“Onkao mambo, ipayai binungwa bya mibiji yenu bya pano pa ntanda, na mambo a bulalelale, bubipisho, milanguluko yatama ibindankanya muchima, kusakasaka kubi, ne lunkumbwa, ko kupopwela bankishi.”—KOLOSE 3:5.

1, 2. Balamu waubile byepi pa kuba’mba ongole bantu ba Yehoba?

MUNTU wipaya masabi uya pa kizhiba patanwa masabi o abena kukeba kwipaya. Ubika bujo ku kanda ne kwikataya pa mema. Utendeka kupembelela kabiji inge jisabi jaja ku kanda, wijiloba.

2 Kyokimotu, bantu nabo bakonsha kwibakwata byonka byo bakwata masabi. Kwashajiletu pacheche kuba’mba bena Isalela batwele mu Ntanda ya Mulaye byo bafikile mu Misanza ya Moabu. Mfumu wa bena Moabu waambijile Balamu kuya na kufinga bena Isalela kabiji wamulayile kumupa mali. Nangwa byonkabyo, Balamu kechi wafingile bena Isalela ne. Bino, wamwenepo jishinda jikwabo ja kongwelamo bena Isalela. Watumine banabakazhi bena Moabu mu kampu wa bena Isalela na kujimbaika banabalume.—Kubala 22:1-7; 31:15, 16; Lumwekesho 2:14.

3. Jishinda jaingijishe Balamu jalengejile bena Isalela kuba ka?

3 Nanchi jishinda jaingijishe Balamu jaingijile nyi? Ee jaingijile. Bena Isalela bavula bebongwele byo “batatwile kuba bulalelale na banabakazhi bena Moabu.” Kabiji batendekele kupopwela balesa ba bena Moabu  kuvwangakotu ne lesa wa bunya aye Baela wa Peola, lesa wa lusemo. Kino kyalengejile bena Isalela 24,000 kufwa saka kwashalatu pacheche kutwela mu Ntanda ya Mulaye.—Kubala 25:1-9.

4. Mambo ka bena Isalela bavula o baubijile bulalelale?

4 Jishinda jaingijishe Balamu jalengejile byepi bena Isalela bavula kongolwa? Bateletu muchima pa bintu byakebelenga michima yabo, kino kibalengejile kulubako bibobijile Yehoba. Lesa waubijile bena Isalela bintu byavula bingi byafwainwe kwibalengela kwikala bakishinka kwi aye. Wibafumishe mu buzha mu Ijipita, wibajishishenga mu kiselebwa ne kwibatangijila bulongo pa kuya mu Ntanda ya Mulaye. (Bahebelu 3:12) Nangwa byonkabyo, bebongwele kupichila mu kuba bulalelale. Mutumwa Paulo wanembele’mba: ‘Kechi tubenga bulalelale byonka byo baubilenga bamo bulalelale ne kufwa ne.’—1 Kolinda 10:8.

5, 6. Twakonsha kufunjilako ka ku kyamwekele mu Biselebwa bya Moabu?

5 Ntanda ipya ijitu pepi. Ne atweba ano moba tujitu nobe bene Isalela baji pepi kutwela mu Ntanda ya Mulaye. (1 Kolinda 10:11) Lelo jino, kyubilo kya bulalelale kyasampukila ne pakatele kukila ne byo kyajinga ku bena Moabu. Ne bapopweshi ba Yehoba inge babula kujimuka, bakonsha kutendeka kuba bulalelale. Bulalelale bo bujo Diabola bo abena kwingijisha ano moba.—Kubala 25:6, 14; 2 Kolinda 2:11; Yuda 4.

6 Iipuzhai’mba, ‘Nanchi natemwa kuba bintu biletatu lusekelo pa kimye kicheche nyi, inyi nkeba kutwajijila kwikala na lusekelo myaka ne myaka mu ntanda ipya?’ Nanchi mufuma byawama inge twakookela muzhilo wa Yehoba wa kuba’mba: “Chinai bulalelale” nyi?—1 Kolinda 6:18.

 NANCHI BULALELALE BO BU KA?

7, 8. Nanchi bulalelale bo bu ka? Mambo ka o kyatamina kuba bulalelale?

