MATEO 9:14-17 MAKO 2:18-22 LUKA 5:33-39

  • BAANA BA BWANGA BA KWA YOANO BAIPWIZHE YESU PA MAMBO A KUZHIKILWA NA NZALA

Yoano Mubatizhi bamukashile byo papichiletu kimye kicheche kufuma kimye Yesu kyo atainwe ku Kijiilo kya Lupitailo mu 30 C.E. Nangwa kya kuba Yoano wasakishe bingi amba baana banji ba bwanga balondelenga Yesu, bino kechi bonse baubile bino kufuma kimye Yoano kyo bamukashile ne.

Kijiilo kya Lupitailo kya mu 31 C.E byo kyafwenyenyenga pepi, baana ba bwanga ba kwa Yoano bamo baishile kwi Yesu ne kumushikisha’mba: “Mambo ka atweba ne Bafaliseo o tuzhikilwa na nzala pakuba baana benu ba bwanga kechi bazhikilwa na nzala ne?” (Mateo 9:14) Bafaliseo bazhikilwanga na nzala mambo kyajinga kisho kya bupopweshi bwabo. Mu kuya kwa kimye, Yesu waingijishe kishimpi mo aambile pa Mufaliseo wimonanga’mba waoloka. Uno Mufaliseo walombelenga’mba: “Anweba Lesa, nemusanchila bingi mambo amiwa kechi nji nobe bantu bakwabo . . . ne. Kabiji nzhikilwa na nzala jibiji mu mulungu.” (Luka 18:11, 12) Kyamweka ne baana ba bwanga ba kwa Yoano nabo bazhikilwanga na nzala mambo kyajingatu nobe kisho. Nangwa kampe bazhikilwenga na nzala na mambo a kujila Yoano ye bakashile. Onkao mambo, bantu bakuminye bingi mambo baketekejilenga’mba baana ba bwanga ba kwa Yesu nabo basakumwesha bulanda pa byamwekejile Yoano kupichila mu kuzhikilwa na nzala.

Yesu pa kwibakumbula wibelele kishimpi amba: “Nanchi balunda ba musongoshi bakonsha kujila umvwe kya kuba musongoshi bakiji nanji nyi? Bino moba akafika kimye musongoshi kyo bakamufumyako kwi abo, ne abo po po bakazhikilwa na nzala.”—Mateo 9:15.

Yoano waambile pe Yesu amba ye musongoshi. (Yoano 3:28, 29) Na mambo a kuba’mba Yesu wakijinga nabo, baana banji ba bwanga kechi bazhikilwanga na nzala. Palutwe kacheche, Yesu byo afwile, baana banji ba bwanga po po bajijile kabiji kechi bakebelenga kuja ne. Bino byo asangukile, kechi kwajinga kya kwibalengela kujila ne kuzhikilwa na nzala ne.

Kabiji Yesu waingijishe bino bishimpi bibiji amba: “Kafwako muntu wakonsha kutupika kikamba kya katataka pa kivwalo kya peulu kya kala ne, mambo kikamba kya katataka kitondobola kivwalo ne patabuka pabayilako. Kabiji bantu kechi balonga binyu bya bintonto mu mafukuta a biseba a kala ne. Mambo umvwe bauba bino, mafukuta asabika ne binyu bichika ne konaika. Bino bantu balonga binyu bya bintonto mu mafukuta a biseba a katataka kabiji byonse bibiji kechi byonaika ne.” (Mateo 9:16, 17) Ñanyi kishinka Yesu kyo aambilengapo?

Yesu wakwashishenga baana ba bwanga ba kwa Yoano Mubatizhi kumvwisha kuba’mba kafwako muntu nangwa umo wafwainwe kuketekela’mba baana banji ba bwanga bafwainwe kulondela bisho bya kala bya Bayudea nabiji kya kuzhikilwa na nzala ne. Kechi waishile na kuwamisha ne kuswisha mpopwelo ya kala yatama kutwajijila ne. Yesu kechi watundaikilenga mpopwelo itundaika bupopweshi bwa Bayudea ne bisho bya bantu byajingako pa kyokya kimye ne. Kechi kyafwainwe kutupika kikamba kya katataka pa kivwalo kya kala ne, nangwa kulonga binyu bya katataka mu fukuta wa kala ne.