Mambo Awama Afikile mu Mapunzha a Kwalepa

Mu kuya kwa moba bamishonale bafikile, pa bano bafikile pajinga mulongo Pete Paschal, ba Amos Parker ne ba Barbara, ba Richard ne ba Belva Stoddard, baingijilanga mu kyalo kya Bolivia, ne ba Jesse ne ba Lynn Cantwell bafumine ku Colombia. Bano bamishonale balengejile mwingilo kununguluka bingi bukiji. Mu 1973, mwingilo wa kusapwila wanungulukile bingi mu mataunyi a mu kyalo kya Dominican Republic, bino mambo awama kechi afikile mu mapunzha a kwalepa ne. Onkao mambo, banengezhe kuba’mba bakwashe bantu ba mu mapunzha a ku muzhi kuyuka Lesa. Byo babijikile kuba’mba kubena kukebewa bakuya na kusapwila mu mapunzha a ku muzhi, bapainiya 19 ba kimye kyonse bepaine kuya na kwingijilako. Kufuma mu December 1973 kufika mu January 1977, mabumba a bapainiya beatumanga kuya na kusapwila kwabujile kufika mwingilo wa kusapwila nangwa ko baingijilekotu pacheche uno mwingilo.

“Twapimpulanga mabuku na banzolo, make, ne bipangwa”

Painiya umo waingijileko mu uno mukwekele waambile’mba: “Inge twatendeka mafunjisho a Baibolo na bantu ne kwibashila mabuku, twabwelanga pa juba jalondelapo ku boba bateleko muchima. Na mambo a kuba’mba bantu bavula mu kino kyalo kechi bajinga na mali ne, twapimpulanga mabuku na banzolo, make, ne bipangwa. Tumusanchila bingi Yehoba mambo kechi twalaajilepo na nzala ne.” “Bantu bavula kyo kyajinga kimye kitanshi kumvwapo byambo bya mu Baibolo. Bantangi ba bupopweshi bamo babulanga bantu kuba’mba Yehoba ye Diabola. Bantu bakuminye bingi byo batangile mu Baibolo binembelo nabiji kinembelo kya Salamo 83:18 kyaamba’mba: “Anweba, yenka wa jizhina ja  Yehoba, yenu bunketu Mwine Wakila pano pa ntanda ponse”! Mu mapunzha amo bantu batangako bingi muchima kya kuba kwaikalanga ne kunengezha kupwila kwa mvula bantu.

Bamishonale Bavula Bafikile ne Musampi Washimikilwe

Ba Abigail Pérez ne bakazhi babo ba Georgina, bamishonale bafikile mu September mu 1979. Bebatumine mu mwingilo wa bukalama bwa mwanzo. Mu 1987, bapwishishe Sukulu wa Gileada abo ba Tom Dean ne ba Shirley bafikile na kunungulula mwingilo wa kusapwila. Kabiji mwingilo waendele bingi bulongo na mambo a ba mu mwingilo wa kimye kyonse bafumine mu kyalo kya Puerto Rico. Mu August 1988, ba Reiner Thompson ne ba Jeanne bebatumine kuya na kwingila mwingilo wa bumishonale mu kyalo kya Dominican Republic. Kuno ko kwajinga kwa butanu kwingijilako mu mwingilo wa bumishonale.

Mu 1989, basapwishi bafikile 11,081, kabiji kyamwekeshetu patoka kuba’mba bantu basakuvujilako bingi, mambo sawakya wamwesheshe kuba’mba bo bafunjishanga Baibolo bajinga 20,494. Na mambo a kuno kuvujilako, bintu kechi byapelele ne. Bishimikwa byajinga pa musampi mu ma 1980 byakepele kya kuba kechi bakonsheshe kwingijilapo bulongo ne, mambo bantu bavujile bingi. Ba Reiner Thompson baambile’mba: “Pa musampi pavujile bingi bantu. Onkao mambo, kwajinga kukeba bishimikwa mwaya taunyi mwakulamina bintu ne mazubo mwakulaala.”

