“Totai Yehoba! . . . Byo kyawamapo ne byo kyayilamo kumutota!”—SALA. 147:1.

NYIMBO: 104, 152

1-3. (a) Salamo 147 wafwainwa wanembelwe ñanyi kimye? (b) Twakonsha kufunjilako ka ku byambo biji mu Salamo 147?

JAVULA tutota muntu umvwe waingila bulongo mwingilo ye bamupeele nangwa wamwesha kyubilo kyawama kya bwina Kilishitu. Inge tutota bantu, twafwainwa ne kukilamo kutota Yehoba Lesa. Twakonsha kumutota na mambo a bulume bwanji bukatampe bumwekela mu bilengwa byanji. Kabiji tumutota na mambo a butemwe bwanji bo etumwesheshe pa kwitupa kitapisho kya bukuzhi bwa Mwananji.

2 Nembi wa Salamo 147 watundaikilwe kutota Yehoba. Kabiji watundaikile ne bakwabo kutota Lesa.—Tangai Salamo 147:1, 7, 12.

3 Kechi twayuka wanembele uno salamo ne, bino kyamweka nembi wa uno salamo wajingako kimye Yehoba kyo afumishe bena Isalela mu buzha mu Babilona ne kwibabwezha ku Yelusalema. (Sala. 147:2) Nyimbi wa masalamo watotele Yehoba pa kubwezha bantu banji ku mpunzha ko bamupopwelanga. Pano bino, waambilepo ne bishinka bikwabo byamulengejile kutota Lesa. Ñanyi bishinka byonkabyo? Nga anweba ñanyi bishinka byo muji nabyo byakonsha kwimulengela kubijika amba “Aleluya!” mu bwikalo bwenu?—Sala. 147:1, tubyambo twa munshi.

 YEHOBA UBUKA BALAJIKA MICHIMA

4. Bena Isalela bafwainwa baumvwine byepi kimye Mfumu Kilusa kyo ebapokolwele mu buzha, kabiji mambo ka?

4 Fwanyikizhai bena Isalela byo baumvwinenga kimye kyo bajinga bazha mu Babilona. Aba bebakwachile bebendelekelenga ne kwibambila’mba: “Twimbilaipo lwimbo wa ku Ziona.” Pa kyokya kimye, muzhi wa Yelusalema wibalengelanga kwikala na lusekelo lwa kutota Yehoba bamonawine. (Sala. 137:1-3, 6) Bayudea kechi bakebelenga kwimba ne. Michima yabo yalajikile, kabiji bakebelenga lutekenesho. Nangwa byonkabyo, byambo bya Lesa bya bungauzhi byafikile kimye kyo ebapokolwele kupichila mwi Kilusa wajinga mfumu wa bena Pelisha. Kilusa washinjile Babilona ne kwamba’mba: “Yehoba . . . wankambizha kumushimikila nzubo mu Yelusalema . . . Yense wa mwi anweba bantu banji bonse, Yehoba Lesa wanji ekale nanji, kabiji ayenga.” (2 Moba 36:23) Kino kintu kyamwekele kyatekeneshe bingi bena Isalela baikelenga mu Babilona.

5. Nyimbi wa masalamo waambilepo amba ka pa bulume bwa Yehoba bwa kwitubuka?

5 Yehoba kechi watekeneshangatu kisaka kya bena Isalela ne, bino wibatekeneshanga ne pa muntu pa muntu. Kyo kimotu ne lelo jino. Nyimbi wa masalamo wanembele’mba: “[Lesa] ubuka balajika michima; ne kukasa pa bilonda byabo.” (Sala. 147:3) Ibyo, Yehoba wata bingi muchima bantu baji na makatazho, a ku mubiji nangwa mu milanguluko. Ne lelo jino, Yehoba ukebesha kwitutekenesha ne kupwisha bijikila byetu. (Sala. 34:18; Isa. 57:15) Witupa maana ne bulume pa kuba’mba tuyuke bya kuba na makatazho o twakonsha kupitamo.—Yako. 1:5.

