Bantu bavula baji na muteeto wa kukelwa bayuka’mba kukelwa kwatama. Pano javula katende ko kebalengela kukelwa. Mu Baibolo muji mafunde akonsha kwitukwasha.

Nanchi kubula kukelwa kwanema nyi?

ENE MAMBO O KWANEMENA

Bamo bataana kuba’mba kufika bukiji ko bemulaya kukepeshako bijikila. Kubula kukelwa kulengela bantu kwitunemeka. Mambo ka?

Kubula kukelwa kumwesha’mba mwafikilamo. Kufika bukiji kumwesha’mba mwayuka bya kwabanya kimye mu bwikalo bwenu. Kabiji kafwako bintu byakonsha kwimulengela kukankalwa kuba byo mwafukula ne, kana kyakatazhatu.

Kubula kukelwa kulengela kwimuketekela kumwesha’mba mwi ba kishinka. Mu ino ntanda mwavula bantu babula kufikizha byo balayañana na bakwabo, bantu banemeka bingi bantu bafikizha byo balaya. Bantu bobaketekela bebanemeka bingi ku balunda nabo ne ba mu kisemi. Bakulumpe ba mingilo nabo banemeka bingi bantu babula kukelwa ku nkito kabiji bengila bintu mu kimye kyo bebapa. Kino kyakonsha ne kwibalengela kwibanungilako nsabo ne kwibaketekela bingi.

BYAMBA BAIBOLO

Mu Baibolo muji Binembelo bimo byaamba pa kubuula kukelwa. Baibolo waamba’mba: “Bintu byonse byubiwe na mushingi ne mo byalondankena.”(1 Kolinda 14:40) Inge bantu babiji baswañana kuya ku mpunzha imo pa kimye kimo, kyanema bingi kulama kimye. Kabiji Baibolo waamba ne kuba’mba: “Bintu byonse biji na kimye kyabyo, ne mingilo yonse ya pano pa ntanda iji na kimye kyayo.” (Musapwishi 3:1) Mu kino kyepelo muji byambo bya kuba’mba kuji “kimye kya kujimba ne kimye kya kujimbula byo bajimbile.”(Musapwishi 3:2) Njimi ubyala pa kimye kyafwainwa pa kuba’mba akanowe kajo kavula. Ko kuba’mba njimi inge wabula kukelwa, unowa kajo kavula.

Baibolo waambapo ne kishinka kikwabo kimwesha buneme bwa kubuula kukelwa. Kubula kukelwa kumwesha’mba twanemeka bakwetu mambo kechi tukeba kwibatayila kimye ne. (Filipai 2:3, 4) Onkao mambo, aba baji na muteeto wa kukelwa, bebila bakwabo kimye.

“Saka muta muchima ku bintu bya bakwenu kabiji kange mulangulukengatu pa bintu byenu byonka ne.”Filipai 2:4.

 Mwafwainwa kuba byepi pa kuba’mba mubulenga kukelwa?

BYAMBA BAIBOLO

Baibolo witutundaika kufukwila jimo bya kuba kulutwe. (Byambo bya Maana 21:5) Inge kimye kyonse mukelwa, kampe kilengela muba bintu byavula pa kimye kimo. Chinuzhukainga bintu byabula kunema bimutayila kimye. Ikalainga na bintu bicheche bya kuba ne kumona kuba’mba mwaimana bukiji pa kuba’mba mubulenga kukelwa. Kuba bino, kukemulengela kubula kukelwa nangwa kya kuba pamweka bintu byakonsha kwimulengela kukelwa.

Baibolo waamba’mba kwipelula kwanema bingi. (Byambo bya Maana 11:2) Kino kulumbulula’mba twafwainwa kuyuka pa kupelela. Saka mukyangye kuswa, langulukaipo inge mukakonsha kuba byobyo. Inge mwaswa kwa kubula kulangulukapo, kyakonsha kwimulengela kwikala na bijikila ne kufichisha bakwenu ku muchima.

Baibolo waamba ne kuba’mba twafwainwa kwingijishanga kimye kyetu bulongo. (Efisesa 5:15, 16) Tendekelaingapo kuba bintu byanema. Inge musa kukanjila sakya nangwa kimye kyo mubena kupembelela bakwenu, mwafwainwa kubangapo bimo nabiji kutanga nangwa kulangulukila jimo pa byo musa kuba jojo juba.

“Bintu bifuukula muntu wingila na ngovu bikalumbuluka.” Byambo bya Maana 21:5.