“Anweba yenu muji na nsulo ya bumi.”—SALAMO 36:9

1, 2. Ñanyi bupe bwanema bwitupa Lesa?

YEHOBA witupa bupe bwanema bingi. Buno bupe ke bumi. (Ntendekelo 1:27) Kabiji ukeba’mba twikalenga bulongo. Onkao mambo, witupa mafunde a kwitukwasha kufuukulanga bulongo bintu. Twafwainwa kwingijisha ano mafunde kwitukwasha “kuyuka kyawama ne kyatama.” (Bahebelu 5:14) Inge ke tube bino, ko kuba’mba tubena kuswisha Yehoba kwitufunjisha kulanguluka bulongo pa bintu. Kulondela mafunde a Lesa kukalengela bwikalo bwetu kuwama bingi kabiji mukafuma bintu byawama.

2 Twakonsha kwikala na makatazho mu bwikalo. Kwakonsha kumweka bintu bimo byabula kwambapo mizhilo ya mu Baibolo. Kampe twakonsha kukeba kufuukula pa michi ne mashinda avwangamo kwingijisha mashi. Twafwainwa kufuukula byepi bintu byakonsha kutokesha Yehoba ku muchima? Mu Baibolo muji mafunde etufunjisha Yehoba byo amona bumi ne mashi. Inge twayuka bya kwingijisha ano mafunde, tukafuukulanga bintu biketulengela kwikala na jiwi ja muchima jawama. (Byambo bya Maana 2:6-11) Twayai twisambe pa mafunde amo atanwa mu Baibolo.

 LESA UMONA BYEPI BUMI NE MASHI?

3, 4. (a) Lesa wamwesheshe byepi byo amona mashi? (b) Mashi emenako ka?

3 Baibolo ufunjisha’mba mashi anema bingi mambo bo bumi. Kabiji Yehoba wanemeka bingi bumi. Kaina byo aipayile nkasanji, Yehoba wamwambijile’mba: “Mashi a nkasobe aji mu mushiji abena kunjijila.” (Ntendekelo 4:10) Mashi a kwa Abela aimenejilengako bumi bwanji. Kaina byo aipayile Abela, wachibikizhe bumi bwanji.

4 Muyulo wajingako mu moba a kwa Nowa byo apwile, Lesa waswishishe bantu kuja nyama. Bino wibabuujile’mba: “Nyama uji na bumi ko kuba’mba mashi, kechi mwafwainwa kumuja ne.” (Ntendekelo 9:4) Uno mukambizho waingijilenga ku bonse ba mu kisemi kya kwa Nowa kumvwangakotu ne atweba lelo jino. Kino kyamwekeshatu patoka kuba’mba Yehoba umona mashi amba bo bumi. Ne atweba twafwainwa kumonanga mashi byonka Lesa byo eamona.—Salamo 36:9.

5, 6. Mizhilo ya Mosesa yamwesheshe byepi Yehoba byo amona bumi ne mashi?

5 Mu Mizhilo Lesa yo apele Mosesa, waambile’mba: “Muntu yense . . . waja mashi a byepi nangwa a byepi, nkakana awa yense ukaja mashi kabiji nkamuchibako ku balongo banji. Mambo bumi bwa kintu kyumi buji mu mashi.”—Bena Levi 17:10, 11.

6 Mizhilo ya Mosesa yaambile kuba’mba inge muntu waipaya nyama kuba’mba aje, wafwainwe kwichila mashi panshi. Kino kyalumbulwilenga’mba, bumi bwa nyama bwabwelanga ku Mulenga aye Yehoba. (Mpitulukilo ya mu Mizhilo 12:16; Ezikyo 18:4) Bino Yehoba kechi wakebanga bena Isalela kufumya mashi onse mu  misunyi ya nyama ye baipaya’mba baje ne. Kyo bafwainwe kubatu ke kumukingya, pa kuba’mba mashi afumemo. Kuba bino kwibalengelanga kuja nyama na jiwi ja mu muchima jakasuluka. Kukingya nyama kwamweshanga munema ku mwine upana bumi aye Yehoba. Kabiji Mizhilo yakambizhe bena Isalela kuba’mba bafwainwe kupana milambo ya banyama pa kuba’mba bebalekelengako mambo.—Monai Byambo byo Balumbulula 19 ne Byambo byo Balumbulula 20.