Ba Reiner baambile ne kuba’mba: “Mpunzha pa kushimikila musampi wakatataka yakatezhe bingi kutaana. Musulu umo wisambile ne atweba byo aumvwine kuba’mba tubena kukeba mpunzha. Waambile’mba ubena kukeba kupotesha mpunzha yawama bingi, bino kanatu ku Bakamonyi ba kwa Yehoba. Mu myaka ya kunyuma wajinga na kampanyi  walenganga ne kusona bivwalo, kabiji munembeshi wanji ne bakwabotu ba mingilo bajinga Bakamonyi ba kwa Yehoba. Kumona mushingi ye bajinga nanji ne byo baingijile mu bukishinka pa myaka yavula kwa mutokeshe bingi ku muchima. Wabwezhezheko ne mutengo na mambo a kuba wanemekele bingi Bakamonyi ba kwa Yehoba. Ino mpunzha beipotele mu December mu 1988, kepo mpunzha ikwabo yajinga kwipi beipotele mu kuya kwa moba. Ino mpunzha yabaya kukila pa maekita atanu na asatu paji musampi ne Nzubo ya Kubuñenamo.

Bamingilo bavula bakonkakwa ne bafumine mu byalo bingi bepaine baingijile bingi mwingilo wa kushimika musampi wakatataka ne Nzubo ya Kubuñenamo. Ba mu Jibumba Jitangijila abo ba Carey Barber, ba Theodore Jaracz, ne ba Gerrit Lösch bo baishile na kupana bino bishimikwa mu November mu 1996 pa Kibelushi. Juba jalondejilepo kwajinga kupwila mu bibanza bibiji bikatampe bya mu kyokya kyalo. Kabiji bantu kukila pa 10, 000 bayile na kumona musampi wakatataka.

‘Kwabukila ku Makedonya’

Pa kulumbulula mwapita bwikalo bwa bantu ba kwa Yehoba mu Dominican Republic, kechi twakosha kubula kwambapo pa balongo ne banyenga bavula baya na kwingijila ku mapunzha kuji kukajilwa kukatampe mu kino kyalo ne. Bavula bavilukijile ku kino kyalo na ku mpelo ya mu ma 1980, na mambo a kumvwa kuba’mba bantu bajiko batako bingi muchima ku bukine, kya kuba muntu umo wakonsha kwikala na mafunjisho a Baibolo avula bingi. Kyajingatu nobe babena ‘kwabukila ku Makedonya.’ (Byu. 16:9) Aba bavilukijileko babulanga bakwabo lusekelo lo baikalanga nalo pa kwingila mwingilo wa kunowa mu Dominican Republic. Kino kyalengejile bavula kuvilukila mu kino kyalo ma 1990.

Bamo pa bano bayile na kwingijilako ke ba Stevan Norager ne ba Miriam bafumine ku Denmark. Baingijila mu kyalo kya  Dominican Republic kufuma mu mwaka wa 2001. Uno mwaka saka akyangye kufika, ba Miriam baingijile mu kino kyalo pa mwaka umo ne kichika na bakolojabo babakazhi. Pano ki ka kyalengejile bano balume ne bakazhi kuya na kwingijila mu kyalo kingi muji kisho ne mulaka ungi? Ba Miriam baambile’mba: “Bonse betukomeshe ku bansemi batemwa Lesa bajinga bapainiya beikajila byo bajinga banyike, kabiji batendekele kwingila bupainiya baana babo byo bakomene. Bansemi betundaikanga bingi kwingijila Yehoba na muchima yense mu mwingilo wa kimye kyonse.”

Ba Stevan ne ba Miriam baikele bapainiya beikajila mu 2006, kabiji bakwasha bantu bavula bingi kuyuka bukine. Ba Stevan baambile’mba: “Twamwenamo byavula bingi. Nangwa kya kuba tupita mu makatazho ne mu misongo, bino, kechi byakila byawama byo twamona mu bwikalo bwetu, ne lusekelo lwiya na mambo a kukwasha bantu bakishinka kuyuka ne kutemwa Yehoba ne. Kabiji tuji na balunda betutemwa bavula bingi. Kwingijila mu kyalo kya Dominican  Republic kwitufunjisha kwipelula ne kutekanya. Kabiji kwikala bwikalo bwapela kwakosesha lwitabilo lwetu ne kwitulengela kuketekela mwi Yehoba na muchima yense.”

