BIJI MU KINO KITANGO

Na mambo a kwikala bakishinka ku Bufumu, bantu ba Lesa batwajijila kubula kwikala ba pano pa ntanda

1, 2. (a) Ñanyi jifunde jilondela baana ba bwanga ba kwa Yesu kufikatu ne lelo jino? (b) Balwanyi baeseka byepi kukeba kwitushinda, kabiji bika byafumamo?

YESU waimene kwi Pilato wajinga mutonyi wa bulume mu Yudea waambile pa muzhilo ulondela baana banji ba bwanga kufikatu ne lelo jino. Waambile’mba: “Bufumu bwami kechi bwa pano pa ntanda ne. Umvwe bwajinga bwa pano pa ntanda, inge bakalume bami bajikundwilako kuba amba babule kunsolola ku Bayudea. Pakuba bufumu bwami kechi bwa pano pa ntanda ne.” (Yoa. 18:36) Nangwa kya kuba Pilato waswishishe kwipaya Yesu, bino kechi wafwile kikupu ne. Yesu wasangwilwe. Bamfumu ba mu Bufumu bukatampe bwa bena Loma bakebeshe bingi kuzhiya baana ba bwanga ba kwa Kilishitu, bino bakankelwe. Bena Kilishitu basampenye mambo a Bufumu mu ntanda yonse pa kyokya kimye.—Kolo. 1:23.

2 Panyuma ya kwikajikwa kwa Bufumu mu 1914, mazhita amo ajinga na bulume akebelenga kuzhiya bantu ba Lesa. Bino bonsetu bakankelwe. Makafulumende avula ne bipanyi bya bumulwila ntanda baesekele kwitukanjikizha kuba’mba twivwange mu milukuchi yabo, bino bakankelwe. Lelo jino, bantu bakalamwanga na Bufumu baji mu mapunzha onse pano pa ntanda. Nangwa byonkabyo, twakwatankana mu bulongo bwa ntanda yonse kabiji twatwajijila kubula kwivwanga mu bya bumulwila ntanda. Kukwatankana kwetu kumwesha kuba’mba Bufumu bwa Lesa bubena kulama kabiji Mfumu aye Yesu Kilishitu watwajijila kutangijila, kuwamisha ne kuzhikijila bantu banji. Akimonai byo auba bino, nabiji kwitukwasha kubinga mambo mu kochi kwalengela lwitabilo lwetu kukosa byo tutwajijila kubula ‘kwikala ba pano pa ntanda.’—Yoa. 17:14.

Mambo Abayile

3, 4. (a) Ñanyi bintu byamwekele pa kimye kya kwikajikwa kwa Bufumu? (b) Nanchi bantu ba Lesa baumvwisha byo kilumbulula kubula kwikala ba pano pa ntanda nyi? Lumbululai.

3 Panyuma ya kwikajikwa kwa Bufumu, mwiulu mwabukile nkondo kabiji Satana bamwelele pa ntanda. (Tangai Lumwekesho 12:7-10, 12.) Ino nkondo yaishile ne pa ntanda ayo yalengejile bantu ba Lesa kwesekwa. Bakebeshe bingi kulondela kyakumwenako kya kwa Yesu kya kubula kwikala ba pano pa ntanda. Patanshitu, kechi bayukile byavwangwamo mu kubula kwikala ba pano pa ntanda ne.

 4 Kyakumwenako, bibaaba bya mu Volyumu VI wa buku wa Millennial Dawn, * wanembelwe mu 1904, watundaikile bena Kilishitu kubula kwivwanga mu nkondo. Nangwa byonkabyo, kyaambile kuba’mba umvwe mwina Kilishitu watwela nkito ya bushilikale wafwainwe kwingila mingilo mwabula bya kulwa. Umvwe babula kumupa nkito ya uno mutundu, bino bamutuma ku nkondo, kechi wafwainwe kwipayañana ne. Pa kwamba pa bintu byo byajinga pa kyokya kimye, ba Herbert Senior baikalanga mu Britain babatizhiwe mu 1905, baambile’mba: “Balongo kechi bayukile umvwe kyajingatu bulongo kutwela nkito ya bushilikale kwa kubula kulwako nkondo ne.”

