MATEO 19:1-15 MAKO 10:1-16 LUKA 18:15-17

  • YESU WAAMBILE PE LESA BYO AMONA KWIKANA

  • BUPE BWA BUKATANDA NE BUZHIKE

  • BUNEME BWA KWIKALA NOBE BAANA BABACHECHE

Yesu ne baana banji ba bwanga byo bafumine ku Ngalilea, baabukile Mukola wa Yodano ne kupita jishinda japichijile ku bulenge mu kibunji kya Pelia. Kimye kitanshi Yesu kyo ajinga mu Pelia, wabuujile Bafaliseo mizhilo ya Lesa yaamba pa kwikana. (Luka 16:18) Pano pa kikye kimye bakebelenga kumweseka jibiji na kintu kikwabo.

Mosesa wanembele’mba mwanamukazhi bakonsha kumukana umvwe bamonamo “kintu kyatama” mwi aye. (Mpitulukilo ya mu Mizhilo 24:1) Bafaliseo baabenejilemo bene pa mambo a kwikainapo. Bamo baitabijile’mba kino kyavwangilemo ne tubilubo tucheche. Onkao mambo, Bafaliseo baipwizhe’mba: “Nanchi kijitu bulongo mwanamulume kukana mukazhanji pa mambo onsetu nyi?”—Mateo 19:3.

Yesu kechi wakebele kutundaika milanguluko ya bantu ne, bino waambile pa jishinda Lesa jo anengezhejilemo masongola. Waambile’mba: “Nanchi kechi mwatangapo kuba’mba, kufumatu ku ntendekelo, awa wibalengele, walengele mwanamulume ne mwanamukazhi ne kwamba’mba: ‘Na mambo a kino, mwanamulume ukasha bashanji ne bainanji ne kulamachila ku mukazhanji ne abo bakekala ke mubiji umo’ nenyi? Onkao mambo, kechi bakiji babiji ne, bino ke mubiji umo. Onkao mambo, akya kyasambakanya Lesa, muntu kechi ekyabanye ne.” (Mateo 19:4-6) Kimye Lesa kyo atendekeshe masongola pakachi ka ba Adama ne Evwa, kechi wabikileko lunengezho lwa kupwishishamo masongola ne.

Bafaliseo bazhingijile Yesu ne kumwambila’mba: “Pano mambo ka Mosesa o akambizhe mwanamulume kupa mukazhanji kyete kya kumupala kumwesha’mba wamukana?” (Mateo 19:7) Yesu wibabuujile’mba: “Na mambo a kukosa kwa michima yenu, Mosesa kyo kyo emuswishishe kukana bakazhi benu, pano bino, kechi byo byo kyajinga ku ntendekelo ne.” (Mateo 19:8) Lesa watendekeshe masongola ku “ntendekelo” mu Edena, kechi mu moba a kwa Mosesa ne.

Kepo Yesu aambile bukine bwanema amba: “Nemwambila namba, yense ukana mukazhanji pa kubula mambo a bulalelale [Mu Kingiliki, poneya] ne kusongola mukwabo, wauba bukende.” (Mateo 19:9) Onkao mambo, bulalelale o mambotu aambapo Binembelo a kwikainapo.

Kino kyalengejile baana ba bwanga kwamba’mba: “Umvwe masongola byo byo aji, kyawamatu ne kubula kusongola.” (Mateo 19:10) Kino kibena kulumbulula’mba yense ukeba kutwela mu masongola wafwainwa kulangulukishapo amba masongola kechi afwainwa kupwa ne.

Pa mambo a kubula kusongola nangwa kusongolwa, Yesu waambile’mba bamo basemwatu bantungu babula kusongola. Bakwabo bekala bantungu na mambo a kwibalemeka ku bantu. Kabiji bakwabo bakanya kilaka kya kukeba kwilaala. Boba bino kuba’mba bateshe muchima ku bintu bya Bufumu. Yesu watundaikile banteleki banji amba: “Awa wakonsha kwikala byonka bino [kubula kusongola nangwa kusongolwa], obe byonkabyo.”—Mateo 19:12.

Bantu batatwile kuleta baana babo babacheche kwi Yesu. Nangwa byonkabyo, baana banji ba bwanga bakainyenga bantu kuba bino, kampe bakebelenga kuzhikijila Yesu amba bakamukatazha. Yesu byo amwene kino wazhingijile ne kwibambila’mba: “Balekai baana ba bacheche beye kwi amiwa; kange mwibakanye ne, mambo Bufumu bwa Lesa bo bwa bantu baji nobe bano. Kine nemwambila namba, yense ubula kutambula Bufumu bwa Lesa byonka byuba mwana mucheche, kechi ukatwelamo ne.”—Mako 10:14, 15; Luka 18:15.

Kine byo lwawamapo lufunjisho Yesu lo afunjishe! Pa kuba’mba tukatambule Bufumu bwa Lesa, twafwainwa kwikala na muchima wa kwipelula ne kukeba kufunda nobe baana babacheche. Yesu wamwesheshe’mba watemwa baana babacheche kupichila mu kwibabukata mu maboko anji ne kwibapesha. Abino byo byo atemwa ne bonse batambula “Bufumu bwa Lesa byonka byuba mwana mucheche.”—Luka 18:17.