Panyuma ya kwibapokolola pa Kalunga ka Mema Kachila mu maboko a kwa Felo ne nzhita yanji, bena Isalela bajinga na bishinka byavula bingi bibalengejile kumusanchila Yehoba. Ne atweba twafwainwa kusanchilanga Yehoba. Kya kine ku­ba’mba twakonsha kulefulwa umvwe ketupite mu meseko. Mu bimye bya uno mutundu, kulanguluka pa bintu byawama bitubila Lesa kwakonsha kwitutekenesha ne kwitukosesha.

 Pa bintu byawama bitupa Lesa, paji ne luketekelo lwa kupokololwa ku bintu byonse bitulengela kuyanda ne bya malwa. Nangwatu tukapite mu makatazho a mutundu ka, twayuka ku­ba’mba Yehoba kechi uketulekela ne. Kafunga wetu witutemwa bingi witunengezhezha byonse byo tukeba pa ku­ba’mba tumwingijilenga mu bukishinka. Aye “ye kya kufyamamo kyetu kabiji bo bulume bwetu, witukwasha kimye kyonse kyo tupita mu bya malwa.” (Sala. 46:1) Kulanguluka pa bintu byawama bitubila Lesa kuketukwasha kuyuka bya kuba na makatazho akatampe a mu bwikalo. Mu uno mwaka yense, twayai tulangulukenga na lusekelo pa bintu bitubila Lesa kabiji bino bintu bitulengelenga ‘kumusanchila Yehoba, mambo wawama; butemwe bwanji bubula kwaluka bo bwa myaka ne myaka.’Sala. 106:1.