5. Kyamba kya Usopa kya September 1, 1915, kyalumbulwile bulongo byepi bintu byo twaitabilamo?

5 Nangwa byonkabyo, Kyamba kya Usopa kya September 1, 1915, kyalumbulwile bulongo bishinka pa byo bafwainwe kuba. Kwesakana na byambo byajinga mu buku wa Studies in the Scriptures, byaambile’mba: “Kechi twayuka inge kutwela nkito ya bushilikale kwa kubula kwipayañana kulala mizhilo ya bwina Kilishitu ne.” Pano ibyepi inge kya kuba mwina Kilishitu bamwambila kuba’mba basa kumuloza inge wakana kivwalo kya bushilikale ne nkito ine? Kibaaba kyaambile’mba: “Nanchi kyakonsha kutama umvwe bamuloza na mambo a bukishinka ku Mfumu wa Mutende ne kukana kumukookela pa kuba’mba babule kumuloza saka abena kwingijila bamfumu ba pano pa ntanda, ne kubepekezha nobe ubena kulondela bifunjisha Mfumu wetu wa Mwiulu nyi? Kyawama kufwila mu bukishinka na mambo a Mfumu wa Mwiulu.” Nangwa kyajinga bino, kibaaba kyapezhezheko amba: “Kechi tubena kukanjikizha kuba bino ne, kyakonsha kuwama kulondela bino.”

6. Mwafunjilako ka ku kyakumwenako kya Mulongo Herbert Senior?

6 Balongo bamo bamwene kuba’mba kechi kyaijilemo kutwela nkito ya bushilikale ne, onkao mambo benengezhezhe ku bikebamwekela pa kukana kutwela nkito. Ba Herbert Senior, bo twaambapo kala baambile’mba: “Kechi namwenepo lupusano pa kulongolola nsase mu bwato ne kubika nsase mu buta ne.” (Luka 16:10) Na mambo a kuba Mulongo Senior wakaine kutwela nkito ya bushilikale, bamutaile pa kazhima. Aye ne balongo bakwabo 4 bajinga pa jibumba ja bantu 16 bakaine kutwela ino nkito, kubikapotu ne banabalume bafumine mu bupopweshi bukwabo, baingijilemo mu kaleya ka Richmond mu Britain ako katendekele kutelwa kuba’mba Richmond 16. Juba jimo, ba Herbert ne bakwabo bebatwajile kwajinga nkondo mu France amba bakebaloze kwa kubula kuyukanyikwa ne. Abo ne bakwabo bebemikile mu munongo amba bebaloze ku bashilikale bajinga na mata. Bino kechi bebepayile ne. Bebachibijileko myaka 10 ya kwikala mu kaleya.

“Bantu ba Lesa bafwainwa kwikala ba mutende ku bantu bonse nangwatu kimye kya nkondo.”—Simon Kraker (Monai jifuka 7)

7. Nkondo ya Bubiji ya Ntanda Yonse byo yatendekelenga, bantu ba Yehoba bayukile ka?

7 Nkondo ya Bubiji ya Ntanda Yonse byo yatendekelenga, bantu ba Yehoba bayukile byo kyalumbulwilenga kubula kwikala ba pano pa ntanda ne byo bafwainwe kuba pa kulondela kyakumwenako kya kwa Yesu. (Mat. 26:51-53; Yoa. 17:14-16; 1 Pe. 2:21) Kyakumwenako, mu Kyamba kya Usopa kya  November 1, 1939, mwajinga kibaaba kyanema kyajinga na mutwe wa kuba’mba “Kubula Kwivwanga mu bya Pano pa Ntanda,” kyaambile’mba “Muzhilo wafwainwa kulondela bantu balayañana ne Yehoba ke kubula kwivwanga mu bya pano pa ntanda inge kuji nkondo ya pakachi ka mikoka.” Pa kwamba pa kino kibaaba, ba Simon Kraker baingijileko pa ofweshi mukatampe wa mu Brooklyn, mu New York, baambile’mba: “Bantu ba Lesa bafwainwa kwikala ba mutende ku bantu bonse nangwatu kimye kya nkondo.” Kano kajo ka ku mupashi kanengezhiwe pa kimye kyafwainwa kabiji kakwashishe bantu ba Lesa kwinengezha ku lumanamo na mambo a kwikala bakishinka ku Bufumu.

