luta wafuukwilepo kuba kintu kyawama. Wabuujile Naomi amba: “Balongo benu bakekala balongo bami, ne Lesa wenu ukekala Lesa wami.” (Luta 1:16) Inge twalanguluka pe Luta byo atemenwe Naomi, kitusangajika bingi. Bino kintu kikatampe kitusangajika ke butemwe Luta bo atemenwe Yehoba. Kino kyasangajikile ne Boaza, wamutakaikile na mambo a ‘kufyama mu byapi bya Yehoba.’ (Tangai Luta 2:12.) Byambo byaambile Boaza byakonsha kwituvululamo kaana ka ñonyi byo kafyama mu byapi bya inako pa kuba’mba kazhikijilwe. (Salamo 36:7; 91:1-4) Mu jishinda jimotu, Yehoba wazhikijile Luta ne kumufweta pa lwitabilo lwanji. Luta kechi wilangulwishepo pa kintu kyo afuukwile kuba ne.

7. Ki ka kyakonsha kukwasha boba bakankazhama kwipana kwi Yehoba?

7 Bantu bavula bafunda pe Yehoba, bino kechi bafuukulapo kufyama mwi aye ne. Bakankazhama kwipana kwi aye ne kubatizhiwa. Umvwe byo byo mumvwa, langulukai pa kimulengela kukankazhama kwipana. Muntu yense uji na lesa ye apopwela. (Yoshua 24:15) Kintu kyawama ke kufuukulapo kwingijila Lesa wa kine. Inge mwipana kwi Yehoba, mumwesha’mba mwaitabila’mba ye kya kufyamamo kyenu. Kabiji ukemukwasha kutwajijila kumwingijila nangwatu inge kemupite mu makatazho. Abino Lesa byo byo akwashishe Luta.

“WAKAKACHIJILE KWI YEHOBA”

8. Lumbululai byajinga nkomeno ya kwa Hezekiya.

8 Nkomeno ya kwa Hezekiya yapuseneko na ya kwa Luta. Wasemekejilwe mu kisaka kya bantu bepana kwi Lesa. Pano bino, kechi bena Isalela bonse bajinga ba kishinka ne. Shanji Hezekiya, aye Mfumu Ahaza wajinga  mubi. Walengulwile nzubo ya Lesa ne kulengela bantu kutendeka kupopwela balesa bangi. Ahaza wasokelepo ne baana banji bamo bomi mu mujilo ne kwibatapisha ku balesa babubela. Hezekiya wakomejile mu kisemi kyatama bingi.2 Bamfumu 16:2-4, 10-17; 2 Byambo bya Moba 28:1-3.

9, 10. (a) Ñanyi bintu byakonsheshe kulengela Hezekiya kuzhingijila Lesa? (b) Mambo ka o twafwainwa kubujila kuzhingijila Lesa? (c) Mambo ka o twafwainwa kubujila kulanguluka’mba nkomeno yetu yo itulengela kwikala na byubilo byawama nangwa byatama?

9 Byubilo byatama bya kwa Ahaza byakonsheshe kulengela mwananji, aye Hezekiya kuzhingijila Yehoba. Lelo jino, bantu bamo babula ne kupita mu bintu byapichilemo Hezekiya balanguluka’mba kwesakana na byo bapitamo, bafwainwa ‘kuzhingijila Yehoba’ nangwa jibumba janji. (Byambo bya Maana 19:3) Bakwabo nabo balanguluka’mba kukomena mu kisemi kyatama ko kwibalengela kwikala bwikalo bwatama nangwa kubwezhapo kuba byatama byonka byaubanga bansemi babo. (Ezikyo 18:2, 3) Bino nanchi ino ndangulukilo ijitu bulongo nyi?

10 Bwikalo bwa kwa Hezekiya bumwesha’mba ino ndangulukilo kechi iji bulongo ne. Kafwako kintu nangwa kimo kyafwainwa kwitulengela kuzhingijila Yehoba ne. Kechi ulengela bintu byatama kumwekela bantu ne. (Yoba 34:10) Ibyo kuba’mba bansemi bakonsha kufunjisha baana babo kuba byawama nangwa byatama. (Byambo bya Maana 22:6; Kolose 3:21) Pano bino, kino kechi kilumbulula’mba nkomeno yetu yo iketulengela kuba byawama nangwa byatama ne. Mambo ka? Mambo Yehoba witupa bupe bwawama, kibena kulumbulula’mba tuji na luusa lwa kwifuukwilapo kuba byawama nangwa byatama. (Mpitulukilo ya mu Mizhilo 30:19) Hezekiya waingijishe byepi buno bupe bwawama?

