Bantu bamo balanguluka’mba Lesa ye ulengela bantu kuyanda nangwa’mba inge kechi ye ulengela bantu kuyanda ne, ko kuba’mba kechi wibata muchima ne. Nga Baibolo ufunjisha’mba ka? Mwakonsha kukumya bingi pa kumvwa mukumbu.

Nanchi Lesa ye ulengela’mba tuyandenga nyi?

“Kine, Lesa kechi uba bubi ne.”Yoba 34:12.

BYAMBA BANTU

Bamo bamba’mba bintu byonse bimweka ke kyaswa muchima wa Lesa. Onkao mambo, baitabila’mba Lesa ye ulengela buyanji. Inge pamweka bya malwa, balanguluka’mba jo jishinda Lesa jo akambwilamo bandengamambo.

BYAMBA BAIBOLO

Baibolo ufunjisha’mba Lesa kechi ye ulengela’mba tuyandenga ne. Baibolo waamba’mba inge ke tupite mu meseko, kange twambe’mba: “Lesa ye wangeseka ne.” Mambo ka? Mambo “kafwako muntu nangwa umo wakonsha kweseka Lesa na bintu byatama ne, kabiji naye kechi weseka muntu nangwa umo ne.” (Yakoba 1:13) Ko kuba’mba Lesa kechi ye uleta meseko o tupitamo nangwa buyanji ne. Inge wauba bino ko kuba’mba watama, pano bino, “Lesa kechi uba bubi ne.”—Yoba 34:12.

Pano ñanyi nangwa ki ka kileta buyanji umvwe Lesa kechi ye ulengela ne? Kyatamakotu ke kya kuba’mba bantu bebamanyika ku bantu bakwabo bambulwa kulumbuluka. (Musapwishi 8:9) Kabiji twakonsha kupita mu bya malwa na mambo a “bintu bya kubula kuketekela” bimweka, ko kuba’mba kutanwa pa mpunzha yatama pa kimye kyatama. (Musapwishi 9:11) Baibolo ufunjisha’mba “mfumu wa pano pa ntanda,” aye Satana Diabola ye ulengela bantu kuyanda, mambo “pano pa ntanda ponse paji mu bulume bwa kwa aye mubi.” (Yoano 12:31; 1 Yoano 5:19) Onkao mambo, Satana ye ulengela bantu kuyanda, kechi Lesa ne.

 Nanchi Lesa watako muchima ku buyanji bwetu nyi?

“Kimye kyonse kyo bapichilenga mu makatazho, kyamukolelenga bingi ku muchima.”Isaya 63:9.

BYAMBA BANTU

Bantu bamo balanguluka’mba Lesa kechi watako muchima ku meseko o tupitamo ne. Nembi wa mabuku umo wamba’mba Lesa “kechi utako muchima ku buyanji bwetu ne, mambo kechi uji na lusa ne.” Uno nembi wamba’mba umvwe Lesa ko aji, ko kuba’mba kechi ubila bantu “lusa ne.”

BYAMBA BAIBOLO

Kupusanako na bilanguluka bantu amba Lesa kechi uji na lusa ne, Baibolo ufunjisha kuba’mba Lesa kimukola bingi ku muchima pa kumona byo tuyanda, kabiji katatakatu akafumyepo buyanji bonse. Akilangulukai pa bino bishinka bisatu bitanwa mu Baibolo bitutekenesha bingi.

Lesa wayuka buyanji bwetu. Kufumatu kimye kyatendekele bantu kuyanda, kafwakotu nangwa kimo kibula kumona Yehoba * ne, mambo “meso anji amona” bintu byonse. (Salamo 11:4; 56:8) Kimye bapopweshi banji ba kala kyo bebamanyikilenga, Lesa waambile’mba: “Kine namona kumanama kwa bantu bami.” Nanchi wamwenengatu byo bamanaminenga kwa kubula kutako muchima nyi? Ine, mambo wanungilepo amba: “Nayukishatu bulongo makatazho o babena kupitamo.” (Kulupuka 3:7) Bantu bavula kibatekenesha bingi pa kuyuka kuba’mba Lesa wayuka bintu byonse byo tubena tupitamo, nangwatu meseko amo bantu bakwabo o bakonsha kubula kuyukisha bulongo.—Salamo 31:7; Byambo bya Maana 14:10.

Lesa witumvwina bingi lusa inge tubena kuyanda. Yehoba Lesa kechi wayukatu biyanda bantu ne, bino kimukola ne ku muchima pa kumona makatazho o bapitamo. Lesa kyamukolanga bingi ku muchima kimye bakalume banji ba kala kyo bapitanga mu makatazho. Baibolo waamba’mba: “Kimye kyonse kyo bapichilenga mu makatazho, kyamukolelenga bingi ku muchima.” (Isaya 63:9) Nangwa kya kuba Lesa uji bingi na bulume kukila bantu, wibomvwina bingi lusa aba bayanda. Kijitu nobe byo babena kupitamo biji ku muchima wanji. Kya kine, “Yehoba ye wa kifyele ne lusa.” (Yakoba 5:11) Kabiji Yehoba witukwasha kuchinchika makatazho o tupitamo.—Filipai 4:12, 13.

Lesa ukafumyapo buyanji bwa bantu. Kwesakana na byaamba Baibolo, Lesa ukafumyapo buyanji bonse pano pa ntanda. Yehoba ukengijisha Bufumu bwanji bwa mwiulu kupimpula bwikalo bwa bantu kwikala bwawama bingi. Baibolo walaya kuba’mba pa kyokya kimye Lesa “ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.” (Lumwekesho 21:4) Nga aba bafwa kala kikekala byepi? Lesa ukebasangula ne kwikala na bumi pano pa ntanda pa kuba’mba nabo bakeyowe bwikalo bukabulamo buyanji. (Yoano 5:28, 29) Nanchi bantu bakavulukanga byo bayanjilenga kala nyi? Ine, mambo Yehoba walaya’mba: “Bintu bya kala kechi bakebivulukapo jibiji ne, kabiji kechi bikeyapo jibiji mu michima yabo ne.”—Isaya 65:17. *

^ par. 13 Yehoba jo jizhina ja Lesa jasololwa mu Baibolo.

^ par. 15 Pa kuba’mba muyuke ene mambo Lesa o aswishisha buyanji pa kino kimye ne byo akebufumyapo, monai kitango 8 ne 11 mu buku wa kuba’mba Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.