Kwibachiinya na Lumanamo Luji Nobe “Mukola”

8, 9. Nga bungauzhi bwa kwa Yoano bwafikile byepi?

8 Mutumwa Yoano waambijile jimo kuba’mba panyuma ya kwikajikwa kwa Bufumu mu 1914, nsuñunyi, Satana Diabola ukakebesha kuzhiya bonse batundaika Bufumu bwa Lesa kupichila mu kupala mema a kifwanyikizho kufuma mu kanwa kanji. * (Tangai Lumwekesho 12:9, 15.) Nga bungauzhi bwa kwa Yoano bwafikile byepi? Kutendeka mu myaka ya mu ma 1920 ne kuya kulutwe, kwajinga lumanamo lukatampe bingi ku bantu  ba Lesa.Byonkatu byo bamanyikile balongo baikalanga mu North America kimye kyo kwajinga Nkondo ya Bubiji ya Ntanda yonse, Mulongo Kraker bamutaile pa kazhima na mambo a kwikala wakishinka ku Bufumu bwa Lesa. Kimye kyo kwajinga nkondo, pa bakaili bonse bajinga mukaleya, Bakamonyi ba kwa Yehoba bo bavujijilemo na mambo a kukana kuya ku nkondo kabiji bebatwajile ku tuleya twa mu United States.

9 Diabola ne bo engila nabo baimenejile pa konauna bukishinka bwa bangikazhi bakalamwanga na Bufumu konse ko baji. Mu Africa, Europe, ne mu United States bebatwajile mu makochi ne ku bantu bafuukula umvwe kaili wafwainwa kufuma mu kaleya nangwa ne. Na mambo a kutwajijila kubula kwikala ba pano pa ntanda, bebatayanga pa kazhima, kwibapuma, ne kwibalemeka. Mu Germany, bantu ba Lesa bebamanyikile bingi na mambo a kukana kutundaika Hitler nangwa kulwako nkondo. Mu kimye kya lumanamo lwa ba Nazi, banabalume ne banabakazhi pepi 6,000 bebatayile pa kazhima kabiji kukila pa Bakamonyi 1,600 bena Germany ne babula bena Germany bafwile na mambo a kumanyikwa. Nangwa byonkabyo, Diabola kechi watwajijile kumanyika bantu ba Lesa ne.—Mako 8:34, 35.

“Ntanda” Yamina “Mukola”

10. Nga “ntanda” ilumbulula ka, kabiji yalwilako byepi bantu ba Lesa?

10 Bungauzhi bwanembele mutumwa Yoano bwaambile’mba “ntanda” ko kuba’mba bintu biji mu ntanda byanema bikamina “mukola” wa lumanamo, kabiji kino kikapulusha bantu ba Lesa. Luno lubaji lwa buno bungauzhi bwafika byepi? Panyuma ya Nkondo ya Bubiji ya Ntanda Yonse, “ntanda” yalwilako bantu bakishinka batundaika Bufumu bwa Bumesiasa. (Tangai Lumwekesho 12:16.) Kyakumwenako, makochi avula azhikijila lūsa lwa Bakamonyi ba kwa Yehoba kubula kutwela mu bushilikale ne kukana inge bebambila kusekelela kwa kutemwa kyalo. Patanshi, akimonai Yehoba byo akwasha bantu banji kubinga mambo mu makochi aamba pa kwingilako nkito ya bushilikale.—Sala. 68:20.

