Ku Balongo ne Banyenga:

Mu myaka kitota kya butanu na bubiji Yesu saka akyangye kusemwa, ngauzhi Ezikyo wamwene kimwesho kya kukumya. Wamwene kalaki mukatampe wa mwiulu, ne waendeshenga uno kalaki ke aye mwine Nkambo wa bilengwa byonse. Uno kalaki waendelenga mu jishinda ja kukumya. Waendelenga bingi lubilo, nobe kubesha kwa mvula, kabiji wayilenga konse konse kwa kubula kukepeshako lubilo nangwa kwaluluka.—Ezi. 1:4, 9, 12, 14, 16-27.

Kino kimwesho kituvululamo kuba’mba lubaji lwa mwiulu lwa jibumba ja Yehoba lubena kunyema lubilo kuya kulutwe. Nga lubaji lwa pano pa ntanda kiji byepi? Sawakya wa mwingilo mu mwaka wapwa wamwesha kuba’mba Yehoba ubena kukwasha bantu banji kuyilako palutwe.

Kalaki wa Yehoba ubena kwenda lubilo

Mu United States, bengijila pa Betele bapayankana na kuviluka kufuma mu muzhi wa Brooklyn ne kuvilukila ku ofweshi mukatampe wa ntanda yonse wa katataka uji mu muzhi wa Warwick, mu New York, ne ku maofweshi akwabotu, kabiji bakwabo nabo babena kubwela mu bipwilo na kusapwila. Ba mu kisemi kya Betele mu misampi ikwabo mwaya ntanda babena kushimika, kuwamisha ne kuvwanga misampi, ne kuvilukila ku mapunzha akwabo. Nga anweba? Nangwa kya kuba kechi mubena kuviluka ne, bino mwapayankana na kwingila mingilo ya Lesa ikwabo.

 Jibumba Jitangijila jitundaikwa bingi pa kumona bantu ba Lesa mwaya ntanda yonse byo babena kwendela pamo na jibumba ja Yehoba. Bavula baya na kwingijila ku mapunzha kwakepa basapwishi. Bakwabo babena kufunda mulaka wa ku kyalo kingi pa kuba’mba bengileko pakatampe mwingilo wa kusapwila. Bavula babena kwibikako kusapwila mu mashinda a katataka o babujile kwingijishapo kala. Kabiji bakwabo nabo babena kwingila mu mashinda apusana pusana. Kabiji bena Kilishitu ba kishinka bonse, kubikapotu ne bakikulumpe ne bakolwa kolwa babena kunyema mu kapela ka ku bumi, batwajijila kwingijila Yehoba ne kushiina Satana amba wa bubela. —1 Ko. 9:24.

Yukai kuba’mba Yehoba umona muchima wenu wa kwipana. (Hebe. 6:10) Uno muchima wenu wa kwipana  wituvululamo byaubile Abalahama ne Sala. Saka aji mu myaka ya ma 70, Abalahama wafumine mu muzhi wa Ula wa bena Kalodeya, ne kuya na kisemi kyanji ku kyalo kya Kenana kwalepa, ko akekelenga mu matente pa myaka 100, kufikatu ne byo afwile. Kine, aye ne mwinakwanji bajinga na muchima wa kwipana.—Nte. 11:31; Byu. 7:2, 3.

Nanchi ne anweba muji na uno muchima wa kwipana nyi? Anweba bonse mwatwajijila kwikala ba kishinka mu bino bimye byakatazha, kabiji mubena kulondela mukambizho wa kwa Yesu wa kuba’mba: “Yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi wazhila.”—Mat. 28:19.

Yesu byo aambile’mba “yainga,” kibena kulumbulula’mba kechi twafwainwa kwikalatu ne. Kitusangajika bingi pa kumona mingilo ikatampe yaingijile baana ba bwanga ba kwa Kilishitu na mukoyo mwaka wapwa. Kimweshatu patoka’mba kuboko kwa Yehoba kwa bulume bonse kubena kupesha mwingilo wa kusapwila mambo awama a Bufumu ku bisaka byonse.—Mako 13:10.

Bavula babena kutambwila mambo awama. Basapwishi bonse basapwijile na mukoyo mwaka wapwa bajinga 8,340,847, kabiji bantu bafunjilenga Baibolo pa ñondo pa ñondo bafikile 10,115,264. Kine kalaki mukatampe wa mwiulu ubena kwenda lubilo, kabiji ne anweba mubena kwendela pamo nanji. Twajijilai kwingila na mukoyo mu kimye kicheche kyashalako Yehoba saka akyangye kushinka kibelo kya lupulukilo.

Kyayilamo bingi kwikala na kinembelo kya mwaka wa 2017 kya kuba’mba, “Ketekela mwi Yehoba ne kuba bintu byawama”! (Sala. 37:3) Inge mwakookela bino byambo,  ko kuba’mba kuba byawama ne kwingila mingilo yazhila ya Yehoba, mumwesha’mba mwamuketekela. Kabiji vulukainga’mba kechi muji bunke ne. Yesu waambile’mba: “Yukai’mba nji nenu moba onse kukafikatu ne ku mpelo ya buno bwikalo.”—Mat. 28:20.

KINEMBELO KYA MWAKA WA 2017:

“Ketekela mwi Yehoba ne kuba bintu byawama”

Vulukainga’mba Yehoba ukatwajijila kupesha mingilo yenu. Yehoba kechi utala pa kukepa nangwa kubaya kwa mingilo yenu ne, bino kyanema kwi aye ke kumwingijila na muchima wenu yense. Mingilo yenu ne kwipana kwenu byonse bisangajika muchima wanji. (2 Ko. 9:6, 7) Onkao mambo, twajijilai kukosesha bulunda bwenu na Shetu wa mwiulu kupichila mu kulomba kimye kyonse, kutanga Mambo a Lesa, kupwila, ne kusapwila na mukoyo.

Diabola byo ayuka’mba “washalatu na kakimye kacheche,” ubena kwingila na ngovu kuba’mba etulengele kuleka kwikala ba kishinka kwi Yehoba. (Lum. 12:12) Kakachilai kwi Yehoba, pa kuba’mba Diabola abule kwimutwala mungi. (Sala. 16:8) Yukai kuba’mba twimutemwa bingi kabiji twimusanchila pa byo mubena kwingila mingilo ya Bufumu bwa Nkambo mu ano moba apelako.

Atweba balongo benu,

Jibumba Jitangijila ja Bakamonyi ba kwa Yehoba