7. Davida wamwesheshe byepi amba wanemeka mashi?

7 Byaubile Davida byo alwilenga na bena Filishitiya byakonsha kwitukwasha kuyuka’mba mashi anema bingi. Banabalume ba kwa Davida byo bamwene kuba’mba Davida waumvwa kilaka, babikile bumi bwabo mu kizumba ne kukatwela na lupata mu kampu wa balwanyi ne kutapula mema mu mushima ne kumuletela’mba atome. Davida wakaine kwiatoma kabiji “wiechijile panshi kwi Yehoba.” Kepo Davida aambile’mba: “Anweba Yehoba, kechi kyayilamo amiwa kuba’mba ngube kino kintu ne! Nanchi nafwainwa kutoma mashi a bano banabalume baji kubika bumi bwabo mu kizumba nyi?” Davida wayukile’mba bumi ne mashi anema bingi kwi Lesa.—2 Samwela 23:15-17.

8, 9. Bena Kilishitu ano moba bafwainwa kumonanga byepi mashi?

8 Kufumatu kimye kyatendekele bwina Kilishitu, bantu ba Lesa balekele kupana milambo ya banyama. Nangwa byonkabyo, bafwainwe kunemeka mashi. Pa mizhilo Yehoba yo apele bena Kilishitu pajinga ne muzhilo wa “kukana . . . mashi.” Uno muzhilo wanemene bingi byonkatu byanemene mizhilo yaambile pa bulalelale ne pa kupopwela bankishi.—Byubilo 15:28, 29.

Nakonsha kulumbulula byepi byo nafuukulapo kwingijisha tubibese tufuma mu bibese bikatampe bina bya mashi?

 9 Ne ano moba byo byo kiji. Byo tuji bena Kilishitu, twayukishatu bulongo kuba’mba Yehoba ye Nsulo ya bumi ne kuba’mba ye mwine mwina bumi. Kabiji twayuka kuba’mba mashi anema bingi kabiji emenako bumi. Onkao mambo, kyanema bingi kulanguluka pa mafunde a mu Baibolo inge tubena kusala mashinda a kubukilwamo.

BYO BENGIJISHA MASHI MU BIPATELA

10, 11. (a) Bakamonyi ba kwa Yehoba bamona byepi kwibabika mashi mu mubiji? (b) Ñanyi bintu mwina Kilishitu byo afwainwa kwifuukwilapo mwine?

10 Bakamonyi ba kwa Yehoba bayuka’mba “kukana . . . mashi” kechi kulumbululatu kubula kwiaja nangwa kwiatoma ne. Bino kulumbulula kubula kubikwa mashi mu mubiji kwingijisha jishinda jiji jonse. Kino kyavwangamo kubikwa mashi nangwa kulama mashi kuba’mba bakeabike jikwabo mu mubiji. Kabiji mwavwangwa kubikwa maselo achila (red cells), maselo atoka (white cells), maselo alengela mashi kuchimba (platelets), ne maselo a mema a mu mashi (plasma).

11 Mashinda amo a kubukilwamo mu kipatela bengijisha maselo ana aji mu mashi. Ku ano maselo bafumyako tubibese tucheche to bengijisha. Mwina Kilishitu yense wafwainwa kufuukulapo mwine kwingijisha tuno tubibese twa mashi nangwa kwingijisha munkinyi ufumya mashi mu mishipeshipe (hemodialysis), munkinyi wa kulaminamo mashi (hemodilution), ne munkinyi uwamisha mashi afuma pa kilonda (cell salvage) avwangamo kwingijisha mashi a muntu mwine o babula kulaminapo mu kintu.—Monai Byambo byo Balumbulula 21.

12. (a) Byo tufuukulapo kuba bimwesha byepi amba twanemeka Yehoba? (b) Twakonsha kufuukulapo byepi bulongo mashinda a kubukilwamo?