11, 12. Ñanyi makatazho apichilemo Mulongo Sicurella ne Thlimmenos, kabiji bintu ka byafuminemo?

11 United States. Anthony Sicurella wajinga pa baana 6 bo bakomeshe ku bansemi Bakamonyi. Byo afikizhe myaka 15, wabatizhiwe. Byo afikizhe myaka 21, wanembeshe ku kochi utala pa bantu batwela mu bushilikale amba wajinga wa mwingilo wa bupopweshi. Panyuma ya myaka ibiji, mu 1950, wanembejile kochi kuba’mba wakaine kutwela nkito ya bushilikale. Nangwa kya kuba sawakya wafumine ku kipamo kya Federal Bureau of Investigation kechi kyamutainepo na mambo ne, bino Department of Justice kechi kyaitabile byo aambilenga ne. Panyuma ya kutotolola mambo pa kimye kyabaya, Kochi Mukatampe wa mu U.S. wabingishe Mulongo Sicurella kupichila mu kubwezhapo mambo atotolwele kochi mucheche. Jishinda jachibijilemo Kochi Mukatampe mambo, jalengejile bangikazhi  bakwabo ba mu United States bakananga kutwela nkito ya bushilikale kubula kwibapamo mambo.

12 Greece. Mu 1983, Iakovos Thlimmenos bamupelemo mambo a kukana kuvwala bivwalo bya bashilikale ne kumutaya pa kazhima. Byo bamufumishe, wakebelenga kutwela nkito, bino nkalata yanji beikaine na mambo a kuba’mba wajingapo mu kaleya. Watwajile mambo ku kochi, bino panyuma ya kumuzhachisha na mambo ku makochi a mu Greece, watwajile ano mambo ku European Court of Human Rights (Kochi Mukatampe wa mu Europe Utala pa Lūsa lwa Bantu). Mu 2000, mu kino kyonka kije mwajinga mitonyi 17, bamubingishe mambo kabiji kino kyamwesheshe byo bafwainwa kuba ne ku bantu bakwabo kwa kubula misalululo. Saka bakyangye kwamba ano mambo, balongo kukila pa 3,500 mu Greece bebapele onka ano mambo ne kwibakasa na mambo a kukana kwivwanga mu bya pano pa ntanda. Panyuma ya ano mambo, balengele Mizhilo mu Greece ya kuba’mba balongo bonse kechi bafwainwa kwibapamo mambo ne, kabiji ne Mizhilo ikwabo ya kuswisha bena Greece bonse kutwela nkito yo bakeba kukila ya bushilikale yo balengele panyuma ya kupitapotu myaka icheche kabiji beikoseshe byo bapitulukile mu Mizhilo ya mu Greece.

“Saka nkyangye kutwela mu kije kya mambo, nalombele kwi Yehoba, kabiji wankwashishe pa kwamba.”—Ivailo Stefanov (Monai jifuka 13)

13, 14. Ñanyi bintu byo twafwainwa kufunjilako ku mambo ajingamo Mulongo Stefanov ne Bayatyan?

13 Bulgaria. Mu 1994, Ivailo Stefanov wajinga na myaka 19 kimye kyo bamusendele mu bushilikale. Wakaine kutwela mu bushilikale nangwa kwingilako mingilo ya bushilikale ya kubula kulwako nkondo. Bamutaile pa kazhima pa bañondo 18 bino walobele jikwabo ku kochi na mambo a lūsa lwanji lwa kukana kwingila nkito ya bushilikale. Mambo anji beatwajile ku kochi wa ECHR. Mu 2001, saka bakyangye kutotolola mambo, Mulongo Stefanov bamwipwizhe mambo anji byo ajinga. Kafulumende wa ku Bulgaria kechi walekejilekotu mambo Mulongo Stefanov ne, bino ne bonse bena Bulgaria bakebelenga kutwela mingilo ikwabo ya bushilikale. *