6. Twakonsha kufunjilako ka ku byambo bya nyimbi wa masalamo biji pa Salamo 147:4? (Monai kipikichala kitanshi.)

6 Nyimbi wa masalamo watajile mwiulu ne kwamba’mba “[Yehoba] ubala tubangabanga” kabiji “witutela tonse pa mazhina ato.” (Sala. 147:4) Mambo ka nyimbi wa masalamo o atendekejile kwamba pa bilengwa bya mwiulu? Akilangulukai pa kino: Nyimbi wa masalamo wamwenenga tubangabanga na meso, bino kechi wayukile byo twavujile ne. Lelo jino, bashayuka ba bya sayansi bayuka’mba kuji tubangabanga twavula bingi. Bamo balanguluka’mba mu mwala wa nshansha umo muji tubangabanga twavula bingi twa kukankalwa kubala. Kabiji amba kyamweka kuji myala ya nshansha yavula bingi. Kya kine, atweba bantu kechi twakonsha kubala tubangabanga ne. Pano Mulenga witutumba mazhina tonse. Kino kilumbulula’mba Yehoba wayuka lupusano luji pa tubangabanga tonse. (1 Ko. 15:41) Ibyepi pa bantu baji pano pa ntanda? Inge kya kuba Lesa uyuka paji tubangabanga tonse kamo kamo, ko kuba’mba ne anweba wimuyuka bulongo pa muntu pa muntu, uyuka ku mpunzha ko muji, byo mubena kumvwa ne byo mubena kukeba pa kyokyo kimye.

7, 8. (a) Yehoba umvwa byepi umvwe bantu banji kebapite mu meseko? (b) Ambai kyamwekele kimwesha’mba Yehoba ukwasha bantu bambulwa kulumbuluka?

7 Yehoba wimuta muchima kabiji wimukwasha inge muji na makatazho. (Tangai Salamo 147:5.) Mwakonsha kulanguluka’mba lukatazho lwenu lwabaya bingi kabiji kechi muji na bulume bwa kwilupwisha ne. Lesa wayuka papelela bulume bwenu mambo ‘uvuluka’mba mwi lukungu.’ (Sala. 103:14) Na mambo a bumbulwa kulumbuluka, tubwezhabwezhapo kulubankanya. Twilangulusha bingi inge twapusa mu ñambilo, twamwesha byubilo bya bumbulwa kulumbuluka nangwa kubila bakwetu kichima. Yehoba kechi ulubankanya ne, bino wituyuka bulongo byo twalengwa.—Isa. 40:28.

8 Kampe mwakimwenapo kala kuboko kwa Yehoba kwa bulume byo kwimukwashishe kushinda  meseko. (Isa. 41:10, 13) Monai kyamwekejile nyenga painiya wa kimye kyonse aye Kyoko. Uno nyenga walefwilwe bingi kimye kyo ayile na kwingijila ku mpunzha kwakepa basapwishi. Nyenga Kyoko wayukile byepi amba Yehoba wayuka makatazho o apichilengamo? Mu kipwilo mwajinga bantu bayukile lukatazho lo apichilengamo kabiji bamukwashishe. Wamwene kuba’mba Yehoba ubena kumwambila’mba: “Na kutemwa, kechi na mambotu a kuba’mba wi painiya ne, bino wimwanami kabiji wipana kuñingijila. Mbena kukeba’mba wikalenga bwikalo bwa lusekelo byo uji Kamonyi wami.” Nga anweba, mu ñanyi bintu Lesa wa Bulume Bonse mo amwesheshe’mba “maana anji kechi aji na pa kupelela ne”?

YEHOBA WITUPA BYO TUKAJILWA

9, 10. Ñanyi bukwasho butanshi Yehoba bo etupa? Ambai kyamwekele.

9 Kimye kimo mwakonsha kukajilwa bintu bimo. Kampe mwakonsha kwakamwa amba kechi mukekala na kajo kavula ne. Nangwa byonkabyo, Yehoba ye walengele ntanda kabiji unokesha mvula kuba’mba imeneshenga kajo ka bilengwa byonse, kubikakotu ne baana ba bikwangala. (Tangai Salamo 147:8, 9.) Inge kya kuba Yehoba ujiisha bikwangala, ko kuba’mba ne anweba ukemupa bikebewa mu bwikalo.—Sala. 37:25.