 12 Nanchi Yehoba wanemeka bintu byo tufuukula kwesakana na jiwi ja mu muchima nyi? Ee, wanemeka bingi kino. Yehoba utako bingi muchima ku milanguluko yetu ne byo tukeba kuba. (Tangai Byambo bya Maana 17:3; 24:12.) Inge tubena kufuukulapo jishinda ja kubukilwamo, twafwainwa kulomba kwi Yehoba pa kuba’mba etutangijile ne kukebakeba bishinka pa muchi ye tubena kukeba kwingijisha. Inge twauba bino, twafwainwa kulondela jiwi jetu ja mu muchima jo twafunjisha bulongo. Kechi twafwainwa kwambilanga bakwetu kwitufuukwilako byo twafwainwa kuba nangwa kwibabuula bya kuba ne. Mwina Kilishitu “yense ukesendela mwine kisendwa kyanji.”—Ngalatiya 6:5; Loma 14:12.

MIZHILO YA YEHOBA IMWESHA BYO ETUTEMWA

13. Ñanyi bintu byo tufunjilako ku mafunde ne mizhilo ya Yehoba yaamba pa mashi?

13 Tumwenamo bingi mu bintu byonse bitubuula Yehoba kabiji bimwesha’mba witutemwa. (Salamo 19:7-11) Kechi tukookelatu na mambo a kuba’mba tumwenamo mu mikambizho yanji ne. Bino tumukookela mambo twamutemwa. Kutemwa Yehoba kwitulengela kukana kwitubika mashi. Kabiji kuba bino kuzhikijila bumi bwetu. (Byubilo 15:20) Bantu bavula lelo jino bayuka’mba kuji bintu byatama bifumamo inge muntu bamubiika mashi. Kabiji badokotala bavula bayuka’mba kutumbula muntu kwakubula kumubika mashi kuzhikijila balwazhi ku bikola. Kino kyamweshatu patoka’mba tumwenamo mu bintu bitubuula Yehoba.—Tangai Isaya 55:9; Yoano 14:21, 23.

14, 15. (a) Ñanyi mizhilo Yehoba yo apeele bantu banji ya kwibazhikijila? (b) Mwakonsha kwingijisha byepi mafunde aji mu ino mizhilo?

 14 Kufumatu ne kala, bantu ba Lesa bamwenamo bingi mu mizhilo ya Lesa. Yehoba wapeele bena Isalela mizhilo ya kwibazhikijila ku bizumba. Mizhilo imo yaambile’mba muntu washimika nzubo wafwainwe kuzhokoloshako ka lupango peulu ya musemi pa kuba’mba muntu akabule kupona. (Mpitulukilo ya mu Mizhilo 22:8) Muzhilo mukwabo waambilenga pa banyama. Inge muntu walela nyama wakonsha kukozha bantu, wafwainwe kumulama bulongo pa kuba’mba abule kukozha nangwa kwipaya muntu. (Kulupuka 21:28, 29) Inge mwina Isalela wakankalwa kulondela ino mizhilo, bafwainwe kumupamo mambo pa muntu ye baipayile ku bano banyama.

15 Ino mizhilo imwesha’mba Yehoba wanemeka bingi bumi. Kuyuka bino kwakonsha kwitulengela kuba ka? Kwafwainwa kwitulengela kulama bulongo nzubo yetu ne motoka. Kabiji kubula kunyemesha motoka ne kusala bya kisangajimbwe bulongo kumwesha’mba twanemeka bumi. Bantu bamo kikatakata banyike balanguluka’mba kafwako byatama byakonsha kufumamo ne. Kino kibalengela kubula kuta muchima ku bintu byakonsha kwibaletela mapuso. Bino Yehoba kechi byo byo akeba’mba tumonenga bumi ne. Ukeba’mba tunemekenga bumi bwetu ne bwa bakwetu.—Musapwishi 11:9, 10.

16. Yehoba umona byepi kufumya jimi?

16 Bumi bwa muntu yense bwanema bingi kwi Yehoba. Nangwatu bumi bwa mwana ukyangye kusemwa bwanema bingi. Mizhilo Yehoba yo apeele Mosesa yaambile’mba inge muntu wakozha mwanamukazhi uji na jimi kabiji uno mwanamukazhi nangwa  mwana wanji wafwa, Yehoba wapanga muntu mambo a kwipayañana. Kino kyalumbulwilenga’mba nangwa kya kuba bano bantu bafwile na mambo a mapuso bino bafwainwe kupana bumi pa bumi. (Tangai Kulupuka 21:22, 23.) Yehoba wanemeka bumi bwa mwana ukyangye kusemwa byonka byo anemeka bumi bwa muntu wasemwa kala. Pano mwalanguluka’mba umona byepi bantu bafumya mavumo? Mwalanguluka’mba umvwa byepi pa bantu babena kufumya mavumo pa mwaka pa mwaka?

