LUKA 17:11-19

  • YESU WABUKILE BANTU JIKUMI BAJINGA NA MBUMBA

Yesu byo avulañenye milanguluko ya kije kya Saniedilini ya kukeba kumwipaya, wafumineko ne kuya ku muzhi wa Efelaimu ku buyeke musela wa Yelusalema. Akwa ko ko aikele na baana banji ba bwanga, kwalepele na balwanyi banji. (Yoano 11:54) Nangwa byonkabyo, Kijiilo kya Lupitailo mu 33 C.E. kyajinga pepi, onkao mambo, Yesu waimene lwendo jikwabo. Wayile ja ku buyuke kupita mu Samaliya kukafika ne ku Ngalilea. Kino kyajinga kimye kyapeleleko kufwakesha yoya nyaunda lufu lwanji saka lukyangye kufika.

Byo ayilenga kufuma mu muzhi umo kuya mu muzhi mukwabo, Yesu wasambakene banabalume jikumi bajinga na mbumba. Kino kikola kyatama bingi mambo kija pachepache binungwa bya mubiji wa muntu, nabiji minwe, mana, nangwa matwi. (Kubala 12:10-12) Mizhilo ya Lesa yakambizhe muntu wa mbumba amba wafwainwa kubijika’mba, “Ne wa muzhilo, ne wa muzhilo!” kabiji wafwainwe kwikala kwa bunke.—Bena Levi 13:45, 46.

Aba bambumba jikumi balaminenga yoya Mizhilo kabiji baimene kwalepa na kwajinga Yesu. Pano bino, babijikile’mba: “Anweba Yesu, Mufunjishi, tubilai lusa!” Byo ebamwene, wibambijile’mba: “Yainga mukemweshe anwe bene ku bañanga.” (Luka 17:13, 14) Yesu waambile bino mambo wanemekele Mizhilo ya Lesa yaswishishe bañanga kwambila bantu bajinga na mbumba inge yapwa amba babukwa. Kepo bebaswishanga kwikala jibiji pamo na bantu babujile mbumba.—Bena Levi 13:9-17.

Aba bambumba jikumi baketekejile mu bulume bwa kwa Yesu bwa kuba bya kukumya. Onkao mambo, bayile na kumona bañanga nangwa kya kuba kechi bakibukilwe ne. Byo bayilenga, bafwetelwe na mambo a kwitabila Yesu. Batatwile kumona ne kumvwa’mba bakosa.

Bambumba batanu na bana batwajijile kuya, bino umo kechi wayile ne. Uno mwanamulume mwina Samaliya wabwelele na kukeba kwajinga Yesu. Mambo ka? Uno mwanamulume wasanchijile bingi Yesu pa kintu kyamumwekejile. Uno muntu wajinga na mbumba kala ‘watumbijikilenga Lesa na jiwi ja peulu,’ mambo wayukile’mba Lesa ye wamubuka. (Luka 17:15) Kabiji byo ataaine Yesu, waponejile ku maulu anji ne kumusanchila.

Yesu waambijile bantu batainwepo amba: “Nanchi kechi bantu jikumi baji kubukwa nenyi? Pano nga bakwabo batanu na bana baji pi? Nanchi kafwako muntu mukwabo wabwela na kutumbijika Lesa, kanatu uno muntu wa mu kisaka kingi nyi?” Kepo Yesu aambijile mwina Samaliya amba: “Imana uyenga; lwitabilo lobe lwakulengela kubukwa.”—Luka 17:17-19.

Yesu byo abukile bambumba jikumi, wamwesheshe’mba Yehoba Lesa ye ubena kumutangijila. Kyamweka awa umo pa bambumba jikumi bo abukile Yesu ukekala na bumi bwa myaka. Ano moba Lesa kechi ubena kwingijisha Yesu kuba bya kukumya ne. Bino, inge twaitabila mwi Yesu, tukekala na bumi bwa myaka ne myaka. Nanchi tusanta byonka byasanchile mwanamulume mwina Samaliya nyi?