Nabuujile mushilikale amba bankasapo kala mu kaleya mambo kechi nevwanga mu nkondo ne. Namushikishe’mba, “Musakunkasa jibiji nyi?” Kino kyo kyajinga kimye kya bubiji kunkanjikizha kutwela bushilikale mu kyalo kya United States.

NASEMEKELWE mu 1926 mu muzhi wa Crooksville, Ohio, mu United States. Batata ne Bamama kechi bateleko maana ku bya bupopweshi ne, bino bakebelenga amba atweba baana babo 8 tuyenga ku chechi. Nayanga ku chechi wa Methodist. Kimye kyo najinga na myaka 14, ba pashita bampele kilambu mambo kechi nashajilepo ku chechi mu mwaka yense ne.

Ba Margaret Walker (ba bubiji kufuma ku kipiko) bo bankwashishe kufunda bukine

Pa kyonkakya kimye, ba Margaret Walker, Bakamonyi ba kwa Yehoba baikalanga kwipi na nzubo yetu, batendekele kwisamba ne bamama pa bya mu Baibolo. Juba jimo, nafuukwilepo kutaanwako ku misambo yabo. Bamama balangulukilenga’mba kampe nsakuvulañanyatu mwisambo, onkao mambo bampangilemo mu nzubo. Bino natwajijile kweseka kumvwa byo besambilenga. Panyuma ya kufwakesha bamama bimye byavula, ba Margaret banshikishe’mba, “Abya, wayuka jizhina ja Lesa nyi?” Nakumbwile’mba, “Bantu bonse bayuka’mba jizhina janji, Lesa.” Bañambijile’mba, “Tola Baibolo wobe ne kutanga Salamo 83:18.” Natangilepo ne kutaana amba jizhina ja Lesa, Yehoba. Nanyemejile pangye ne kuya na kubuula bakwetu amba, “Inge muye ku mazubo mabanga ano, mutange Salamo 83:18 mu Baibolo ne kumona jizhina ja Lesa.” Kyajingatu nobe natendekele kusapwila ponkapotu.

Natendekele kufunda Baibolo kabiji nabatizhiwe mu 1941. Panyumatu ya kubatizhiwa, bampele mwingilo wa kutangijila lufunjisho lwa buku lwa kipwilo. Natundaikile bamama ne bankasami kutendeka kutaanwako, kabiji nabo batendekele kwiya. Bino batata kechi bakebelenga ne.

KUNKANYA MU KISEMI

Bampele ne mingilo ikwabo mu kipwilo kabiji natambwilanga mabuku a Bakamonyi ba kwa Yehoba avula. Juba jimo, Batata batongwele munwe ku mabuku ami ne kwamba’mba: “Wibimona byonse abya bimabuku? Wibisende byonse ufumepo ne pa nzubo yami.” Nafuminepo pa nzubo ne kuya na kwikala mu muzhi wa Zanesville, Ohio, wajingatu kipi kipi. Bino nayanga jonse na kutundaika ba mu kisemi kyami.

Batata baesekele kukanya Bamama kutaanwanga ku kupwila. Bimye bimo inge bamama babena kuya na kupwila, batata bebapangishanga ne kwibabwezha ku nzubo. Bino baubanga inge bebabwezha mu nzubo,  balupukila ku kibelo kikwabo ne kuya na kupwila. Nabuujile Bamama amba: “Kwakamwa ne. Juba jimo bakakooka na kwimupangisha.” Mu kuya kwa kimye, Batata bekilekele kukanya bamama, kabiji bamama bakasulukile kuya na kupwila.

Kimye kyatendekele Sukulu wa Mwingilo wa Lesa mu 1943, natendekele kwamba majashi mu sukulu mu kipwilo kyetu. Byo bamfunjishanga panyuma ya kwamba jashi byankwashishe kwikala mufunjishi wafikilamo.