17. Ñanyi kintu kyakonsha kutekenesha mwanamukazhi wafumishepo jimi saka akyangye kuyuka Yehoba?

17 Kyakonsha kwikala byepi inge mwanamukazhi wafumya jimi kwakubula kuyuka’mba Yehoba washikwa kuba bino? Yehoba wakonsha kumulekelako mambo na mambo a kitapisho kya kwa Yesu. (Luka 5:32; Efisesa 1:7) Mwanamukazhi waubilepo bino kala kechi wafwainwa kutwajijila na kwizhachisha inge walapila kya kine ne. Baibolo waamba’mba: “Yehoba ye wa lusa ne kifyele . . . Byonkatu musela byo aji kwalepa na muzhika byo byo abika kwalepa mizhilulwila yetu.”—Salamo 103:8-14.

CHINUZHUKAINGA MILANGULUKO YATAMA

18. Mambo ka o twafwainwa kwibikilako kuchinuzhuka milanguluko yatama?

18 Twafwainwa kunemeka bupe bwa bumi kufuma panshi ya muchima wetu. Kino kyavwangamo ne byo tulanguluka pa bakwetu. Mutumwa Yoano wanembele’mba: “Yense washikwa mulongo wanji ye mbanzhi.” (1 Yoano 3:15) Twakonsha kutendeka kushikwa muntu pachepache. Kushikwa muntu kulengela kubula kumunemeka, kutendeka kwamba bya bubela pe aye nangwa kukeba’mba afwetu. Yehoba wayuka byo tulanguluka pa bakwetu.  (Bena Levi 19:16; Mpitulukilo ya mu Mizhilo 19:18-21; Mateo 5:22) Inge twamona’mba twatendeka kushikwa mukwetu, twafwainwa kwibikako kuchinuzhuka ino milanguluko.—Yakoba 1:14, 15; 4:1-3.

19. Kuyuka Yehoba byo amona bukapondo kwafwainwa kwitulengela kuba ka?

19 Kuji jishinda jikwabo jo twakonsha kumwesheshamo’mba twanemeka bumi. Pa Salamo 11:5 paamba’mba Yehoba “washikwa muntu yense watemwa bukapondo.” Inge ke tusale bya kisangajimbwe muji bukapondo, tumwesha’mba twatemwa bukapondo. Kechi twafwainwa kutemwa bya kisangajimbwe byakonsha kwitulengela kwikala na byubilo bya bukapondo ne.—Tangai Filipai 4:8, 9.

CHINUZHUKAINGA BIPAMO BIBULA KUNEMEKA BUMI

20-22. (a) Yehoba umona byepi ino ntanda iji mu bulume bwa kwa Satana? (b) Bantu ba Lesa bamwesha byepi amba kechi “ba pano pa ntanda” ne?

20 Mu ino ntanda iji mu bulume bwa kwa Satana, bantu kechi banemeka bumi ne. Yehoba wazhachisha ino ntanda na mashi. Pa myaka yavula yapitapo, bipamo bya bumulwila ntanda byaipaya bantu bavula bingi kuvwangakotu ne bakalume ba Yehoba. Mu Baibolo, ano makafulumende bealumbulula nobe banyama bakaji. (Danyela 8:3, 4, 20-22; Lumwekesho 13:1, 2, 7, 8) Lelo jino, bantu babena kupotesha bilwilo bya nkondo. Kabiji bantu balenga mali avula bingi inge ke bapoteshe bilwilo bya nkondo byashinta. Kino kimweshatu patoka’mba “pano pa ntanda ponse paji mu bulume bwa kwa aye mubi.”—1 Yoano 5:19.

21 Bino bena Kilishitu ba kine kechi “ba pano pa  ntanda” ne. Bantu ba Lesa kechi bevwanga mu bya bumulwila ntanda nangwa kulwa nkondo ne. (Yoano 15:19; 17:16) Inge bena Kilishitu ke bebamanyike, kechi bashinkanya ne. Yesu wafunjishe kuba’mba twafwainwa kutemwa balwanyi betu.—Mateo 5:44; Loma 12:17-21.

