Nanchi mwatanga magazini a katataka a Kyamba Kya Usopa nyi? Monai inge mwakonsha kukumbula ano mepuzho:

Ñanyi bintu bina byo twafwainwa kuba pa kuba’mba twimbenga bulongo?

Twafwainwa kwimana bulongo ne kwinuna mutwe saka twasuntwila buku wa nyimbo peulu. Twafwainwa kupema bulongo. Inge twaasamisha, twakonsha kwimba na jiwi ja peulu.—w17.11, ji. 5.

Jishinda jo banengezhezhemo mizhi ya kufyamamo mu Isalela ne byo bawamishanga mashinda ayile mu ino mizhi jitufunjishapo ka?

Banengezhezhe mizhi ya kufyamamo itanu na umo ne mashinda awama. Baubile bino pa kuba’mba kikapeelelenga bantu kunyemenamo bukiji bukiji.—w17.11, ji. 14.

Mambo ka bupe bwa Lesa bwa bukuzhi o bwanemena kukila bupe bonse?

Bukuzhi bwitupa luketekelo lwa kwikala myaka ne myaka ne kwitupokolola ku bundengamambo ne lufu. Mambo Lesa watemenwe baana ba kwa Adama, wapaine Yesu kwiya na kwitufwila atweba bandengamambo.—wp17.6, ma. 6-7.

Twayuka byepi kuba’mba Salamo 118:22 waamba pa lusanguko lwa kwa Yesu?

Yesu bamukaine’mba kechi wajinga Mesiasa ne, kabiji bamwipayile. Pa kuba’mba ekale “jibwe jikatampe ja pa jikonka,” bafwainwe kumusangula.—w17.12, ma. 9-10.

Nanchi baana babeji yo yajinga ndonda mwasemekejilwe Mesiasa nyi?

Bamo ba mundonda ya kisemi mwasemekejilwe Yesu bajinga babeji, bino kechi bonse ne. Davida kechi wajinga mubeji wa kwa Yese ne; bino wajinga wa mundonda mwasemekejilwe Mesiasa.—w17.12, ma. 14-15.

Ñanyi mafunde atanwa mu Baibolo aamba pa butuntulu bwa mubiji?

Mizhilo ya Mosesa yaambile’mba bantu baji na mbumba bafwainwe kwikala kwa bunke. Bantu baowanga ku maboko panyuma ya kukwata muntu wafwa. Mizhilo ya Mosesa yaambile’mba bantu bafwainwe kuzhiika bincha byafuma munda. Mwana wa mulume inge wasemwa bafwainwe kumuchiba kalomolomo pa kupitapo moba atanu na asatu, mambo mashi atendeka kuchimba pa kupitapo mulungu umo.—wp18.1, ji. 7.

Mambo ka o kyabujila kutama mwina Kilishitu kwitemwa mwine?

Twafwainwa kutemwa bakwetu byonka byo twitemwa atweba bene. (Mako 12:31) Banabalume “bafwainwa kutemwa bakazhi babo byonka byo batemwa mibiji yabo.” (Efi. 5:28) Bantu bakizhamo kwitemwa bene balanguluka kukila po bafwainwa kwilangulukila.—w18.01, ji. 23.

Ñanyi bintu byo twafwainwa kuba pa kuba’mba tutwajijile kuyilako palutwe mu mwingilo wa Lesa?

Twafwainwa kutangako muchima kufunda Mambo a Lesa ne kulanguluka langulukapo ne kwingijisha byo tufunda. Kabiji twafwainwa kuswa lutangijilo lwa mupashi wazhila ne kutambwila bukwasho bwa bakwetu ne kusanta.—w18.02, ji. 26.

Mambo ka bapopweshi ba Lesa o bakaina byamba bashayuka batubangabanga ne baponga pa bikamweka kulutwe?

Kuji bishinka byavula bilengela bapopweshi ba Lesa kukana, bino kyakila pa byonse ke kya kuba’mba Baibolo wakanya bino byubilo.—wp18.2, ma. 4-5.

Twafwainwa kuba byepi inge betwitako ku kajo?

Inge twaswile lwito lo betwichile ku mukwetu, twafwainwa kufikizha byo tulaya. (Sala. 15:4) Kechi twafwainwa kubula kuyako kwa kubula ne ene mambo ne. Kampe muntu witwichile waingijile na ngovu kunengezha kajo.—w18.03, ji. 18.

Banabalume batongolwa bakonsha kufunjilako ka kwi Timoti?

Timoti watele bantu muchima ne kwibakwasha kufwenya kwipi ne Yehoba. Waingilanga mwingilo wazhila na mukoyo kabiji waingijishanga bintu byo afundanga. Wikoseshanga ne kwifunjisha aye mwine kabiji waketekejile mu bukwasho bwa mupashi wa Yehoba. Bakulumpe ne bakwabotu bakonsha kufunjilako byavula kwi Timoti.—w18.04, ma. 13-14.