“Tukebazhiya”

Ba Borbonio Aybar babatizhiwe pa 19 January mu 1955 kimye kyo bakainye mwingilo wetu. Byo babatizhiwe, bajinga na mafunjisho a Baibolo avula bingi mu Monte Adentro ne mu Santiago. Kimye kyo baswishishe mwingilo wetu, mu 1956, bamo bobafunjishanga Baibolo babatizhiwe ne bakazhi babo pamo.

Na pakachi ka ñondo wa July mu 1957, babinemanga ba mu kafulumende basambakene pamo mu Salcedo na kwisamba byatama pa Bakamonyi. Mulongo Aybar waambile’mba: “Francisco Prats-Ramírez ye wajinga ñambi pa kuno kusambakana kwabo. Prats-Ramírez waambile’mba, ‘Tusakwibazhiya mu mobatu acheche.’” Byo papichile moba acheche, pa 19 July mu 1957, bakapokola bakwachile Bakamonyi ba kwa Yehoba ku Blanco Arriba, ku El Jobo, ku Los Cacaos, ne ku Monte Adentro.

Mulongo Aybar waambile’mba: “Ne amiwa najinga pa boba bo bakwachile. Betutwajile ku kampu mukatampe wa bashilikale. Byo twafikile kokwa, mukulumpe wa bashilikale aye Saladín wapumine bingi. Wasamwinenga ne meso na bukaji byo etukajipijilenga, kepo betwambijile kutantama mu munongo, banabalume na wabo ne banabakazhi nabo na wabo.’ Baota batendekele kwitupantaula, kupuma banabalume, ne kuzhipaula banabakazhi na bizhipwila, saka babena kwamba’mba, ‘Amiwa ne Katolika kabiji ngipayañana.’”

“Ntanga Baibolo, kabiji nayuka kuba’mba Yehoba ye Lesa”

Mulongo Aybar bamukashile bañondo basatu mu kaleya. Mulongo Aybar watwajijila’mba: “Kimye kyo twajinga mu kaleya, mukulumpe wa bashilikale aye Santos Mélido Marte waishile na kwitumona. Waambile’mba: ‘Ntanga Baibolo, kabiji nayuka kuba’mba Yehoba ye Lesa. Kechi mwaubapo kintu kyatama nangwa kimo kya kwimukashilapo ne, bino  kechi nakonsha kwimukasulula ne, mambo ba bishopu baba Katolika bo bemwimena kuntundwa kuba’mba bemukase. Bakonsha kwimukasulula ke abo bonka ba bishopu nangwa ba jefe (ko kuba’mba “bakulumpe ba nkito,” ba Trujillo).’”

“Yobe Mukulumpe Wabo Nyi?”

Pa boba bo bakwachile pajinga mwana wa mukazhi wa ba Fidelia Jiménez ne bepwa babo babakazhi bobafunjishanga Baibolo. Nangwa kya kuba ba Fidelia kechi bebakwachile ne, betwajiletu bene ku bakulumpe ba mukafulumende kuba’mba bebakase pa kuba’mba bakatundaike bajinga mu kaleya. Pa kyo kimye, mukulumpe wa bashilikale aye Ludovino Fernández wayukanyikilwe kuba’mba washinta bingi waishile na kumpempula bajinga mu kaleya. Waichile nyenga Fidelia ne kumwipuzha’mba: “Yobe mukulumpe wabo nyi?”

Ba Fidelia bakumbwile’mba, “Ine mwane. Anweba bonse yenu bakulumpe betu.”

Fernández wakumbwile’mba: “Ko kuba’mba wi pashita nyi?”

Ba Fidelia bakumbwile’mba, “Ine mwane. Yesu ye Pashita.”

Fernández wamwipwizhe’mba: “Nanchi obewa kechi yobe walengela kuba’mba bano bonse bakaswe nenyi? Yobe wibafunjishanga Baibolo, ke ibyo nenyi?”

Ba Fidelia bakumbwile’mba, “Ine mwane. Baibolo ye walengela kuba’mba bebakase. Mambo babena kulondela byo bafunda mu Baibolo.”

Pa kyonkakya kimye, Bakamonyi babiji ba Pedro Germán ne ba Negro Jiménez bavyala babo, baana baba mwisho yabo bebapishishenga. Bebatwajilenga na kwibashinkila mu kaleya muji bavula, kwibafumya kwa bunke ko bebakashijile. Ku jilaya ja ba Negro kwaumijile mashi, kabiji ba Pedro jiso javimbile bingi. Ba Fidelia byo bamwene kuba’mba bebapumine kyatama bingi, baipwizhe uno mukulumpe wa bashilikale amba: “Nanchi abye byobyo muba bantu bawama, bakishinka,  bakamwa Lesa nyi?” Byo amwene kuba’mba kechi wakonsha kwibazakamisha ne, Fernández wakambizhe kuba’mba ba Fidelia bebabwezhe mu kaleya.

Bapopweshi ba Yehoba bakishinka bachinchikile mu kino kimye kyakatezhe bingi. Nangwatu babinemanga bemwenejile kino. Juba jimo pa 31 July mu 1957, ba Luis Arzeno Colón, kilolo wa kwa ndamakyalo yebatumanga kuya na kupikita wanembejile munembeshi wa kyalo amba: “Nangwa kya kuba Kipamo kya Kyalo kyabikileko muzhilo wa kukanya Bakamonyi ba kwa Yehoba kuleka mingilo yabo ya bya bupopweshi, bavula kechi baleka ne, baji bingi na mukoyo, ne luno batwajijila.”