KUBULA KULWAKO NKONDO

Mu 1944, kimye kyo kwajinga Nkondo ya Bubiji ya Ntanda Yonse, bankanjikizhe kutwela bushilikale. Nayile ko batwezhezhenga bashilikale ku Fort Hayes mu Columbus, Ohio. Bampimine ne kumpa mapepala a kunembesheshapo, kabiji nanembele. Bino nabuujile ne batwezhezhenga amba kechi nkeba kwikala mushilikale ne. Bandekeleko amba ngyenga ku nzubo. Pano bino, byo papichiletu moba acheche, kapokola waishile ku nzubo ne kuñambila’mba, “Corwin Robison, bantuma kwiya na kukukwata.”

Pa kupitapo milungu ibiji, byo twajinga mu kije kya mambo, mutonyi wañambijile’mba: “Inge yami naji kukuchibilanga mambo bunke bwami, inge nakukasa kufikatu ne byo ukafwa. Usakwambapo amba ka?” Nakumbwile’mba: “Mwane Nkambo, bafwainwe kubika jizhina jami pa mutanchi wa mapashita, mambo nsapwila mambo a Bufumu ku bantu bavula bingi. Pa bibelo bya mazubo a bantu pajitu nobe pa mutuntamo kwi amiwa.” Mutonyi wabuujile kije amba: “Kechi mwaji kwiya kuno amba mushiinwe inge kya kuba uno nsongwalume ke pashita nangwa ne. Mwaiya kuno na kushiinwa inge kya kuba wayile na kutwela bushilikale nangwa ne.” Mu maminiti achechetu, kije kyamfwishishe na mambo. Mutonyi wafuukwilepo kunkasa myaka itanu mu kaleya ka ku Ashland, Kentucky.

YEHOBA WANZHIKIJILE MU KALEYA

Milungu itanshi ibiji, naikele mu kaleya ka mu Columbus, Ohio. Byo naikelemo juba jitanshi, nalombele kwi Yehoba amba: “Kechi nakonsha kwikala mu kaleya pa myaka itanu ne. Kana nsakuba byepi?”

Juba jalondejilepo, bakasopa banswishishe kulupuka pangye. Nayile kwajinga kaili wazama bingi, kabiji twaimene saka tutajisha mu kipenze. Wanshikishe’mba, “Ñanyi mambo o bakukashilapo?” Namukumbwile’mba, “Yami Kamonyi wa kwa Yehoba.” Waambile’mba, “Nanchi wi Kamonyi? Pano mambo ka o bakukashila?” Namukumbwile’mba, “Bakamonyi kechi baya ku nkondo na kwipaya bantu ne.” Kepo aambile’mba, “Bakukasa mu kaleya na mambo a kuba kechi wipaya bantu ne. Kabiji babwela bakasa ne bantu bakwabo na mambo a kuba bepaya bantu. Nanchi muji maana nyi?” Namukumbwile’mba, “Ine.”

Kepo aambile’mba, “Najinga mu kaleya kakwabo pa myaka 15, kabiji mo mo natanganga mabuku enu.” Pa kumvwa waamba bino, nalombele namba, “Yehoba, nkwashai pa kuba’mba tumvwañanenga na uno muntu.” Ponkapotu, uno kaili, wa jizhina ja Paul,  wañambijile’mba: “Uji yense ukakukwatamotu, ukangite. Nkayuka bya kumuba.” Onkao mambo, kimye kyo najinga mu koka kaleya, kafwako wankatezhenga pa bakaili bonse 50 bajinga kokwa ne.

Najinga pamo na Bakamonyi bo bakashile mu kaleya ku Ashland, Kentucky na mambo a kubula kulwako nkondo

Kimye bakapokola kyo bantwajile ku kaleya ka ku Ashland, nataaineko balongo bo bakashile konkakwa. Bankwashishe pamo na bakwetu bajingako kukosesha bulunda na Yehoba. Betupele mwingilo wa kutanga Baibolo, kabiji twanengezhanga mepuzho ne mikumbu ya kupwila ko twatelanga’mba Bible Bees. Mu kaleya, twajinga mu kibamba kikatampe mwajinga myanya munsa munsa. Kwajinga mulongo witupanga kwa kusapwila. Wambuulanga’mba: “Robison, obewa usakusapwila myanya kananga ne kananga. Yense uji pa yewo mwanya uji mu nyaunda yobe. Wafwainwa kumusapwila saka akyangye kulupuka.” Byo byo twasapwilanga mu ndonda.