Banyike bavula batambwila bukine nangwa kya kuba bakomejile mu bisemi byakatazha (Monai mafuka 9, 10)

11. Ñanyi bintu byalengejile Hezekiya kwikala mfumu wawama bingi wa mu Yuda?

11 Nangwa kya kuba shanji wajinga pa bamfumu babi bajingako mu Yuda, bino Hezekiya waikele mfumu wawama bingi. (Tangai 2 Bamfumu 18:5, 6.) Kechi walondejile byubilo byatama bya bashanji ne. Pakuba, aye wafuukwilepo kumvwina bangauzhi ba Yehoba nabiji Isaya, Mika, ne Hoseya. Wateleko bingi maana ku byo bamufunjilenga ne byo bamolwelengako. Kino kyamutundaikile kuwamisha bintu byavula byo  bashile batamisha bashanji. Watokeshe nzubo ya Lesa, ne kulomba Lesa amba alekeleko bantu mambo, kabiji waonawine bankishi bonse mu kyalo. (2 Byambo bya Moba 29:1-11, 18-24; 31:1) Palutwe kacheche, kimye mfumu wa bena Asilya aye Senakelibu kyo akebelenga kulukuka Yelusalema, Hezekiya wamwesheshe lwitabilo ne kuchinchika. Waketekejile mu luzhikijilo lwa Yehoba ne kukosesha bantu. (2 Byambo bya Moba 32:7, 8) Kimye kimo, Hezekiya wilundumikile, bino Yehoba byo amolweleko, wipelwile. (2 Byambo bya Moba 32:24-26) Kine, Hezekiya ke wa kumwenako wawama ye twafwainwa kulondela. Kechi waswishishe bwikalo bwanji konaika na mambo a kukomena mu kisemi kyatama ne. Pakuba, aye wamwesheshe’mba wajinga mulunda na Yehoba.

12. Byonka byaubile Hezekiya, bantu bavula lelo jino bamwesha byepi amba balunda na Yehoba?

12 Bantu mu ntanda lelo jino bakanama bingi ne kubula butemwe. Kabiji baana bavula bakoma kwa kubula kwibamwesha butemwe nangwa kwibata muchima ku bansemi babo. (2 Timoti 3:1-5) Nangwa kya kuba bena Kilishitu bavula lelo jino bakomejile mu bisemi byakatazha, basalapo kwikala balunda na Yehoba. Byonka byaubile Hezekiya, bamwesha’mba nkomeno yabo kechi yo yafwainwa kwibalengela kwikala bantu batama ne. Lesa witupa luusa lwa kwifuukwila, kabiji twakonsha kufuukulapo kumwingijila ne kumunemeka, byonka byaubile Hezekiya.

“AKITALAI! MUZHA WA MUKAZHI WA YEHOBA!”

13, 14. Mambo ka mwingilo wa kwa Maliya o amwekejile kukatazha, bino wakumbwile byepi pa kumvwa byamwambijile Ngabaliela?

13 Byo papichile myaka yavula bingi kufuma pafwijile Hezekiya, kwajinga nsongwakazhi wipelwile bingi, aye Maliya wajinga na bulunda bwawana na Yehoba, kabiji ye bapele mwingilo wanema. Bamwambijile’mba ukemita ne kusema Mwana Lesa ne kumukomesha. Yehoba wafwainwa watemenwe Maliya ne kumuketekela pa kuba’mba amupe uno munema mukatampe. Pano Maliya waubile byepi kimye kitanshi kyo bamubuujile pa uno mwingilo?

“Akitalai! Muzha wa mukazhi wa Yehoba!” (Monai mafuka 13, 14)

14 Javula twambapo bingi pa munema mukatampe ye bapele Maliya. Pano ñanyi bintu bimo byakonsheshe kumulengela kwakamwa? Kya kumwenako, malaika Ngabaliela wamwambijile’mba ukemita kwa kubula kulaalapo na mwanamulume. Bino Ngabaliela kechi wabuujilepo Maliya amba usakulumbulwila kisemi kyanji nangwa bakinkalankulo byo akemita ne. Bantu bakonsheshe kumumona byepi? Wakonsheshe byepi kulumbulwila Yosefwa amba kechi wauba bulalelale ne? Kabiji wajinga ne na mwingilo mukatampe wa kukomesha Mwana Lesa mu bumuntu. Kechi twayuka byonse byaakaminwe Maliya ne, bino twayuka byo aubile panyuma ya kwisamba ne Ngabaliela. Waambile’mba: “Akitalai!  Muzha wa mukazhi wa Yehoba! Kimmwekele monka mo mwaambila.”—Luka 1:26-38.