22 Bupopweshi bwa bubela bo bubena kulengela bantu bavula kufwa. Baibolo waamba pa Babilona Mukatampe, bupopweshi bwa bubela bwa ntanda yonse amba: “Mwi aye mwatainwe mashi a bangauzhi, a bazhijikwa ne a bonse bo baipayile pa ntanda.” O ene mambo Yehoba o etukambizhizha’mba: “Anweba bantu bami, lupukaimo mwi aye.” Bonse bapopwela Yehoba kechi bevwanga mu bupopweshi bwa bubela ne.—Lumwekesho 17:6; 18:2, 4, 24.

23. Ñanyi bintu byo twafwainwa kuba pa kuba’mba ‘tulupuke’ mu Babilona Mukatampe?

23 Pa kuba’mba ‘tulupuke’ mu Babilona Mukatampe, twafwainwa kuleka kupwanañana na bupopweshi bwa bubela. Twafwainwa kumona kuba’mba twafuchisha mazhina etu mu buno bupopweshi. Kuji bintu bikwabo byavula byavwangwamo. Kyanema bingi kushikwa ne kukana bintu byatama byuba baji mu bupopweshi bwa bubela. Bupopweshi bwa bubela butundaika bulalelale, bya bumulwila ntanda ne lunkumbwa. (Tangai Salamo 97:10; Lumwekesho 18:7, 9, 11-17) Pa myaka yavula yapitapo, bantu bavula bafwa bingi.

24, 25. Kuyuka Yehoba kwitulengela byepi kwikala na mutende ne na jiwi ja mu muchima jawama?

24 Saka tukyangye kuyuka Yehoba, atweba bonse twaubangako bintu byatama bibena kumweka mu ino ntanda iji mu bulume bwa kwa Satana. Luno twapimpula byubilo byetu. Twaswa kitapisho kya bukuzhi ne kupana bumi bwetu kwi Lesa. Twimwena ‘Yehoba byo etukokolosha.’  Tuji na mutende ne na jiwi ja mu muchima jawama, mambo twayuka’mba tusangajika Lesa.—Byubilo 3:19; Isaya 1:18.

25 Nangwa kya kuba twajingapo mu kipamo kyabujile kunemeka bumi, Bino Yehoba witulekelako mambo kwingijisha kitapisho kya bukuzhi. Twanemeka bingi bupe bwa bumi bwitupa Yehoba. Tumwesha’mba tusanta inge ke tukwashe bantu kufunda pe Yehoba, kuleka kupwanañana na ino ntanda ne kwikala balunda ne Lesa.—2 Kolinda 6:1, 2.

SAPWILAINGA BANTU PA BUFUMU

26-28. (a) Ñanyi mwingilo wanema Yehoba ye apeele Ezikyo? (b) Ñanyi mwingilo witupa Yehoba lelo jino?

26 Yehoba waingijishe ngauzhi Ezikyo kujimuna bantu ba mu Isalela amba Yelusalema bakamonauna kabiji wibabuujile ne byo bafwainwe kuba pa kuba’mba bakapuluke. Inge kya kuba Ezikyo wakaine kujimunako bantu, Yehoba inge wamupelemo mambo pa bantu bafwile. (Ezikyo 33:7-9) Ezikyo wamwesheshe’mba wanemekele bumi byo asapwijilenga.

27 Ne lelo jino, Yehoba witupa mwingilo wa kujimunako bantu kuba’mba ntanda ya kwa Satana katatakatu akeyonaune ne kwibakwasha kufunda pe Yehoba pa kuba’mba bakapuluke ne kutwela mu ntanda ipya. (Isaya 61:2; Mateo 24:14) Twafwainwa kwingilanga na mukoyo pa kusapwila ku bantu. Twafwainwa kwamba byonka byaambile Paulo amba: “Nabinga ku mashi a bantu bonse, mambo kechi nalekele kwimubuula kyaswa muchima wa Lesa ne.”—Byubilo 20:26, 27.

28 Kuji bintu bikwabo byo twafwainwa kuchinuzhuka mu bwikalo bwetu pa kuba’mba twikale batoka. Tukesamba pa bino mu kitango kyalondelapo.