1. Ñanyi mambo awama afuma kwi Lesa?

Lesa ukeba bantu kwikala bulongo pano pa ntanda. Walengele ntanda ne byonse bijimo mambo watemwa bantu. Kabiji katatakatu akawamishe bwikalo bwa bantu mwaya ntanda. Ukafumyapo bintu bilengela bantu kuyanda.—Tangai Yelemiya 29:11.

Kafwako kafulumende wakipwishapo kala bukapondo, bikola nangwa lufu ne. Pano bino kuji mambo awama. Katatakatu Lesa akafumyepo makafulumende a bantu ne kupingishapo kafulumende wanji. Bangikazhi ba mu uno kafulumende bakekala mutende kabiji kechi bakakolwanga ne.—Tangai Isaya 25:8; 33:24; Danyela 2:44.

2. Mambo ka ano mambo awama kyo anemena?

Buyanji bukapwatu inge Lesa wafumyapo bantu batama pano pa ntanda ponse. (Zefwaniya 2:3) Kino kikobiwa kimye ka? Mambo a Lesa aambijile jimo bintu bibena kupitamo bantu lelo jino. Bintu byatama bibena kubiwa pano pa ntanda bimweshatu patoka kuba’mba Lesa katatakatu obepo kimo.—Tangai 2 Timoti 3:1-5.

3. Twafwainwa kuba ka?

Twafwainwa kufunda pe Lesa mu Mambo anji Baibolo. Iji nobe nkalata yafuma kwi shetu witutemwa bingi. Itubula byo twakonsha kwikala bwikalo bwawama lelo jino ne bya kuba pa kuba’mba tukekale na bumi bwa myaka pano pa ntanda. Kechi bonse bakatemwa’mba mufundenga Baibolo ne. Onkao mambo, Lesa byo etulaya bwikalo bwawama, kechi tuleke muntu nangwa umo kwitulengela kuleka kufunda pe Lesa ne.—Tangai Byambo bya Mana 29:25; Lumwekesho 14:6, 7.