15. Mambo ka lwitabilo lwa kwa Maliya o lwaikela lwa kukumya?

15 Lwitabilo lwa kwa Maliya lwabayile bingi. Wipaine kuba byonse byo bamubuujile, byonka bipana muzha wa mukazhi. Waketekejile’mba Yehoba ukamulama ne kumuzhikijila. Maliya waikele byepi na lwitabilo lwakosa bino? Kechi tusemwa na lwitabilo ne. Pano bino, twakonsha kwikala na lwitabilo inge twibikako ne kulomba Lesa amba etukwashe kwikala nalo. (Ngalatiya 5:22; Efisesa 2:8) Maliya waingijile bingi pa kuba’mba akoseshe lwitabilo lwanji. Twayuka byepi? Twayai tumone byo atangako muchima ku bintu ne byambo byo aambile.

16. Ki ka kimwesha’mba Maliya watangako muchima ku byambo byo aumvwanga?

16 Maliya watelekanga ne kulama mu muchima bintu byo aumvwanga. Baibolo waamba’mba: ‘Twafwainwa kupelawizha kumvwa, ne kubanda kwamba.’ (Yakoba 1:19) Maliya watelekeshanga inge bantu babena kwamba. Baibolo umwesha’mba watangako bingi muchima ku bintu byo aumvwanga, kikatakata bintu byo afunjilenga pe Yehoba. Waikalangapo na kimye kya kulanguluka languluka pa bino bintu byanema. Kya kumwenako, pa juba jasemekelwe Yesu, Maliya wateleko muchima kimye bakafunga kyo bamubuujile byambo bibambijile malaika. Kabiji Yesu byo afikizhe myaka 12, waambilepo byambo bimo byakumishe Maliya. Pa bino bimye bibiji, Maliya watelekeshe, kulanguluka langulukapo, ne kulama mu muchima byambo byonse byo aumvwinenga.—Tangai Luka 2:16-19, 49, 51.

17. Byambo byaambile Maliya byakonsha kwitufunjishapo ka pe aye?

17 Byambo byaambanga Maliya. Baibolo kechi witubuulapo byavula pa byambo byaambile Maliya ne. Byambo byavula pa byonse byaambile Maliya byanembwa mu Luka 1:46-55. Abino byambo bimwesha’mba Maliya wayukile bingi Binembelo bya Kihebelu. Mu ñanyi jishinda? Byambo bya kwa Maliya bipasha bingi na byambo byaambile Hana, inanji Samwela mu lulombelo. (1 Samwela 2:1-10) Pa kyonka kimye Maliya kyo aambilenga bino byambo, watongawile byambo bya mu Binembelo bimye nobe 20. Kyamwekatu patoka’mba watemenwe bingi kwamba pa bukine bo afunjile ku Mulunda nanji wakila, aye Yehoba.

18. Mu ñanyi mashinda mo twakonsha kulondela lwitabilo lwa kwa Maliya?

18 Byonka byo kyajinga kwi Maliya, ne atweba kimye kimo Yehoba wakonsha kwitupa mingilo yakonsha kumweka kukosa. Byonka byaubile Maliya, twayai twipelule ne kutambwila ino mingilo ne kuketekela’mba Yehoba uketukwasha. Twakonsha ne kulondela lwitabilo lwa kwa Maliya inge ketute muchima ku byambo bya Yehoba ne kulanguluka languluka pa byo twafunda pe aye ne pa kyaswa muchima wanji. Po po tukakonsha kubuulako bakwetu na lusekelo bintu byo twafunda.—Salamo 77:11, 12; Luka 8:18; Loma 10:15.

19. Byo tubena kulondela bantu banembwa mu Baibolo bajinga na lwitabilo lwakosa, ñanyi kintu kyo twakonsha kutengelanga?

19 Twamonatu patoka’mba Luta, Hezekiya ne Maliya bajinga balunda na Yehoba, byonka byajinga Abalahama. Abano bonse bajinga pa ‘jibumba jikatampe ja bakamonyi’ bajinga balunda na Lesa. Twayai tutwajijile kulondela lwitabilo lwabo lwakosa. (Bahebelu 6:11, 12) Inge twauba bino, tukakonsha kutengela mfweto ya kwikala balunda na Yehoba myaka ne myaka!