7 Bantu bavula lelo jino baji na byubilo byatama kabiji balengulula mizhilo ya Lesa yaamba pa kwilaala. Mu Baibolo, kyambo kya bulalelale kilumbulula kwilaala na muntu ye mwabula kwisongola nanji kwesakana na byaamba Binembelo. Akino kyubilo kyavwangamo kwilaala kwa banabalume bonka bonka ne kwilaala kwa banabakazhi bonka bonka nangwa kwilaala na banyama. Bulalelale bulumbulula kwilaala saka mwabula kwisongola, kwilaajila ku kanwa, ku matako nangwa kukwataula binungwa bya lusemo bya muntu mukwabo. Monai Byambo byo Balumbululula 23.

8 Baibolo walumbulula bingi bulongo kuba’mba, yense utwajijila kuba bulalelale kechi wafwainwa kwikala mu kipwilo ne. (1 Kolinda 6:9; Lumwekesho 22:15) Kabiji muntu uba bulalelale wilengulwisha ku bakwabo ne kubula kumuketekela. Kuba bulalelale mufuma bintu byatama, nabiji kwikala na jiwi ja mu muchima jatama, kwimita, makatazho mu masongola, bikola ne lufu. (Tangai Ngalatiya 6:7, 8.) Inge muntu wayuka byatama bifuma mu kuba bulalelale, wakonsha kuchinuzhuka kino kyubilo kyatama. Bino inge muntu ke alanguluketu pa kwilaala ne kutamba bya mulekese, kikamulengela kuba bulalelale. Kutamba bya mulekese kulengela muntu kuba bulalelale.

KUTAMBA BYA MULEKESE

9. Mambo ka o kyatamina kutamba bya mulekese?

9 Bipikichala bya mulekese bilengela bantu kwikala na kilaka kya kukeba kwilaala. Ano moba, bya mulekese bitanwatu konse, mu magazini, mu mabuku, mu nyimbo,  byo batambisha pa tv ne pa intaneti. Bantu bamo balanguluka’mba kafwako byatama byakonsha kufumamo inge ke batambe bya mulekese ne. Bino kishinka ke kya kuba’mba kuba bino kwatama bingi, mambo kulengela muntu kwikala na kilaka kya kukeba kwilaala ne milanguluko yatama. Muntu inge watendeka kutamba bya mulekese, wakonsha kutendeka kwisuka, kwikatazha mu masongola ne kupwisha masongola.—Loma 1:24-27; Efisesa 4:19; monai Byambo byo Balumbulula 24.

Kyanema bingi kwingijisha bulongo intaneti

10. Jifunde jiji mu Yakoba 1:14, 15 jitukwasha byepi kuchinuzhuka bulalelale?

10 Inge twabula kujimuka, twakonsha kutendeka kwikala na muteeto wa kukeba kuba bulalelale. Kinembelo kya Yakoba 1:14, 15 kyaamba’mba: “Muntu yense wesekwa kupichila mu kumukoka ne kumujimbaika ku bya kusakasaka byanji mwine. Kabiji umvwe bya kusakasaka byaimita, bisema bundengamambo; bundengamambo nabo umvwe bwakoma, busema lufu.” Kyanema bingi kukana milanguluko yatama bukiji bukiji. Inge mwamona bipikichala bibindankanya mubiji, mwafwainwa kuleka kwibitamba, kuzhimya kompyuta nangwa kutamba bintu bikwabo. Mwafwainwa kukana milanguluko yatama. Inge mwabula kuba bino, kikemukatazha kwiichinuzhuka.—Tangai Mateo 5:29, 30.

11. Yehoba witukwasha byepi kushinda milanguluko yatama?

11 Yehoba wituyuka bingi bulongo kukila ne byo twiyuka atweba bene. Wayuka’mba twibambulwa kulumbuluka. Bino wayuka ne kuba’mba twakonsha kukana milanguluko yatama. Kabiji Yehoba witubuula ne kuba’mba: “Onkao mambo, ipayai binungwa bya mibiji yenu bya pano pa ntanda, na mambo a bulalelale, bubipisho, milanguluko yatama ibindankanya muchima, kusakasaka kubi, ne lunkumbwa, ko kupopwela  bankishi.” (Kolose 3:5) Kechi kyapeela kuba bino ne, bino Yehoba witutekenya kabiji witukwasha. (Salamo 68:19) Mulongo umo wajinga na muteeto wa kutamba bya mulekese ne kisela kya kwisuka. Balunda nanji ku sukulu balangulukanga’mba kuba bino kechi kwatama ne. Uno mulongo waambile’mba: “Kuba bino kwaonawine jiwi jami ja mu muchima, kabiji kwandengejile kutendeka kuba bulalelale.” Watendekele kushinda milanguluko yatama, kabiji Yehoba wamukwashishe kushinda ino milanguluko. Inge kimukatazha kushinda milanguluko yatama, mwafwainwa kulomba kwi Yehoba kwimupa “bulume bwakila bwa bantu” pa kuba’mba mwikale na milanguluko yawama.—2 Kolinda 4:7; 1 Kolinda 9:27.