14 Armenia. Vahan Bayatyan wafikizhe myaka ya kwingila mwingilo wa bushilikale mu 2001. * Bino wakaine kwingila bushilikale kabiji nangwa walobele jibiji kechi bamubingishe mu makochi onse ne. Mu September 2002, wajinga mu kaleya pa myaka ibiji ne kichika, bino bamufumishe panyuma ya bañondo jikumi ne kichika. Pa kyonka kye kimye, walobele jibiji ku Kochi Mukatampe wa mu Europe Utala pa Lūsa lwa Bantu watotolwele mambo anji. Nangwa byonkabyo, pa 27 October, 2009, kino Kije kya Mambo kya muzhachishe. Byo bachibile ano mambo byalengejile balongo mu Armenia kwikala mu lukatazho. Nangwa byonkabyo, Kochi Mukatampe Utala pa Lūsa lwa Bantu wafuukwilepo kutotolola jikwabo ano mambo. Pa 7 July, mu 2011, uno Kochi wabingishe Vahan Bayatyan. Kino kyo kyajinga kimye kitanshi Kochi Mukatampe Utala pa Lūsa lwa Bantu kuswisha amba kukana kwingila mwingilo wa bushilikale  na mambo a byaitabilamo muntu byafwainwa kulondelwa na mambo a lūsa lwa kukasuluka mu milanguluko, jiwi ja mu muchima ne mu mpopwelo. Ino nchibilo ya mambo kechi yazhikijiletu lūsa lwa Bakamonyi ba kwa Yehoba ne, bino ne bantutu bavula baji mu byalo muji kipamo kya Council of Europe. *

Balongo ba mu Armenia bafuma mu kaleya panyuma ya kubinga mambo ku kije kya ECHR

Kusekelela kwa Kumwesha Kutemwa Kyalo

15. Mambo ka bantu ba Yehoba o bakaina kwivwanga mu bya kusekelela bya kumwesha kutemwa kyalo?

15 Bantu ba Yehoba batwajijila kwikala bakishinka ku Bufumu bwa Bumesiasa kechi kupichilatu mu kubula kutwela nkito ya bushilikale ne, bino ne kukana kusekelela bisela bimwesha amba batemwa kyalo. Kufumatu kimye kyatendekele Nkondo ya Bubiji ya Ntanda Yonse, bantu batemwa bingi kusekelela bisela bimwesha kuba’mba batemwa kyalo kyabo. Bangikazhi ba mu byalo byavula balondela mizhilo ya kyalo kyabo kupichila mu kwimba lwimbo wa kyalo, nangwa kupika sulupu ku mbandela. Nangwa byonkabyo, tupanatu munema kwi Yehoba.  (Lupu. 20:4, 5) Betumanyika bingi na mambo a kuba bino. Bino Yehoba waingijishe “ntanda” kumina luno lumanamo. Akimonai Yehoba byo etukwasha kupichila mwi Kilishitu kubinga mambo amo.—Sala. 3:8.

16, 17. Ñanyi Lukatazho lwapichilemo Lillian ne William Gobitas, kabiji mwafunjilako ka ku kino?

16 United States. Mu 1940, ba mitonyi 8 ba mu Kochi Mukatampe wa mu U.S. bapelemo mambo Bakamonyi ba kwa Yehoba pa mambo ajinga pakachi ka sukulu wa Minersville School District ne kisemi kya Gobitis bino mutonyi umotu ye wakaine byaambile bakwabo. Lillian Gobitas, * wajinga na myaka 12, ne nkasanji aye William, wa myaka 10, bakebelenga kwikala bakishinka kwi Yehoba. Onkao mambo, bakaine kupika sulupu ku mbandela nangwa kulaya kuba’mba bakalondelanga mizhilo yonse ya kyalo. Na mambo a bino, bebapangile sukulu. Baletele mambo ku Kochi Mukatampe, kabiji wachibile kuba’mba sukulu walondelanga mizhilo ya mu kyalo kya United States mambo yalengelanga “kyalo kwikala kyakwatankana.” Ino nchibilo ya mambo yalengejile lumanamo lukatampe. Baana ba Bakamonyi bavula bebapangile masukulu, bakulumpe makito apwile, kabiji ne Bakamonyi bavula bebamanyikile ku biombe bya bantu bazhingijile. Buku wa kuba’mba The Lustre of Our Country waamba kuba’mba “kumanyikwa kwa Bakamonyi kufuma mu 1941 kufika mu 1943, lo lumanamo lwabayile bingi lwa bupopweshi mu America mu kitota kya myaka kya bu 20.”