Ba Jennifer Joy baingila mu kino kyalo myaka kukila pa 20, na kukwasha bantu bengijisha mulaka wa kwamba na maboko

Ba Jennifer Joy ke banyenga bamo pa banyenga bavula babula kusongolwa babena kusapwila mu kyalo kya Dominican Republic. Mu 1992, ba Jennifer byo bayile na kupempula ba Edith White, bainabo ba bakulumpe baingila mu mwingilo wa bumishonale pa myaka yavula, popo bemwenejile bintu byawama bifuma mu mwingilo wa kusapwila. Kabiji bamwene ne banyenga bafumine mu byalo bingi baingijilenga kwajinga “kukajilwa kukatampe.” Ba Jennifer baambile’mba: “Najinga bingi na bumvu kabiji kechi neketekejile ne. Bino nalangulukile kuba’mba, ‘Inge bakwetu bakonsha kuba bino, ne amiwa nakonsha.’”

 Ba Jennifer balangulukilengatu kwikalako mwaka umo, bino baingila myaka kukila pa 20 mu Dominican Republic. Bakwasha bavula bo bafunjishanga Baibolo kwikala bapopweshi ba Yehoba. Ba Jennifer baingilako ne mu mwingilo wa kunungulula mwingilo wa kusapwila mu mulaka wa kwamba na maboko kabiji bakwashako ne kunengezha masukulu a kufunjisha bakwabo uno mulaka.

‘Yehoba wandama kufika ne buji lelo. Onkao mambo, kwa kubula nangwa kuzhinaukatu ne, ukandama ne mwaka wiya’

Pano ba Jennifer bamwena mu ka bya mu bwikalo? Baambile’mba: “Ngya ku Canada na kwingila pa mwaka pa mwaka pa bañondo bacheche. Pa myaka yavula yapitapo, naingila nkito yapusana pusana nabiji kulenga mafilimu a kubika mu makamela, kukopa bipikichala, kupenta mazubo, kulenga malaichi a ku myotoka, ne makapeti a mu mazubo. Kabiji naingijilepo ne mwingilo wa kulumbulwila bakañenda mapunzha, mwingilo wa kwibakwasha mu bya ñendelo, wa kufunjisha Kizungu, ne buntuntuluzhi.” Ba Jennifer besakanya bwikalo bwabo ku byaikalanga bena Isalela bakala mu kiselebwa. Baambile’mba: “Bamwenanga bumi mu byambo bifuma mu kanwa ka Yehoba. Byambo byanji byajinga bya kuba’mba ukebalama, ne kya kine wibalamine. Baikalanga na bya kuja pa juba pa juba, kabiji bivwalo byabo ne makwabilo abo kechi afwanga ne. (Mpitu. 8:3, 4) Ne atweba Yehoba walaya kwitulama. (Mat. 6:33) Wandama kufika ne buji lelo. Onkao mambo, kwa kubula nangwa kuzhinaukatu ne, ukandama ne mwaka wiya.”

Basapwishi baji na muchima wa kwipana kukila pa 1,000 baya ku kino kyalo kufuma ku byalo byapusana pusana nabiji ku Austria, ku Japan, ku Poland, ku Puerto Rico, ku Russia, ku Spain, ku Sweden, ku Taiwan, ne ku United States. Bano baya na kwingijila kuji kukajilwa kukatampe bafuma mu byalo  kukila pa 30 bakwatankana mu bipwilo bingijisha Mulaka wa Kwamba na Maboko wa Kina America (ASL), Kichainizi, Kizungu, Haitian Creole, Kiitalyani, Kilashani ne kipwilo kya Kisipanishi. Nabo bamba byonka byaambile mutumwa Petelo amba: “Talai! Twasha bintu byonse ne kwimulondela.”Mako 10:28.