12. Mambo ka o twafwainwa ‘kulamina muchima’ wetu?

12 Mfumu Solomone wanembele’mba: “Pa bintu byonse byo ulama, lama muchima wobe, mambo mo muji  masulo a bumi.” (Byambo bya Maana 4:23) “Muchima” wetu, ke byo tuji mukachi kwesakana na bitumona Yehoba. Bintu byo tumona byakonsha kwitulengela kuba bintu byatama. Muntu wakishinka aye Yoba waambile’mba: “Nalayañana lulayañano na meso ami. Byonkabyo, nakonsha kutala byepi kisungu na lwiso?” (Yoba 31:1) Byonka byaubile Yoba, twafwainwa kusalanga bintu byo tutamba ne byo tulangulukapo. Kabiji byonka byalombele nyimbi wa masalamo, ne atweba twafwainwa kulombanga’mba: “Kanyai meso ami kutala ku bintu byatutu.”—Salamo 119:37.

DAINA WAFUUKWILEPO KINTU KYATAMA

13. Daina wajinga na balunda ba mutundu ka?

13 Balunda netu bakonsha kwitulengela kwikala na byubilo byawama nangwa byatama. Inge mwaikala na balunda banemeka mizhilo ya Lesa, bakonsha kwimukwasha ne anweba kutendeka kunemeka mizhilo ya Lesa. (Byambo bya Maana 13:20; tangai 1 Kolinda 15:33.) Byamwekejile Daina bitufunjisha kuba’mba kyanema bingi kusala bulongo balunda. Daina wajinga mwana wamukazhi wa kwa Yakoba. Wakomejile mu kisemi kya bantu bapopwelanga Yehoba. Kechi wajinga na byubilo byatama ne, pano bino wisampile bulunda na bansongwakazhi bena Kenana babulanga kupopwela Yehoba. Bena Kenana kechi balondelanga mizhilo yaambile pa kuchinuzhuka bulalelale ne, kabiji bayukanyikilwe bingi na mambo a byubilo byabo byatama kupusanako na byajinga bantu ba Lesa. (Bena Levi 18:6-25) Juba jimo Daina byo ajinga na balunda nanji, Shekema mwina Kenana watendekele kumufwalama. Shekema “wanemekelwe bingi” kukila bonse ba mu nzubo ya shanji. Pano bino kechi watemenwe Yehoba ne.

14. Ñanyi kintu kyamwekejile Daina?

 14 Shekema waubile kintu kyo amwenenga’mba kijitu bulongo. Na mambo a kuba’mba wamufwalamine bingi Daina, “wamusendele” ne “kulaala nanji.” (Tangai Ntendekelo 34:1-4.) Byaubile Shekema byaletejile Daina ne kisemi kyanji kyonse bya malwa.—Ntendekelo 34:7, 25-31; Ngalatiya 6:7, 8.

15, 16. Twakonsha kwikala byepi na maana?

15 Kechi twafwainwa kuba byonka byaubile Daina wabujile kunemeka mizhilo ya Yehoba itukwasha ne. Baibolo waamba’mba: “Awa wenda na ba maana ukekala na maana, pakuba awa ukaya na bakosama ukamona bya malwa.” (Byambo bya Maana 13:20) Mwafwainwa kwibikila kikonkwanyi kya kuyuka “mashinda onse a bintu byawama,” kuba bino kukemulengela kuchinuzhuka bintu byakonsha kwimuletela makatazho.—Byambo bya Maana 2:6-9; Salamo 1:1-3.

