Mutende wa Kubula Kuketekela

Ba Manuel Hierrezuelo bebepaile kimye kyo bebatebawishishenga ku bamukafulumende

Ba Lennart Johnson ne ba Virginia ne ba Roy Brandt ne ba Juanita bamishonale batwajijile mu mwingilo wabo mu ino myaka yakatezhe bingi mo balekeshe mwingilo. Ba Lennart bavuluka’mba: “Ba Roy Brandt ne amiwa betwichile ku mukulumpe wa mu kafulumende na kwitutebawisha. Uno mukulumpe wa mu kafulumende wa kwa Trujillo kimye kimo waichile Mulongo Manuel Hierrezuelo kuba’mba eye amonañane nanji. “Kyatamine bingi mambo Mulongo Manuel bamwipaile kimye kyo bamutebawishenga. Wajinga wa kishinka kufikatu ne ku mpelo. Pano ki ka kyamwekejile ba Lennart ne ba Roy? Ba Lennart batwajijile kwamba’mba: “Byo twafikile, betwipwizhe mepuzho umo umo, kwa bunke, kabiji byonse byo twaambilenga bebikopelenga. Pa kyo kya kimye kafwako kyamwekele ne, bino byo papichile bañondo babiji, pepala wa byambo umo waambile’mba kafulumende wa kwa Trujillo wakasulula Bakamonyi ba kwa Yehoba kabiji ne kuba’mba bakonsha kutendeka mwingilo wabo jikwabo.”

Mu 1950, mwingilo wetu saka bakyangye kumulekesha, basapwishi bajinga 261 basapwijilenga mu kyalo kya Dominican Republic. Mwingilo wetu byo bamuswishishe mu August 1956, basapwishi basapwijilenga mambo awama bafikile 522. Balongo bajinga bingi na lusekelo, byo bayukile kuba’mba bakasuluka kwingila mwingilo wa kusapwila panyuma ya kupitapo myaka itanu na umo ya kukaswa, kwibakanya ne kwibaketa.

Bantu ba Yehoba baubile byepi bintu byo byaalukile kwa kubula kuketekela? Ponkapotu batendekele kunengezha jikwabo bya kwingila mwingilo wa kusapwila. Bakebele pa kupwijila bipwilo ne kulenga ma mapu a mwakwingijila ne mafwailo a kipwilo. Balongo batemenwe bingi byo batendekele  kuonda ne kutambula mabuku. Baingijile bingi na ngovu mu kino kimye kyo bakasulukile kusapwila. Kuno kwibikako kwabo kwalengejile mu bañondotu basatu, mu November mu 1956, basapwishi kufika 612 baingijilenga mwingilo wa kusapwila.

Lumpatompato lwa Bantangi ba Bupopweshi

Makalata a kwa Toledano mo anembele mulanguluko wanji wa kukeba kulekesha mabuku etu kwialeta mu kino kyalo

Nangwa byonkabyo, bantangi ba mu Katolika ponkapotu batendekele kutopeka Bakamonyi. Bantangi babupopweshi bajinga bingi na bulume bwa kutundaika kafulumende kuzhiisha Bakamonyi mambo Trujillo wafwachikile pepala wa lumvwañano na mukulumpe wa Bakatolika. Pulishiti wa mu Katolika aye Oscar Robles Toledano, watumine nkalata ku Munembeshi wa Kyalo aye Virgilio Álvarez Pina, ya kulomba kafulumende kuba’mba amukwasheko “kujimunako bantu ba mu Dominican mambo ‘Bakamonyi ba kwa Yehoba’ ke jibumba ja bantu batama bingi.”

Toledano waambile’mba, patanshitu twafwainwa kumona kuba’mba twalekesha “mwingilo wa Bakamonyi ba kwa  Yehoba wa kujimbaika bantu.” Nkalata ya kwa Toledano yaambile ne kuba’mba balekesha mabuku abo kwialeta mu kino kyalo, “kikatakata buku wa kuba’mba ‘The Truth Shall Make You Free’ (‘Bukine Bukemukasulula’) ne magazini wa Kyamba kya Usopa.”

Mwingilo Bamulekesha Jikwabo

Bantangi babupopweshi bakwatankene na kafulumende wa kwa Trujillo kuba’mba balukuke Bakamonyi. Francisco Prats-Ramírez wajinga ndamakyalo wa Dominican Party, watumijile nkalata Trujillo mu June mu 1957 ne kulumbulula’mba: “Mbena kulanguluka kuba’mba tukasambakane ne kwisamba pa bya kulekesha byubilo byatama ne muteeto wa kukana bya bumulwila ntanda wa Bakamonyi ba kwa Yehoba.”

Uno mukwekele wabo mwafumine bintu byatama bingi, byonka byo balumbulula mu buku wa kuba’mba Trujillo—Little Caesar of the Caribbean amba: “Kisalo mu 1957, mu pepala wa byambo wa mu Dominican mwajinga byambo bya bakulumpe ba mu Kafulumende bavula byamwesheshenga kuba’mba Bakamonyi ba kwa Yehoba ke bantu ‘babongozhi kabiji batama bingi.’ Milukuchi yakolomokele kimye Pulishitu aye Mariano Vásquez Sanz kyo abijikile pa waileshi wa kwa Trujillo wa La Voz Dominicana [Jiwi ja bena Dominican], kuba’mba bonse baji mu jino jibumba ‘bambanzhi basatukila kafulumende kabiji bajimbijimbi.’ Nkalata yafwachikilepo bakulumpe ba babishopu, abo ba Ricardo Pittini ne ba Octavio Antonio Beras yatundaikile bapulishitu bonse kuzhikijila bantu babo baji mu bipwilo ku ‘bujimbijimbi.’ ”

Kukwatankana kwa Chechi ne Kafulumende kwibalengejile kuba kyo bakebelenga. Mu July, kipamo kya Congress of the Dominican Republic kyabikileko muzhilo wa kukanya mwingilo wa Bakamonyi ba kwa Yehoba. Balongo nobe 150 bebakashile.