MATEO 18:21-35

  • NAFWAINWA KULEKELAKO MAMBO MUKWETU JITANU NA JIBIJI NYI?

  • KISHIMPI KYA MUZHA WABUJILE LUSA

Petelo waumvwine lujimuno lwa kwa Yesu pa bya kupwisha makatazho ekala pakachi ka balongo. Pano bino, Petelo kyamweka wakebelenga kuyuka kuvula kwa bimye byo afwainwa kulekela bakwabo mambo.

Onkao mambo, waipwizhe’mba: “Nkambo, bimye binga byo nafwainwa kulekelako mambo mukwetu wandenga mambo? Jitanu na jibiji nyi?” Bantangi ba bupopweshi bamo bafunjishanga’mba muntu wafwainwa kulekelako mukwabo mambo bimye bisatu. Onkao mambo, Petelo kampe walangulukilenga’mba kulekela mambo “jitanu na jibiji” kumwesha’mba muntu uji na muchima wawama.—Mateo 18:21.

Bino kubala bimye bya kulekelako muntu mambo kechi kwayijilemo na byafunjishenga Yesu ne. Onkao mambo, Yesu wamolweleko Petelo amba: “Nakubuula namba, kechi bimye bitanu na bibiji ne, kana bimye 77.” (Mateo 18:22) Kino kibena kulumbulula kutwajijilatu na kulekelako muntu mambo. Onkao mambo, Petelo kechi wafwainwe kubala bimye bya kulekelako bakwabo mambo ne.

Kepo Yesu aelele kishimpi Petelo ne baana banji ba bwanga bakwabo kya kwibakwasha kuyuka mutembo ye bajinga nanji wa kwilekelako mambo. Kino kishimpi ke kya muzha wakankelwe kufunjilako ku lusa lwa mubijile nkambo yanji. Mfumu wakebele bazha banji kubwezha nkongole yo bajinga nayo. Muzha umo wajinga na nkongole ya matalenta 10,000 [mandenali 60,000,000] bamuletele kwi aye. Bino wakankelwe kubwezha ino nkongole. Onkao mambo, mfumu wakambizhe’mba aye mwine, mukazhanji, ne baana banji bebapoteshe ne kubwezha nkongole. Ponkapo uno muzha wafukamine panshi ne kumulambila saka amba’mba, “Akintekenyai, nkemubwezhezha bintu byenu byonse.”—Mateo 18:26.

Mfumu wamubijile lusa, kabiji wamulekejileko nkongole yanji. Mfumu byo aubiletu bino, uno muzha ponkapo wayile ne kutaana muzha mukwabo wajinga na nkongole yanji ya mandenali 100. Wamukwachile ne kumufina pa nshingo ne kumwambila’mba: “Mbwezhezhe nkongole yami.” Bino mukwabo  wafukamine panshi ne kumusashijila’mba: “Akintekenye, nkakubwezhezha nkongole yobe.” (Mateo 18:28, 29) Pano bino, uno muzha ye balekejileko nkongole ku mfumu kechi waubijile mukwabo lusa byonka byo bamubijile aye kwi nkambo yanji ne. Wayile na kukashisha mukwabo mu kaleya wajingatu na nkongole icheche amba kanatu akabwezhe nkongole yo ajinga nayo.

Kepo Yesu anungilepo amba bazha bakwabo byo bamwene kyo aubile, bayile na kumulobela kwi nkambo yabo. Nkambo yabo wazhingijile kabiji wamwichile ne kumwambila’mba: “Obewa muzha mubi, amiwa nakulekejileko nkongole yami byo wansashijile. Nanchi kechi wafwainwe kumubila lusa muzha mukwenu byonka byo nakubijile lusa nenyi?” Mfumu wazhingijile bingi ne kumupana ku baota, amba kanatu akabwezhe nkongole yonse. Kepo Yesu apezhezheko amba: “Ne Batata ba mwiulu byo byo bakemuba ne anweba, inge mwabula kulekelako mambo balongo benu na muchima wenu yense.”—Mateo 18:32-35.

Luno lufunjisho pa mambo a kwilekelako mambo, lwawama bingi. Lesa witulekelako nkongole ikatampe bingi ya bundengamambo. Mambo etulenga mulongo wetu wa mu kipwilo kechi akonsha kwesakana na mambo e tulekelako Lesa ne. Kabiji Yehoba witulekelako mambo bimye byavula bingi. Nanchi ne atweba kechi twafwainwa kulekelako bakwetu inge paji kyatama kyo betuba nenyi? Byonkatu byafunjishe Yesu mu Jashi ja pa Mutumba, Lesa ‘uketulekeleko mambo etu byonka byo twibalekelako mambo aba betulenga mambo.’—Mateo 6:12.