16 Twafwainwa kufundanga Mambo a Lesa pa kuba’mba twikale na maana, kulomba kwi Lesa kimye kyonse saka tukyangye kufuukula bintu ne kulondela lujimuno lufuma ku kalume wa kishinka kabiji wa maana. (Mateo 24:45; Yakoba 1:5) Twayukishatu bulongo kuba’mba twibambulwa kulumbuluka. (Yelemiya 17:9) Mwakonsha kuba byepi inge bemubula’mba muji mu kizumba kya kuba bulalelale? Nanchi mwafwainwa kuzhingila nyi, inyi mwafwainwa kuswa byo babena kwimubula?—2 Bamfumu 22:18, 19.

17. Lumbululai lujimuno lwapana mwina Kilishitu byo lwakonsha kwitukwasha.

17 Akifwanyikizhai kino. Nyenga bakonsha kutendeka kumufwalama ku mwanamulume ku nkito ko engijila ne kumwambila kuyapo kumo na kufwakasha. Uno mwanamulume kechi upopwela Yehoba ne bino uji na muchima  wawama bingi. Nyenga mukwabo wamona byo abena kuba kabiji wamujimunako. Uno nyenga ye bafwalama wakonsha kuba byepi? Nanchi wakonsha kulondela luno lujimuno nyi, inyi wakonsha kutendeka kwikangaizha? Uno nyenga wakonsha kukeba kutokesha Yehoba ku muchima na mambo a kuba’mba wamutemwa. Nanchi inge watwajijila kuya na uno mwanamulume na kufwakasha ko kuba’mba ‘ubena kuchinuzhuka kuba bulalelale’ nyi, inyi ‘waketekela muchima wanji’?—Byambo bya Maana 22:3; 28:26; Mateo 6:13; 26:41.

TWAKONSHA KUFUNJILAKO KU BYAUBILE YOSEFWA

18, 19. Yosefwa wakaine byepi kuba bulalelale? Lumbululai.

18 Yosefwa wajinga muzha mu Ijipita saka akijitu nsongwalume. Pa juba pa juba, muka nkambo yanji wamwambilanga kulaala nanji, bino aye wayukile’mba kyatama  bingi kuba bino. Yosefwa watemenwe bingi Yehoba kabiji wakebelenga kumutokesha ku muchima. Onkao mambo, kimye kyonse uno mwanamukazhi byo ajimbaikanga Yosefwa kulaala nanji, wakananga. Byo ajinga muzha, kechi kyamupelejile kufuma pa nzubo ya nkambo yanji ne. Juba jimo, muka nkambo yanji byo a mukanjikizhe kulaala nanji, wanyemejile pangye.—Tangai Ntendekelo 39:7-12.

19 Yosefwa inge walangulukangatu pa kwilaala ne pa banabakazhi, inge waubile bulalelale. Bino Yosefwa wanemekele bingi bulunda bwanji na Yehoba kukila kintu kiji kyonse. Wabuujile uno mwanamukazhi amba: ‘Nkambo yami . . . wampa luusa pa bintu byonse kufumyakotu anweba yenka, mambo mwi bakazhi babo. Nanchi nakonsha kuba byepi buno bubi bukatampe ne kumulenga mambo aye Lesa?’—Ntendekelo 39:8, 9.

20. Twayuka byepi’mba byaubile Yosefwa byatokeshe Yehoba ku muchima?

20 Nangwa kya kuba Yosefwa wajinga kwalepa na balongo banji, bino watwajijile kwikala wakishinka kwi Lesa, kabiji Yehoba wamupesheshe bingi. (Ntendekelo 41:39-49) Yehoba waumvwine bingi bulongo pa bukishinka bwa kwa Yosefwa. (Byambo bya Maana 27:11) Kechi kyapela kushinda kyubilo kya bulalelale ne. Bino mwafwainwa kuvulukanga bino byambo bya kuba’mba: “Anweba mwatemwa Yehoba, shikwai byatama. Aye uzhikijila bumi bwa bantu banji ba kishinka; wibapokolola mu kuboko kwa mubi.”—Salamo 97:10.