17 Kushinda kwa balwanyi ba Lesa kechi kwatwajijile ne. Mu 1943, Kochi Mukatampe watotolwele mambo akwabo epasha na mambo a kisemi kya ba Gobitis. Ano mambo beatelelenga amba West Virginia State Board of Education ne Barnette. Pa kikye kimye, Kochi Mukatampe wabingishe mambo Bakamonyi ba kwa Yehoba. Kyajinga kimye kitanshi Kochi Mukatampe wa mu U.S. kuchiba jibiji mambo amotu mu kimye kicheche. Panyuma ya ano mambo, kumanyikwa kwa bantu ba Yehoba mu United States kwatulumeneko. Mu kuya kwa kimye, lūsa lwa bangikazhi ba mu United States lwabayijileko.

18, 19. Pablo Barros waambile’mba ki ka kyamukwashishe kutwajijila kuchinchika, kabiji bakalume ba Yehoba bakonsha kulondela byepi kyakumwenako kyanji?

18 Argentina. Pablo ne Hugo Barros, bajinga na myaka ya kusemwa 8 ne 7, bebapangile ku sukulu mu 1976 na mambo a kubula kwivwanga mu kisela kya kushikula mbandela. Juba jimo, mukulumpe wamukazhi wa pa sukulu wavwembele Pablo ne ku mwimba nkapila ku mutwe. Washajikile bano bonse babiji pa jiola jimo panyuma ya kukotoka ne kwibakanjikizha kwivwanga mu bya kusekelela bya kyalo. Pablo pa kuvuluka byamwekelenga waambile’mba: “Kwakubula bukwasho bwa Yehoba, inge kechi nachinchikile makatazho aesekelenga lwitabilo lwami ne.”

19 Mambo byo ayile ku kije kya mambo, mutonyi waswishishe byafuukwile sukulu kuba’mba bafwainwa kupanga Pablo ne Hugo. Nangwa byonkabyo, balobele jibiji ku Kochi Mukatampe wa mu Argentina. Mu 1979, uno Kochi wachibile byapusanako  na byachibile kochi mucheche amba: “Kwibapanga sukulu ke kulala muzhilo waamba pa lūsa lwa kufunda sukulu mu mizhilo ya kyalo (Muzhilo 14) ne mwingilo wa Kyalo wa kufunjisha bantu (Muzhilo 5).” Ino nchibilo ya mambo yalengejile baana ba Bakamonyi pepi 1,000 kufunda sukulu. Bamo bo bakebelenga kupanga kechi bebapangile ne, kabiji bakwabo nabo nabiji Pablo ne Hugo, bebabwezhezhe ku masukulu.

Bakamonyi banyike bavula bachinchika lweseko

20, 21. Mambo ajingamo Roel ne Emily Embralinag, akosesha byepi lwitabilo lwenu?

20 Philippines. Mu 1990, Roel Embralinag, * wajinga na myaka 9, ne nyenga yanji Emily wajinga na myaka 10, pamo na baana ba sukulu bakwabo Bakamonyi 66, bebapangile sukulu na mambo a kukana kupika sulupu ku mbandela. Bashanji Roel ne Emily abo ba Leonardo baesekele kwisamba na bakulumpe ba sukulu, pano bino kechi bebomvwine ne. Ano mambo byo akosele, ba Leonardo balobele ku Kochi Mukatampe. Ba Leonardo kechi bajinga na mali nangwa wakwibemenako ku mambo mu kochi ne. Kino kisemi kyalombele bingi kwi Yehoba pa kuba’mba ebatangijile. Pa kikye kimye, baana babo  bebasekelenga ne kwiboba mwenga. Ba Leonardo balangulukilenga kuba’mba kechi bakabinga ano mambo ne, mambo kechi bayukile bya kwamba mambo ne.