BYO NATAAINE PANYUMA YA KUFUMA MU KALEYA

Nkondo ya Bubiji ya Ntanda Yonse yapwile mu 1945, pano bino kechi bankasulwile ponkapotu ne. Naakaminwe bingi pa ba mu kisemi mambo Batata bañambijile’mba, “Umvwe kya kuba obewa nakonsheshe kukupanga, abe bashala kyapeleshatu.” Byo bankasulwile, nakuminye bingi na byo nataaine. Bantu 7 ba mu kisemi kyetu bataainwenga ku kupwila kabiji nyenga yami umo wabatizhiwe, nangwa kya kuba Batata bebakanyanga.

Saka tubena kuya mu mwingilo ne ba Demetrius Papageorge, mulongo washingwa watendekele kwingijila Yehoba mu 1913

Nkondo ya bena Korea byo yatendekele mu 1950, bañambijile jibiji amba ntwele bushilikale ne kuya jikwabo ku Fort Hayes. Panyuma ya kumpima kumona inge nafikilamo, kapokola wañambijile’mba, “Wafikilamo kukila bakwenu bavula bingi.” Nakumbwile’mba, “Kyawama, pano kechi nsakutwela bushilikale ne.” Nebabuujile byanembwa pa 2 Timoti 2:3 ne kwamba’mba, “Amiwa nemushilikale wa kwa Kilishitu.” Panyuma ya kuzhindama pa kimye kyabaya, bañambijile’mba, “Yanga.”

Panyumatu ya byobyo, nataainwe ku kusambakana kwa bakeba kuya ku Betele pa kushonkena kwajingako mu muzhi wa Cincinnati, mu Ohio. Mulongo Milton Henschel witubuujile’mba kwakebewenga bingi balongo ba kuya ku Betele na kwingila mingilo ya Bufumu na bulume bwabo bonse. Nanembele pepala wa kuya ku Betele kabiji bangichile. Natendekele kwingijila ku musampi wa mu Brooklyn mu August 1954, kabiji naingijila pa Betele kufumatu kyokya kimye.

Ngikala na mingilo yavula pa Betele. Pa myaka yavula, naingijilanga ku minkinyi ikatampe iji mo bapulinchila mabuku, ne kuwamisha binzhilo. Naingijila ne ku Mazubo a Kubuñenamo mu New York City.

Saka ñingijila ku minkinyi mu bishimikwa bya ma ofweshi pa Betele ku Brooklyn

Natemwa bingi mitanchi iji pa Betele nabiji kubalaula balaula binembelo lukelo, Lufunjisho lwa Kyamba kya Usopa, ne kusapwila pamo na basapwishi mu kipwilo. Inge mwalangulukapo bulongo, abino byo byafwainwa kubanga bisemi bya Bakamonyi ba kwa  Yehoba kimye kyonse. Inge bansemi kebabalaule kinembelo kya pa juba na baana babo, kwikala na Kupopwela kwa Kisemi kimye kyonse, kupwila, ne kusapwila mambo awama na mukoyo, bonse mu kisemi bakekala na bulunda bwawama na Yehoba.

Nalenga balunda bavula bingi pa Betele ne mu kipwilo. Bamo bajinga bashingwa kabiji baya mwiulu. Bakwabo kechi bajinga bashingwa ne. Pano bino, bakalume ba Yehoba bonse ke bambulwa kulumbuluka, kubikapotu ne bengijila pa Betele. Inge twapusana na mulongo, nebikako kubwezha mutende. Ndanguluka pa kinembelo kya Mateo 5:23, 24, ne kulanguluka pa byo twafwainwa kupwisha lukatazho pakachi ketu. Kechi kyapeela kwamba’mba “Ndekelaiko mambo” ne, bino bimye byavula jo jishinda jonkatu ja kubwezhezhamo mutende.

