Yehoba walaya’mba: ‘Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala bikapichijila.’

Yehoba wabikile Adama ne Evwa mu bujimi bwa Edena kuba’mba bekalenga mu mutende ne na lusekelo. Bafwainwe kupopwelanga Shabo wa mwiulu ne kusemununa ne kuyuzha ntanda na baana babo. Bino bintu byaalukile Adama ne Evwa byo basatukijile Yehoba. Mu uno buku twafunda kuba’mba byonse byalaya Lesa bikafika. Bufumu bwanji bukalengela bwikalo kuwama bingi pano pa ntanda, byonka byo alayile Abalahama.

Katatakatu Satana ne bandemona ne bantu boba byatama bakebazhiye bonse. Bantu bonse bakekalanga pano pa ntanda, bakapopwelangatu Yehoba kwapwa. Kechi tukakolwanga nangwa kufwa ne. Pa juba pa juba tukabukanga na butuntulu bwa mubiji  bwawama kabiji bwikalo bukawama bingi. Ino ntanda yonse ikekala Paladisa. Bantu bonse bakekala na kajo ne mazubo awama. Bantu bakekala na lusa. Kechi kukekalapotu nangwa umo wakanama muchima nangwa mbanzhi ne. Banyama bamungye kechi baketuchinanga ne. Kabiji ne atweba kechi tukebachinanga ne.

Kabiji tukekala bingi na lusekelo kimye Yehoba kyo akasangula bantu bafwa. Tukamonañana ne na bantu bajingako kala bakasangulwa nabiji Abela, Nowa, Abalahama, Sala, Mosesa, Luta, Eshita, ne Davida. Tukengijilanga nabo pamo pa kwalula ino ntanda ke Paladisa. Ino mingilo iketuletelanga bingi lusekelo.

Yehoba ubena kukeba kuba’mba ne obewa ukekalemo. Popo ukamuyuka bingi bulongo kukila ne byo wamuyuka luno. Tutwajijile kwikala balunda ne Yehoba mu bumi bwetu bonse, kufumatu lelo jino ne myaka ne myaka.

“Anweba Yehoba Lesa wetu, mwafwainwa kutambula lukumo ne buneme ne bulume, mambo yenu mwalengele bintu byonse kabiji na mambo a kyaswa muchima wenu, byaikeleko ne kulengwa.”—Lumwekesho 4:11