10 Kyakilamo kunema, Yehoba witupa bikebewa pa kuba’mba tukoseshe lwitabilo lwetu, kabiji witupa ne “mutende wa Lesa wakila milanguluko ya bantu.” (Fili. 4:6, 7) Akilangulukai pa ba Mutsuo ne benakwabo bemwenejile Yehoba byo ebakwashishe mu 2011 mu Japan, kimye kyo kwajinga kinkunkwila kya mema. Bakanjijile pa musemi wa nzubo yabo pa kuba’mba bapuluke. Nangwa byonkabyo, pa joja juba bintu byabo byonse byaonaikile. Baikele bufuku bonse mu kibamba kyajinga peulu ya nzubo yabo saka bezakamina na mashika kabiji kechi kwajinga malaichi ne. Byo bwakile, batendekele kukeba kintu kyakonsheshe kwibatundaika. Kintu kyo bataainetu ke Buku wa Mwaka wa Bakamonyi ba kwa Yehoba wa mu 2006. Ba Mutsuo byo bazhikwile mu buku, bataaine kamutwe ka kuba’mba “The Deadliest Tsunamis Ever Recorded” (Binkunkwila bya Mema Bikatampe Byaipayile Bantu Bavula). Kitentanshi kyapichile pa jikuji ja Sumatra mu 2004 kyo kyalengejile’mba kwikale binkunkwila bikatampe. Ba Mutsuo ne benakwabo bajijile bingi kimye kyo batangile ano mashimikila aamba pa byapichilemo balongo ne banyenga. Bamwene kuba’mba Lesa wibata bingi muchima pa kwibakwasha kutaana mashimikila akoseshe lwitabilo lwabo. Kabiji Yehoba wibakwashishe ne mu mashinda akwabo. Balongo ne banyenga ba mu mapunzha akwabo bebaletejile kajo ne bivwalo. Pano kintu kibakoseshe bingi ke balongo jibumba ja Lesa bo jatumanga kuya na kwibatundaika. Ba Mutsuo baambile’mba: “Nemwenejile’mba Yehoba kechi uji kwalepa ne atweba bonse pa muntu pa muntu ne, kabiji wituta bingi muchima. Kitutekeneshe bingi.” Lesa patanshi witukwasha kukosesha lwitabilo lwetu, apa bino witupa ne bintu byo tukeba mu bwikalo.

KETEKELAI MU BULUME BWA LESA

11. Twafwainwa kuba byepi pa kuba’mba Lesa etukwashe?

11 Yehoba kimye kyonse ukwasha ne ‘kusuntula bakimote.’ (Sala. 147:6a) Pano twakonsha kuba byepi pa kuba’mba etukwashe? Twafwainwa kwikala na bulunda bwakosa ne aye. Pa kuba’mba twikale na buno bulunda, twafwainwa kukebanga bukimote. (Zefwa. 2:3) Bakimote bapembelela Lesa kufumyapo byatama ne nshiji yo beboba. Yehoba watemwa bantu bakeba bukimote.

12, 13. (a) Pa kuba’mba Lesa etukwashe, twafwainwa kuchinuzhuka ka? (b) Yehoba usekela mu bantu baji byepi?

 12 Bino Lesa “babi wibataya panshi.” (Sala. 147:6b) Abino byambo byanema bingi. Pa kuba’mba tumwenemo mu butemwe bwa Yehoba bubula kwaluka ne kuchiina bukaji bwanji, twafwainwa kushikwa bintu byo ashikwa. (Sala. 97:10) Twafwainwa kushikwa bintu nabiji bulalelale. Kino kibena kulumbulula’mba twafwainwa kuchinuzhuka bintu byonse byakonsha kwitulengela kuba bulalelale, kuvwangakotu ne kutamba bya mulekese. (Sala. 119:37; Mat. 5:28) Kechi kyapeela kuba bino ne, pano bino twafwainwa kwibikako pa kuba’mba Yehoba etupeshe.

13 Pa kuba’mba tushinde byubilo byatama, twafwainwa kuketekela mwi Yehoba, kechi kuketekala mu bulume bwetu ne. Nanchi Lesa ukasekela inge ketukebe kwipulusha atweba bene na “bulume bwa mbili,” ko kuba’mba kuketekela mu bulume bwa bantu nyi? Ine. Kechi twafwainwa kuketekela “mu byenda lubilo muntu ne,” ko kuba’mba kumona nobe twakonsha kwipulusha atweba bene nangwa bantu bakwabo bakonsha kwitupulusha. (Sala. 147:10) Bino twafwainwa kulombanga Yehoba kuba’mba etukwashe. Kupusanako na bantu, Lesa aye kechi ukooka kuteleka ku milombelo yetu ne, nangwatu inge twabwezha bwezhapo na kulomba bukwasho bwanji. “Yehoba usekela mu boba bamwakamwa, mu boba bapembelela butemwe bwanji bubula kwaluka.” (Sala. 147:11) Onkao mambo, twafwainwa kuketekela’mba na mambo a butemwe bwanji bubula kwaluka, Lesa ukatwajijila kwitukwasha kuba’mba tushinde miteeto yatama.

