Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Ñanyi mambo aambilengapo Yesu mu lujimuno luji mu Mateo 18:15-17?

Waambilenga pa makatazho bena Kilishitu babiji o bakonsha kupwisha bubiji bwabo. Bino inge muntu walenga ano mambo wakana kulapila bafwainwa kumupanga mu kipwilo. Ano mambo akonsha kuvwangamo bintu nabiji bujimbijimbi ne kayebe.—w16.05 ji. 7.

Mwakonsha kuba byepi pa kuba’mba mumwenengamo mu kutanga Baibolo?

Mwakonsha kuba bino byalondelapo: Tangainga binembelo byonse ne kumona byo mwakonsha kufunjilako ku kinembelo kyonse kyo mubena kutanga; ishikishainga mepuzho nabiji bwa kuba’mba ‘Nakonsha kwibingijisha byepi mu kukwashako bakwetu?’; kabiji ingijishainga bingijisho byo muji nabyo kukebakeba bishinka bikwabo pa kuba’mba mumvwishe byo mwatanga.—w16.05 ma. 28-30.

Nanchi kyatama mwina Kilishitu kumvwa bulanda inge mutemwe wanji wafwa nangwa kya kuba waitabila mu lusanguko nyi?

Kwitabila mu lusanguko kechi kufumyapo bulanda bwikala na mwina Kilishitu inge wafwisha mutemwe wanji ne. Abalahama wamujijile bingi Sala. (Nte. 23:2) Inge papita kimye muntu wakonsha kukepeshako bulanda.—wp16.3 ji. 4.

Mwanamulume wajinga na fukuta mwajinga bya kunembako munembeshi watongolwa mu Ezikyo kitango 9, ne banabalume batanu na umo bajinga na bya kwipayañenako bemenako bañanyi?

Twayuka’mba bemenako mazhita a mwiulu aonawine Yelusalema kabiji akeya na konauna ino ntanda yatama ya kwa Satana pa Amagedonyi. Lelo jino, mwanamulume uji na bya kunembako munembeshi wimenako Yesu Kilishitu ukabika tuyukilo pa bantu bakapuluka.—w16.06 ma. 31-32.

Baibolo wapuluka mu ñanyi bizumba?

(1) Wapulukile kizumba kya kubola mambo bintu byo baingijishe kunembapo nabiji mambanga ne biseba bibola; (2) bantangi ba bumulwila ntanda ne ba bupopweshi bakebelenga konauna Baibolo; ne (3) bantu bamo bakebelenga kupimpulako byambo bijimo.—wp16.4 ma. 4-7.

Mwina Kilishitu wakonsha kupeezhako byepi bwikalo bwanji?

Nembai mutanchi wa bintu byo mukeba, kabiji kange monaunenga mali na kupota bintu byabula kunema ne. Lengai mutanchi wa bintu byo mukeba kupota. Tayai bintu byo mubula kwingijisha ne kubwezha nkongole bukiji bukiji. Langulukai byo mwakonsha kubula kutayanga kimye kyabaya pa nkito, kabiji nengezhai byo mwakonsha kwingilangako kimye kyabaya mu mwingilo.—w16.07 ji. 10.

Ñanyi kintu Baibolo kyo aamba’mba kyanema kukila ngolode nangwa siliva?

Kinembelo kya Yoba 28:12, 15 kimwesha’mba maana a Lesa anema kukila ngolode nangwa siliva. Pa kukeba ano maana, mwafwainwa kwipelula ne kwikala na lwitabilo lwakosa.—w16.08 ma. 18-19.

Nanchi kijitu bulongo mulongo kubula kutenda myevu nyi?

Mu bisho bimo kijitu bulongo kushako myevu icheche ku mubanga kabiji kechi kyakonsha kulengela bantu kukana kuteleka ku mambo a Bufumu ne. Nangwa byonkabyo, balongo bakwabo kechi bakeba kulama myevu ne. (1 Ko. 8:9) Mu bisho bimo ne mapunzha amo bamona’mba kechi kyawama mwina Kilishitu kwikala na myevu ne.— w16.09 ji. 21.

Mambo ka o twafwainwa kubujila kuzhinauka jishimikila ja mu Baibolo jaamba pa nkondo yalwile Davida ne Goliata?

Goliata walepele mamita 2.9, ko kuba’mba walepele kukila muntu ye bamba’mba walepa kukila bantu bonse pa ntanda lelo jino. Bapoya bya kupoyapoya bataine po banemba’mba, nzubo ya kwa Davida, ne Yesu waambilepo pe Davida. Mapunzha atongolwamo amwesha’mba jino jishimikila ja kine.—wp16.5 ji. 13.

Ñanyi lupusano luji pa maana a kuyuka bintu, kukwatakanya bintu, ne maana?

Muntu uji na maana a kuyuka bintu, uyuka bintu byavula bingi nangwa bishinka. Muntu ukwatakanya bintu wakonsha kumona kishinka kimo byo kyakwatankana na kikwabo. Pakuba muntu uji na maana wingijisha bulongo bintu byo ayuka ne byo akwatankanya.—w16.10 ji. 18.