BINTU BYAWAMA BYAFUMA MU MWINGILO WAMI

Luno kinkatazha kusapwila ku nzubo ku nzubo na mambo a kukoma, bino kechi nekileka ne. Nafundako pacheche kwamba Kichainizi kabiji ñumvwa bingi bulongo kwisamba na bantu bafuma ku China bo ntaana mu mukwakwa. Moba amo lukelo, mpana magazini 30 nangwa 40 ku babena kukeba.

Mu Brooklyn, New York saka tubena kusapwila ku bantu bafuma ku China

Naubile ne lupempu lwa kubwelako ku muntu mu China. Juba jimo, nsongwakazhi watekanya bingi wansekejile kimye kyo apainenga tupepala twa bipangwa byo bapoteshenga. Ne amiwa namusekejile ne kumupa Kyamba kya Usopa ne Labainga! mu Kichainizi. Watambwile ano magazini ne kumbuula’mba jizhina janji, Katie. Kufumatu kyokya kimye, Katie waiyanga na kwisamba ne amiwa inge wammonatu. Namufunjishe mazhina a bipangwa ne bishu mu Kizungu, kabiji naye walondelangamo inge mbena kumubuula. Namubuujile ne binembelo bino bya mu Baibolo, kabiji watambwile ne buku wa Baibolo Ufunjisha. Byo papichile milungu icheche, walekele kumweka.

Pa kupitapo bañondo, napele magazini ku nsongwakazhi mukwabo wapainenga tupepala, kabiji wiatambwile. Mulungu walondejilepo, uno nsongwakazhi wampele foni wanji ne kuñambila’mba, “Isambaiko na ba ku China.” Namukumbwile’mba, “Kafwako ye nayuka wikala ku China ne.” Bino wankanjikizhe, onkao mambo natambwile foni ne kukumbula’mba, “Alo, amiwa Robison mwane.” Watumine foni waambile’mba, “Ba Robby, amiwa Katie. Nabwela ku China.” Namushikishe’mba, “Ku China?” Katie wakumbwile’mba, “Ee mwane. Ba Robby, mwamuyuka wimupa foni nyi? Awo ke nkasami. Mwamfunjishe bintu byawama byavula bingi. Nalomba namba naye mumufunjishe byonka byo mwamfunjishe.” Naambile’mba, “Katie, nkeseka na bulume bwami bonse. Nasanta pa kumbuula ko uji.” Panyuma ya byobyo, nesambile na nkasanji Katie kimye kyapeleko. Konse ko baji aba bansongwakazhi, nkatemwa bingi inge bakafunde pe Yehoba.

Naingijila Yehoba pa myaka 73, kabiji namusanchila bingi mambo wankwashishe kubula kwivwanga mu nkondo ne kwikala wa kishinka mu kaleya. Kabiji ne bankasami bañambila’mba kibatundaikanga bingi pa kumona byo nachinchikanga kimye kyankanyanga Batata. Mu kuya kwa kimye, Bamama ne bankasami 6 babatizhiwe. Ne Batata nabo bakepesheko kuzhingila, kabiji bataainweko ne ku kupwila bimye bicheche saka bakyangye kufwa.

Umvwe Lesa waswa, balongo bami ne balunda nami bafwa kala bakasanguka mu ntanda ipya. Akifwanyikizhai lusekelo lo tukekala nalo saka tupopwela Yehoba myaka ne myaka pamo na batemwe betu. *—Monai tubyambo twa munshi.

^ par. 32 Kimye kyo banengezhezhenga jino jishimikila, ba Corwin Robison bafwile, saka baji ba kishinka kwi Yehoba.