14. Nyimbi wa masalamo washiinwe’mba ka?

14 Yehoba witupa bishiino bitulengela kuyuka’mba ukwasha bantu banji inge bakajilwa. Nyimbi wa masalamo byo alangulukilenga pa kushimukulula Yelusalema, waimbile’mba: “[Yehoba] ukosesha mipingilo ya binzhilo bya mizhi yobe; ubila bibusa baana bobe baji mwi obewa. Uleta mutende mu nyaunda yobe.” (Sala. 147:13, 14) Nyimbi wa masalamo kyamutekeneshe bingi pa kuyuka’mba Lesa ukakosesha binzhilo bya muzhi pa kuba’mba akazhikijile bapopweshi banji.

Mambo a Lesa akonsha kwitukwasha byepi inge tubena kupita mu meseko? (Monai mafuka 15-17)

15-17. (a) Bimye bimo tumvwa byepi inge ketupite mu makatazho, bino Yehoba wingijisha byepi mambo anji kwitukwasha? (b) Lumbululai ‘byambo bya Lesa byo binyema.’

15 Mwakonsha kupita mu makatazho afwainwa kwimuletela bijikila. Nangwa byonkabyo, Yehoba ukemukwasha kuchinchika. Nyimbi wa masalamo waambile’mba Lesa “utuma mukambizho wanji pa ntanda; byambo byanji binyema nobe kalume wenda bukiji.” Kabiji byo aambile pe Yehoba amba ‘uvweta ntanda na mabebe, kabiji usalañanya mabebe, ne kunokesha mvula wa mabwe,’ waipwizhe’mba: “Ñanyi wakonsha kuchinchika ku mashika anji?” Wanungilepo’mba Yehoba “utuma byambo byanji, kabiji bisungulula mema achimba.” (Sala. 147:15-18) Lesa wetu wa maana onse ne bulume bonse, kabiji uji na bulume bwa kunokesha mvula wa mabwe, wakonsha kwitukwasha kushinda makatazho onse.

16 Lelo jino, Yehoba ubena kwingijisha Mambo anji, Baibolo, pa kwitutangijila. Kabiji “byambo byanji binyema,” ko kuba’mba witukwasha ne kwitutangijila bukiji bukiji pa kimye kyafwainwa. Akilangulukai pa byo mubena kumwenamo mu kutanga Baibolo, kubalaula mabuku afuma ku “kalume wa kishinka kabiji wa maana,” kutamba JW Broadcasting, kuya pa jw.org, kwisamba na bakulumpe mu kipwilo ne kupwanañana na bena Kilishitu bakwetu. (Mat. 24:45) Nanchi kechi mwimwena’mba Yehoba ubena kwimutangijila bukiji bukiji nenyi?

17 Ba Simone bemwena bulume buji mu Mambo  a Lesa. Belengulwile bingi kya kuba balangulukanga’mba Yehoba kechi wakonsha kwibatemwa ne. Bino, byo bapichilenga mu lukatazho, balombanga kimye kyonse kwi Yehoba kuba’mba ebakwashe. Kabiji batwajijile kufunda Baibolo pa bunke bwabo. Baambile’mba, “Yehoba unkwasha kimye kyonse mu makatazho ne kuntangijila.” Kino kyakwasha ba Simone kutwajijila kwikala na lusekelo.

18. Mambo ka o mumwena’mba Lesa wimupesha, kabiji ñanyi bishinka bimulengela kubijika amba “Totai Yehoba!”?

18 Nyimbi wa masalamo wayukile’mba bena Isalela bo bajinga kisaka kya bantu Lesa kyo atemenwe. Kyo kyonkatu kisaka kya bantu kyatambwijile “byambo” bya Lesa ne “malamuna anji ne mizhilo yanji.” (Tangai Salamo 147:19, 20.) Lelo jino, Lesa witupesha ne kwitutela pa jizhina janji. Kuyuka Yehoba ne kufunda Mambo anji kwitukwasha mu bwikalo, kabiji kwitulengela kwikala na bulunda bwawama ne aye. Nanchi ne anweba kechi muji na bishinka byavula byafwainwa kwimulengela kubijika’mba “Totai Yehoba!” byonka byaubile nembi wa Salamo 147 ne kukwasha bakwenu nabo kuba byonkabyo nenyi?