21 Waimenejileko kino kisemi mu mambo wajinga Felino Ganal, mukulumpe wayuka mizhilo wajinga wa mwingilo ku makampanyi aya nkuwa mu kyalo atala pa mizhilo. Kimye kyo batotolwelenga ano mambo, Mulongo Ganal walekele nkito ne kwikala ke Kamonyi wa Yehoba. Byo baletele ano mambo ku Kochi Mukatampe, wabingishe Bakamonyi ne kufumyapo muzhilo wa kupanga baana ba sukulu. Bonse bakebelenga konauna bukishinka bwa bantu ba Lesa bakankelwe.

Kubula Kwivwanga mu bya Pano pa Ntanda Kulengela Kukwatankana

22, 23. (a) Mambo ka o twabingila mambo avula mu makochi? (b) Bulongo bwetu bwa ntanda yonse bumwesha ka?

22 Mambo ka bantu ba Yehoba o babingila mambo avula mu makochi? Mambo kechi twivwanga mu bya bumulwila ntanda ne. Mu byalo ne mu makochi avula, bamitonyi bachiba mwayila mambo betuzhikijila ku bantu betushikwa, kabiji kino kyalengela kupimpulako mizhilo ya byalo. Kwakubula nangwa kuzhinaukatu ne, Kilishitu ye walengela kubinga onse ano mambo. (Tangai Lumwekesho 6:2.) Mambo ka o tutwajila mambo ku kochi? Kechi tukeba kupimpula mizhilo ya kyalo ne. Kyo tukeba ke kutwajijila na kwingijila Mfumu wetu, aye Yesu Kilishitu kwa kubula kwitukanya.—Byu. 4:29.

23 Nangwa kya kuba tuji mu ntanda muji milukuchi ya bumulwila ntanda ne bantu betushikwa, Mfumu wetu ubena kulama aye, Yesu Kilishitu, wapesha baana banji ba bwanga ntanda yonse pa kutwajijila kubula kwikala ba pano pa ntanda. Satana wakankalwa kwitwabanya ne kwitushinda. Bufumu bwakonkanya bantu bavula bakabula ‘kufunda jibiji kulwa nkondo.’ Bulongo bwetu bwa ntanda yonse ke kintu kya kukumya kitulengela kubula kuzhinauka kuba’mba Bufumu bwa Lesa bubena kulama!—Isa. 2:4.

^ jifu. 4 Uno volyumu bamutela ne kuba’mba The New Creation. Kabiji mavolyumu a Millennial Dawn batendekele kwiatela amba Studies in the Scriptures.

^ jifu. 8 Inge mukeba kuyukilapo bikwabo pa buno bungauzhi, monai buku wa Kibemba wa kuba’mba Ukusokolola—Akalume ka Kuko Kakalamba Nakapalama!, kitango 27, mapa 184-186.

^ jifu. 13 Muzhilo ye balengele walengejile kafulumende wa ku Bulgaria kuswisha bantu kwingilako nkito ikwabo yabujile kwikala ya bushilikale ku bonse bakaine nkito ya bushilikale.

^ jifu. 14 Umvwe mukeba kuyukilapo byavula pa jino jishimikila, monai Kyamba kya Usopa kya November 1, 2012, mapa 29-31.

^ jifu. 14 Pa myaka 20 yapitapo, kafulumende wa ku Armenia watayile pakazhima banyike Bakamonyi kukila pa 450. Mu November 2013, bebafumishe mu kaleya kabiji bo bapeleleko.

^ jifu. 16 Jino jizhina ja kisemi balubankenye pa kunemba bisopelo mu mabuku a mu kochi.

^ jifu. 20 Jino jizhina ja kisemi balubankenye pa kwijinemba amba Ebralinag mu mabuku a mu kochi.