21. Mulongo umo walondejile byepi byaubile Yosefwa?

21 Pa juba pa juba, bantu ba Yehoba bamwesha’mba ‘bashikwa byatama’ ne ‘kutemwa byawama.’ (Amosi 5:15) Mwakonsha kwikala bakishinka kwi Yehoba  nangwa kya kuba mwi banyike nangwa mwi bakulumpe. Mulongo umo lwitabilo lwanji lwaesekelwe. Nsongwakazhi wamubujile’mba, inge amukwasheko nsamushi usa kulaala nanji. Pano uno mulongo waubile byepi? Waubile byonka byaubile Yosefwa. Waambile’mba: “Ponkapotu nakaine byo añambijilenga. Kwikala wakishinka kwi Lesa, kwandengela kunemekwa.” Kwiyowa kwa “pa kakimye kacheche” kufuma mu kuba bulalelale kulengela muntu kwikala bingi na bijikila. (Bahebelu 11:25) Kwikala bakishinka kwi Yehoba kuleta mapesho a myaka ne myaka.—Byambo bya Maana 10:22.

MWAFWAINWA KUKETEKELA MU BUKWASHO BWA YEHOBA

22, 23. Yehoba wakonsha kwitukwasha byepi inge twalenga mambo akatampe?

22 Satana wingijisha bulalelale pa kuba’mba etongole. Kabiji kwibuchinuzhuka kwakatazha bingi. Atweba bonse pa bimye bimo twikala na milanguluko yatama. (Loma 7:21-25) Yehoba wayuka bino, kabiji wayuka’mba “twi lukungu.” (Salamo 103:14) Pano kyakonsha kwikala byepi inge mwina Kilishitu wauba bulalelale? Nanchi kino kilumbulula’mba bunga bwapwila pa mpuki nyi? Ine. Yehoba wakonsha kumulekelako mambo inge walapila kufuma panshi ya muchima. Lesa ‘waswila jimo kulekela mambo.’—Salamo 86:5; Yakoba 5:16; tangai Byambo bya Maana 28:13.

23 Kabiji Yehoba witupa “bantu kwikala bya bupe,” ko kuba’mba bakulumpe mu kipwilo betukwasha. (Efisesa 4:8, 12; Yakoba 5:14, 15) Bano bakulumpe betukwasha kwikala na bulunda bwakosa ne aye.—Byambo bya Maana 15:32.

 ‘IKALAI NA MAANA’

24, 25. Kwikala na “maana” kwakonsha kwitukwasha byepi kuchiina kuba bulalelale?

24 Pa kuba’mba tufuukulenga bintu bulongo, twafwainwa kuyuka bulongo mizhilo ya Yehoba. Kechi twafwainwa kwikala nobe nsongwalume ye baambapo mu Byambo bya Maana 7:6-23 ne. Uno nsongwalume kechi wajinga na “maana” ne. Kino kyamulengejile kuba bulalelale. Muntu uji na maana kechi kilumbulula’mba wajimuka ne. Kwikala na maana kulumbulula kuyuka bulongo mizhilo ya Lesa ne kwiingijisha mu bwikalo bwetu. Vulukainga byambo bya kuba’mba: “Yense wikala na maana witemwa aye mwine. Ne yense wanemeka milangwe ukamona byawama.”—Byambo bya Maana 19:8.

25 Nanchi mwashiinwa’mba mizhilo ya Lesa itukwasha mu bwikalo nyi? Nanchi mwayuka’mba kulondela ino mizhilo kukemulengela kwikala na lusekelo nyi? (Salamo 19:7-10; Isaya 48:17, 18) Inge kechi mwashiinwa ne, vulukainga bintu byawama bimubila Yehoba. Baibolo waamba’mba: “Mutompai Yehoba mumone byo awama.” (Salamo 34:8) Inge saka muba bino kimye kyonse, mukatemwa bingi Lesa. Mwafwainwa kutemwa bintu byatemwa Lesa ne kushikwa bintu byo ashikwa. Langulukainga pa bintu byawama, bintu bya kine, bintu byaoloka, bintu bilengela muntu kwilama bulongo, bintu bileta mutende ne bintu byafwainwa kutotwa ku bantu. (Filipai 4:8, 9) Ne atweba twafwainwa kumwenamo mu maana a Yehoba byonka Yosefwa byo amwenejilemo.—Isaya 64:8.

26. Mu kitango kyalondelapo, tukesamba pa ñanyi bintu?

26 Nangwa muji mu masongola nangwa ne, Yehoba ukeba’mba mwiyowenga bumi ne kwikala na mutende. Bitango bibiji byalondelapo byaamba pa byo twafwainwa kuba pa kuba’mba twikale bulongo mu masongola.